2 KHANG TANGTHU NIHNATE 18:7 - Tedim Bible

⁷ Tua ciangin Israel kumpipa in Jehoshafat kiangah, “Eite in Topa’ thu i dot theih nading Imlah’ tapa Mikaiah kici mi khat om lai hi; ahih hangin amah in kei tawh kisai a hoih thu genkhol ngei loin a sia bekbek gen tawntung ahih manin amah ka mudah hi,” a ci hi. Tua ciangin Jehoshafat in, “Tua bangin kumpipa in ci kei in,” a ci hi.

Tedim Bible Revision 2017

⁷ Tua ciangin Israel kumpipa in Jehoshafat kiangah, “Eite in Topa thu i dot theih nading Imlahʼ tapa Mikaiah a kici mi khat om lai hi. Ahih hangin amah in kei tawh kisai a hoih thu gen ngei loin a sia bekbek gen tawntung ahih manin amah ka mudah hi,” a ci hi. Tua ciangin Jehoshafat in, “Tua bangin kumpipa in ci kei in,” a ci hi.

2 KHANG TANGTHU NIHNATE 18:7 Referans Kwoze

Micah 2:7

Israel mite aw, “Topa a lungtom ta a, hihte, ama hong bawlna mah ahi hiam?” na cih ding uh kilawm lo hi. Ka thugenna kammalte in a thuman mite adingin a hoih hilo ahi hiam?

Amos 5:10

Note in thukhen zumah thutang a deihpa na mudah uh a, thuman a genpa na hua uh hi.

Luka 6:22

Mite in Mihing Tapa hangin note muhdah uh a, hong hawlkhiat uh a, hong kosiat uh a, na min uh hong siatsak ciangin, thupha na ngah ding uh hi.

Isaiah 30:10

amaute in thu mutheite tungah, “Mu nawn kei un,” ci-in, kamsangte tungah “Kote’ tungah thuman hong gen kei un; kote’ tungah thuzol bek hong gen un la, thutak ahi lote genkhol un,

1 KUMPI MASATE 21:20

Ahab in Elijah kiangah, “Ka galpa aw, kei hong mu na hi hiam?” a ci hi. Amah in dawngin, “Topa muhna ah a sia gamta dingin nangmah kipia tawm na hih manin nangmah kong mu hi.

1 KUMPI MASATE 18:17

Ahab in Elijah a muh ciangin, ama kiangah, “Nang in Israel mite a lungkhamsakpa na hi hiam?” a ci hi.

Galati 4:16

Tua ahih leh, keimah in thuman thutak note kiangah ka hong gen ciangin note’ gal suak ka hi hiam?

Johan 15:24

Midangte in a bawl ngei loh nalamdangte amaute lakah bawl lo hi leng, mawhna a nei kei ding uh hi. Ahih hangin tu-in amaute in hih nalamdangte mu khin napi-in kei leh ka Pa hong mudah veve uh hi.

Johan 7:7

Leitung mite in no hong mudah thei kei uh hi. Kei hong mudah uh hi. Bang hang hiam na cih uh leh, amau’ gamtatna a hoih kei ci-in teci ka pang hi.

Marka 6:27

“Johan’ lutang hong paipih in,” ci-in galkap khat a sawl ciangin tua pa pai a, thong sungah Johan’ ngawng a tan khit ciangin,

Jeremiah 38:4

Tua ciangin kumpipa’ uliante in kumpipa’ kiangah, “Hih mipa i thatlum ding hi. Bang hang hiam cih leh hih thute a gen manin hih khuapi sunga a om lai galkapte leh mi khempeuhte lungkia sakin thazaw sak hi. Hih mipa in i gam mite’ phattuam nading zong loin a gim ngah nading uh a zong zaw hi,” a ci uh hi.

Jeremiah 18:18

Tua ciangin amaute in, “Hong pai un, Jeremiah sawm ni. Bang hang hiam cih leh eite hong hilh dingin siampite ahi zongin, i dot dingin mipilte ahi zongin, Pasian’ thu hong gen dingin kamsangte ahi zongin i nei hi. Hong pai un, amah mawhsakin ama’ thu peuhmah mal khat zong i mang kei ding hi,” a ci uh hi.

Paunak 29:10

Mi a that nuamte in a thuman mi mudah a, midikte in a thuman mi hu uh hi.

Paunak 25:12

Hilhna a sangthei mipa’ adingin a pil thuhilhpa in, kizepna kham bilbah tawh kibang hi.

Paunak 9:8

Mihaite thuhilh kei in, hong mudah ding hi. Mipilte thuhilh in, hong it ding hi.

Late 69:14

Buannawng sunga tum nading panin nangma thuman huhna tawh kei hong hon in la, tui thukte leh ka galte kiang panin hong suakta sak in.

Late 55:3

Migilote’ sukcipna, galte’ huging in kei hong gimsak hi. Bang hang hiam cih leh amaute in kei tungah haksatna hong tun’ uh a, amaute in hehna tawh keimah hong galbawl ding uh nuamsa uh hi.

Late 34:21

Siatna in migilote that ding a, thuman mudahte kidantat ding hi.

2 KHANG TANGTHU NIHNATE 18:13

Ahih hangin Mikaiah in, “Topa in a nungta ahih mah bangin, ka Pasian’ gen thu ka gen ding hi,” a ci hi.

2 KUMPI NIHNATE 9:22

Joram in Jehu a muh ciangin amah in, “Jehu aw, thuhoih ahi hiam?” a ci hi. Amah in dawngin, “Na nu Jezebel’ paktatnate leh aisannate tua zahin a tam lai teng bang thuhoih om thei ding ahi hiam?” a ci hi.

1 KUMPI MASATE 19:10

Amah in, “Vanglianpen Pasian, Topa adingin ka huaiham mahmah hi; bang hang hiam cih leh Israel mite in na thuciamna nusia-in, na biakna taute lawn khia a, namsau tawh na kamsangte that hi; kei, kei bekbek ka om lai hi; amaute in kei thah dingin hong zong uh hi,” a ci hi.

1 KUMPI MASATE 18:4

Jezebel in Topa’ kamsangte a hon thah lai-in Obadiah in kamsang za khat la-in sawmnga sawmnga-in leihawm sungah seel a, amaute an leh tui tawh vaak hi.)

1 KUMPI MASATE 22:8

Tua ciangin Israel kumpipa in Jehoshafat kiangah, “Topa thu i dot theih ding, Imlah’ tapa Mikaiah kici mi khat om lai hi; ahih hangin amah in kei’ thu a hoih gen ngei loin a sia gen ahih manin amah ka mudah hi,” a ci hi. Tua ciangin Jehoshafat in, “Kumpipa in tua bangin ci kei in,” a ci hi.

2 KHANG TANGTHU NIHNATE 18:6

Ahih hangin Jehoshafat in, “Eite in i dot theih ding Topa’ kamsang a dang hih lai-ah om lo ahi hiam?” a ci hi.

2 KHANG TANGTHU NIHNATE 18:8

Tua ciangin Israel kumpipa in ulian khat samin, “Imlah’ tapa Mikaiah manlang takin hong paipih in,” a ci hi.