2 KHANG TANGTHU NIHNATE 12:7 - Tedim Bible

⁷ Amaute a kiniamkhiatna thu Topa in a muh ciangin Shemaiah tungah Topa’ thu hong tung hi: “Amaute kiniamkhiat ahih manin ka susia kei ding hi; amaute ka suaktasak liai-liai tei ding a, Shishak’ khut tawh Jerusalem tungah ka hehna ka tungsak kei ding hi.

Tedim Bible Revision 2017

⁷ Amaute a kiniamkhiatna thu Topa in a muh ciangin Shemaiahʼ tungah Topaʼ thu hong tung hi: “Amaute kiniamkhiat ahih manin ka susia kei ding hi. Amaute ka suaktasak liailiai tei dinga, Shishakʼ khut tawh Jerusalem tungah ka hehna a cingin ka tungsak kei ding hi.

2 KHANG TANGTHU NIHNATE 12:7 Referans Kwoze

2 KHANG TANGTHU NIHNATE 34:25

Amaute in amau’ gamtatna tawh kei hong hehsak theih nadingun amaute in kei hong nusia in, pasian dangte tungah paknamtui hal uh ahih manin hih mun tungah ka hehna kisungin dai lo ding hi.

Isaiah 42:25

Tua ahih ciangin amah in, ama hehna-so leh gal kidonate eite tungah hong tungsak hi. Israel mi khempeuh lakah mei bangin ama hehna hong kuang a, ahih hangin eite in bangmah i thei kei hi. Tua i thuakna hangin bangmah i phawk khia thei tuan kei hi.

Mangmuhna 14:10

Pasian’ hehna hai-ah a kihel khawm lo-a kikoih hehna leenggahzu tua mi in a dawn ding hi. Tua tham loin a siangtho vantungmite mai leh Tuuno’ mai-ah tua mi in mei leh kat tawh bawlsiatna a thuak ding hi.

Jeremiah 7:20

Tua ahih manin Topa in kong cih-inah: En in, ka hehna leh ka thangpaihna hih munah ka bua ding-a, mihingte tung leh ganhingte tung, lo lai-a singkungte leh lei laka singgahte tungah ka sung ding hi. Ka hehna a kuang ding a, a kisumit kei ding hi.

Jeremiah 3:13

Na mawhna na phawk ding bek kisam hi, Topa na Pasian na langpan’na, singliim nuai khempeuh-ah khualmite tawh na khialh kawikawina leh ka thu nong man’ lohnate pulak in, Topa in kong ci hi.

Late 79:6

Nangmah hong thei lo minamte tung leh, nangma tunga thu hong ngen lo kumpi gamte tungah heh gawp in.

Late 78:38

Ahi zongin, amah in hehpihna lungsim nei ahih manin amau khialhnate maisak a, amaute susia lo hi; amah in a hehna iip zelzel a, a hehna khempeuh phongkhia lo hi.

2 KHANG TANGTHU NIHNATE 34:21

“Pai un la, a kimu laibu sunga kammalte tawh kisai-in keima ading leh Israel leh Judah ah a om lai mite adingin Topa thu na dong un; bang hang hiam cih leh i pu i pate in hih laibu sungah a kigelh khempeuh bangin sep ding Topa’ kammal na zui lo uh ahih manin eite tungah Topa’ hehna lian hi,” a ci hi.

2 KUMPI NIHNATE 13:23

Ahih hangin Topa in amaute hehpihin amaute khasiat a, Abraham, Isaak, leh Jakob tawh a thuciamna hangin amaute lamah amah kihei a, amaute susia lo hi; tu dongin zong ama mite mangngilh lo hi.

2 KHANG TANGTHU NIHNATE 12:12

Amah in a kiniamkhiat ciangin siat cimitna a pian’ loh nadingin ama tung panin Topa’ hehna kiheikhia hi; tua tham loin Judah gam sungah thu-paizia zong hoihsak hi.

2 KHANG TANGTHU NIHNATE 34:27

hih mun leh a tunga teengte langpan’na ama kammal na zak ciangin na lungsim kisikin Pasian mai-ah na kiniamkhiat a, keima mai-ah nang kiniamkhiatin na puante balkekin ka mai-ah kap na hih manin, kei zong nang kong za hi, Topa in ci hi.

2 KHANG TANGTHU NIHNATE 32:26

Ahih hangin Hezekiah a lungsim kiphatsakna thu-ah amah leh Jerusalem a, teeng mite kiniamkhiat uh ahih manin amaute tungah Topa’ hehna hong tung lo hi.

2 KHANG TANGTHU NIHNATE 33:12

Amah a lungkham ciangin Topa a Pasian’ maipha kunh-in a pu a pate’ Pasian mai-ah nakpi takin amah kiniamkhiat hi.

2 KHANG TANGTHU NIHNATE 33:13

Amah in ama kiangah thungen a, tua ciangin Pasian in ama kutna saangin, a thuumna ngai hi. Amah in Jerusalem ah amah paipih kikin a kumpigam pia kik hi. Tua ciangin Topa in Pasian ahihna Manasseh in thei hi.