1 JOHAN MASA 1:3 - Tedim Bible

³ Ahi hi. Pa tawh, ama Tapa Zeisu Khazih tawh ka kihopih uh ahih ciangin, note in kote tawh na hong kihopih theih nadingun ko ka muh uh nate, ka zak uh nate, note kiangah ka hong lak uh hi.

Tedim Bible Revision 2017

³ Pa Pasian le a Tapa Jesu Khris tawh kote pawl khatin ka om uh mah bangin note zong kote tawh pawl khat nong suah theih nading uh deihna-in ka muh sa uh le ka zak sa uh thute a hong gen ka hi uh hi.

1 JOHAN MASA 1:3 Referans Kwoze

1 KORIN MASA 1:9

I Topa ahi ama Tapa Zeisu Khazih tawh kipawlna sungah hong sam Pasian in ciam pelh mi ahi kei hi.

Johan 17:3

Amaute in nang Pasian taktak khat bek leh na sawlpa Zeisu Khazih a theihna un nuntak tawntungna ahi hi.

Sawltak 4:20

Kote ka hih uh leh, ka muhsa uh, ka theihsa uh thute gen loin ka om thei kei ding uh hi,” ci-in a dawng uh hi.

Johan 17:21

Nang in kei nong sawl cih leitung mite in a up nadingun Pa aw, keima sungah na om a, kei in nangma sungah ka om bangin, amaute zong eimau sungah om-in pumkhat a suah nadingun thu kong ngen hi.

Filippi 2:1

Tua ahih ciangin Khazih sungah hansuahna ahi zongin, itna tawh kipawl lungnopna ahi zongin, Kha Siangtho tawh kihotheihna ahi zongin, hehpihna leh diksakna ahi zongin na khatpeuh peuh a om leh, khat leh khat ki-it ciatin, khat leh khat lungsim kikhen loin hanciamna kibangin, lungsim kikhatin na om manunah ka lungdamna na cingsak un.

2 KORIN NIHNA 13:14

Topa Zeisu Khazih’ hehpihna thupha ahi zongin, Pasian hong itna ahi zongin, Kha Siangtho’ kihotheihna ahi zongin note khempeuh tawh omkhawm ta hen.

1 JOHAN MASA 1:7

Amah in khuavak sungah a om mah bangin eite zong khuavak sungah i om leh, khat leh khat kihothei-in, a Tapa Zeisu’ si in eite mawhna khempeuh hong sawpsiang hi.

1 JOHAN MASA 1:1

A cil panin piang a, komau in za-in, ka mittang uh tawh mu-in, a tel takpi enin, ka khut uh tawh ka lawn’ khitsa uh nuntakna Thu tawh kipawl thute, note kiangah kong zasak uh hi.

Hebru 3:14

Bang hang hiam na cih uh leh, eite in i kipat cil upna bangin a tawp dongin i kip leh, Khazih tawh a ngah khawmte i hi ding hi.

1 PETER MASA 5:1

Tua ahih ciangin upa ahi tham loin, Khazih’ gimna thuakna a mu teci hi a, a kilang ding vangliatna a zom ding keimah in note lakah a om upate kong hansuah hi.

Hebru 3:1

Tua bang ahih leh, vantunggam tawh kipawl hong sapna thupha a ngah misiangtho ute naute aw, a thuman Sawltak leh Siampi Ukpa ahi ci-a i san’ Zeisu tel takin enin ngaihsun un.

Sawltak 20:27

Bang hang hiam na cih uh leh, Pasian’ thu buppi note kiangah gen dingin ka pelh kei hi.

1 JOHAN MASA 1:5

Ama kiangah ko ka zak uh a, note kiangah kong hilh uh thu in: Pasian in khuavak hi a, ama sungah khuamial a om peuhmah kei hi.

Hebru 2:12

Tua bang a cihna in: “Ka ute ka naute kiangah Na min ka gen ding hi, Mihon laizangah nangmah phatna la ka sa ding hi,” ci-in a gen hi.

1 TIMOTI MASA 6:2

A tote in thu-um mi ahih uh leh, unau khat ahih uh ciangin nasim lo, thudon loin, om kei uh hen. A nasepna-ah noptuamna a ngah mite in, a um mite leh it tuak mite ahih uh ciangin a nasep pha takin seem zaw ta uh hen. Hih thute hilh in la, hansuah in.

Filippi 1:7

Note khempeuh ading tua bang lungsim ka neih ding a kilawm hi. Bang hang hiam na cih uh leh, note khempeuh in keimah tawh thupha na ngah khawm uh a, keima thongkiatna-ah ahi zongin, Lungdamna Thu lamah hutna leh kipsakna-ah ahi zongin nong huh uh a, tua thu hangin note kong phawk tawntung hi.

Efesa 3:6

Tua thuthuk in: Gentailte in Lungdamna Thu hangin Judah mite tawh a luah khawm mi, pumpi khat’nate suak khawmin Khazih Zeisu tawh kipawl thuciamna a zomkhawm mi a suak uh hi.

1 KORIN MASA 1:30

Tua Pasian hangin note in Khazih Zeisu sungah na om uh hi. Tua Khazih Zeisu in eite ading Pasian kiang pan pilna, dikna, sian’thona leh tatkhiatna hong suak zo hi.

1 KORIN MASA 15:1

Ute naute aw, note kiangah kong hilh ngei mah bangin na san’ uh a, na belh uh Lungdamna Thu kong zasak kik ding hi.

ROM (Romans) 15:27

Ahi hi, lungsim takpi a nei uh ka cih hangin amaute in tuate tungah leiba nei-in a kingaihsun uh hi. Bang hang hiam na cih uh leh, Gentailte in Kha Siangtho piak thuphate Judah mite tawh a ngah khawm uh ahih leh, leitung sum pia-in amau zong Judah mite a vaak ding uh a kilawm hi.

Sawltak 13:41

Tua thu in: ‘Mi gilote aw, en un, Lungmang un la, taimang un! Bang hang hiam na cih uh leh, nomau khang lai takin na khat ka bawl ding hi, tua bawlna thu mi khat in hong hilh hangin na um kei ding uh hi,’ a ci hi,” ci-in a hilh hi.

Sawltak 13:32

‘Ka tapa na hi hi. Tu ni-in na Pa ka suak hi,’ ci-in Late Lai Siangtho Nambat nihna sungah a kigelhkholh mah bangin Pasian in Zeisu nungtakik sak a, i pu i pate kiangah a piak kiciamna ei a tate tungah hong tung sak hi ci-in Lungdamna Thu nomau kiangah kong paipih uh hi.

Sawltak 2:42

Amaute in sawltakte’ thuhilhna a mang uh a, kipawl khawmna, khomun balnenna leh thungetna a bawl tawntung uh hi.

Johan 17:25

A siangtho ka Pa aw, leitung mite in nang a hong theih loh uh hangin, kei in kong thei hi. Hih mite in kei nong sawlpa ka hihna a thei uh hi.

Johan 17:11

Tu-a kipanin leitungah ka om kei ding hi. Hih mite in leitungah a om lai ding uh hi. Nangma kiangah kei kong pai ding hi. A siangtho Pa aw, nang leh kei in pumkhat i hih mah bangin, amaute zong pumkhat a suah nadingun kei nong piaksa mite nangma min tawh kipsak in.

Late 22:22

Ka u ka naute tungah nangma min ka gen ding a, mihon kikhopna laizangah nangmah kong phat ding hi:

Isaiah 66:19

Amaute’ lakah lim khat ka khai ding hi. Amau kiang panin, a suakta lai mite pen, minamte tung, Tarshish mite tung, Put mi leh Lud mite tung, Meshek mite tung, Tubal mi leh Javan mite tung, ka min hoihna a za ngei lo, ka minthan’na a mu ngei lo tuipi gei-a om gammite tungah ka sawl ding hi; amaute in minamte lakah ka minthan’na genthang ding uh hi.

Late 2:7

Topa’ thukhenna kong gen ding hi; Amah in kei’ tungah, “Nang in ka tapa na hi a, tuni in nang kong piang sak khin zo hi.

Johan 19:35

Tua thu a mu mi in teci a pang hi. Ama teci pan’na thu aman hi. Note in na up theih nadingun ama genna thu aman hi ci-in a thei hi.

2 PETER NIHNA 1:16

Kote in i Topa Zeisu Khazih’ vangliatna ahi zongin, a hong paikikna thu ahi zongin, note kiangah kong gen uh ciangin pilna tawh kibawl tangthu zui loin, a thupitna leh a liatna mu-in teci ka hi uh hi.

Gamlak-vakna 10:32

Kote hong zui lecin, Topa in kote hong limbawl ding bangbangin nang zong kong limbawl ding uh hi,” a ci hi.

JOB (Job) 13:1

“Na gen thu khempeuh uh ka muhsa hi a, ka bil-in ka zaksa, ka theihsa thu ahi hi.