2 KHANG TANGTHU NIHNATE 33:2 - Tedim Bible

² Topa in Israel mite mai-ah a hawlkhiat minamte’ zat a kihhuai gamtatnate mah bangin, amah in Topa’ muhna ah a sia gamta hi.

Tedim Bible Revision 2017

² Topa in Israel minamteʼ mai ah a hawlkhiat minamteʼ zat a kihhuai gamtatnate mah bangin, Topaʼ muhna ah amah a sia gamta hi.

2 KHANG TANGTHU NIHNATE 33:2 Referans Kwoze

2 KHANG TANGTHU NIHNATE 28:3

tua ciangin amah in Hinnom’ tapa’ kuamah paknamtui hal a, Topa in Israel mite mai-ah a hawlkhiat minamte in a zat uh a kihhuai gamtatnate mah bangin biakna ah a tapate hal hi.

Thu-hilhkikna 18:9

“Topa na Pasian un note hong piak leitang na tun’ uh ciangin, tua minamte’ gamtatna a kihhuaite zuih ding na kisin kei ding uh hi.

Ezekiel 11:12

Note’ kiim-a om minam dangte’ ngeinate zui-in na om lai takun, keimah in Topa ka hihna thu, na palsat uh thukhamte keima thukham ahihna, leh na zuih loh uh thupiaknate keima thupiak ahihna na thei ding uh hi,” ci-in gen in hong ci hi.

Jeremiah 15:4

Judah kumpipa Hezekiah’ tapa Manasseh in Jerusalem khua-a a bawl thu hangin leitung gam khempeuhte’ lau nadingin ka koih ding hi.

Ezra 9:14

hih banga ka thuak khit uh ciangin kote in na thupiaknate mang lo kikin, a kihhuai-in a gamta mite tawh kitengin kizom kik ding ka hi uh hiam? Tua bang hi kik le ung, a suakta, a nungta ka om nawn loh dongun kote tungah na hehna hong tung sak ding hilo na hi hiam?

2 KHANG TANGTHU NIHNATE 36:14

A makai siampite leh mi khempeuh zong tua mah bangin citak lo mahmah uh a, minamte’ kihhuainate zui uh hi; amah in Jerusalem ah a siangtho-in a koih Topa’ inn amaute in ninsak uh hi.

2 KUMPI NIHNATE 21:9

Ahih hangin amaute in thu ngai lo a, Topa in Israel mite’ mai-ah a suksiat minamte’ gamtatna sangin a siazaw a gamtat nadingun Manasseh in amaute zol hi.

2 KUMPI NIHNATE 21:2

Topa in Israel mite’ mai-ah a hawlkhiat minamte’ gamtatna a kihhuaite mah bangin Topa’ muhna ah amah in a sia gamta hi.

2 KUMPI NIHNATE 17:15

Amaute in ama thukhamte, leh a pu a pate uh tawh a bawl a thuciamna, leh amaute tungah a piak hilhkholhnate simmawh uh hi. Amaute in a mawkna milimte zui-in a mawkna suak uh a, amaute tawh kibangin gamta kei un ci-in Topa in a thupiak tawh kisai-in, amaute in amau’ kim-a om minamte zui uh hi.

2 KUMPI NIHNATE 17:11

tua ciangin amaute’ mai-ah Topa in a puakkhiat minamte’ hih bangin amaute in mual tunga biakna mun khempeuh tungah paknamtui hal uh hi. Amaute in a hoih lo nate hihin Topa hehsak uh a,

Thu-hilhkikna 18:14

Bang hang hiam cih leh note in na suankhiat ding uh hih minamte in khong khaite leh ai saante’ thu ngai uh hi; ahih hangin note ahih leh tua banga na gamtat ding uh Topa na Pasian un hong phal lo hi.

Thu-hilhkikna 12:31

Topa na Pasian uh tungah tua bangin na hih kei ding uh hi; bang hang hiam cih leh Topa in a muhdah a kihhuai nam khempeuh amaute in a pasiante uh adingin hih uh hi; a pasiante uh adingin a tapate leh a tanute nangawn uh mei sungah hal uh hi.

2 KHANG TANGTHU NIHNATE 33:22

A pa Manasseh’ gamtatnasa khempeuh bangin amah in Topa’ muhna ah a sia gamta hi. Amon in a pa Manasseh’ bawlsa milim khempeuh tungah biakna pia a, tuate’ na sem hi.

Thu-hilhkikna 12:29

“Topa na Pasian un na mai panun na suankhiat ding uh minamte beimang sakin, amaute suankhia-in amau’ leitangah na teen’ uh ciangin,