WAEBRANIA 9:4 - Biblia Ilagho Jiboie Kwa Wandu Wose

⁴ Andenyi kwaro, korekoghe na madhabahu ya dhahabu efukiria marumba, na Sanduku ya Ilaghano ishingilo dhahabu chia rose. Iyo Sanduku erekoghe na mkebe ghwa dhahabu ghowika ija mana, mzata ghwa Haruni ugho ghorejosereghe malemba, na vishawalata va magho viandikilo ija memu ikumi;

WAEBRANIA 9:4 Referans Kwoze

MITALO 17:10

BWANA ukamzera Musa, “Wunja mzata ghwa Haruni kughuwike imbiri ya Sanduku ya Ilaghano, ghukaie alama ewikumbusa waleghi wisezughunukeghe wichefwa.”

2 MALAGHO GHA NGELO 5:10

Ndekorekoghe na kilambo chingi andenyi ya iyo Sanduku, ela vija vishawalata va magho viwi, ivo Musa oreviwikieghe andenyi aja Horebu, andu BWANA orebonyereghe ilaghano na wandu wa Israeli, iji werefumieghe Misri.

WALAWI 16:12

Uchadwa modo ghwa maka na luwigha kufuma madhabahunyi imbiri ya BWANA, na ngonde iwi richue ra marumba mecha ghichanilo-chanilo; nao uchangia navo andenyi ya Andu Kwa Wueli Kuchumbie.

KUFUMA 40:3

Kungire Sanduku ya Ilaghano andenyi, iko na Memu Ikumi, sena kuirighie pazia.

KUFUMA 26:33

Kuwanike iyo pazia kwa iro koleo, nao kurede ija Sanduku ya Ilaghano iko na vishawalata viwi va magho andenyi, na kuiwika nanyuma ya iyo pazia. Iyo pazia ichatanya Andu kwa Wueli na Andu kwa Wueli Kuchumbie.

MITALO 17:5

Na mzata ghwa mundu nimsaghuagha, ghuchabusa malemba. Kwa chia iyo, nichanyamirisha mazughunuko gha wandu wa Israeli wawuyamzughunukia.”

KUFUMA 34:29

Nao Musa ukasea kufuma Mghondi ghwa Sinai, ukidwa mkonunyi kwake iyo Memu Ikumi. Wushu ghwake ghorekoghe ghuking'ala-ng'ala angu orekoghe ukidedanya na BWANA; ela uo moni nderemanyireghe anduangi.

WUFUNUO 8:3

Na malaika mzima ukacha ukakaia kimusi madhabahunyi, uko na luwigha lwa dhahabu lofukira marumba; nao orenekeloghe marumba mengi upate kughiranganya na malombi gha waeli wose aighu ya agho madhabahu gha dhahabu, ghiko imbiri ya icho kifumbi cha nguma;

1 WAZURI 8:21

Nameria kuiwika Sanduku ya Ilaghano aho, iyo iko na Ilaghano ja BWANA, ijo orebonyereghe na weke aba iji orewifunyireghe isanga ja Misri.”

1 WAZURI 8:9

Ndekorekoghe na kilambo chingi andenyi ya iyo Sanduku, ela ivo vishawalata va magho verengiriloghe ni Musa aho Mghondi ghwa Sinai, iji BWANA orebonyereghe ilaghano na wandu wa Israeli ngelo werefumieghe Misri.

1 WAZURI 7:50

vikombe, mawutambi gha taa, bakuli, dishi refukira marumba, chuwigha reduka maka gha modo, na bahaba ra minyango ya Andu kwa Wueli Kuchumbie, na minyango ya shighadi ya Hekalu. Vilambo ivo vose vedeeka va dhahabu.

MITALO 17:8

Nakesho yaro, Musa orengirieghe Hemenyi; ukawona mzata ghwa Haruni ugho ghorekoghe kwa wundu ghwa kichuku cha Lawi, ghufunyire malemba; ghukashekera, na kuva matunda ghiwurue gha mlozi.

KUFUMA 39:35

Sanduku ya Ilaghano iko na Memu Ikumi nguro raro, na kifuniko charo;

KUFUMA 31:18

Niko iji Mlungu wameria kudedanya na Musa aighu ya Mghondi ghwa Sinai, ukamneka vishawalata viwi va magho, viko na memu uiandikie moni kwa chala chake.

KUFUMA 32:15

Musa ukasea kufuma mghondinyi ukidwa vishawalata viwi va magho mkonunyi kwake, viko na memu iandikilo chia rose.

KUFUMA 37:25

Ukabonya madhabahu efukiria marumba kwa mudi ghwa mgholeka. Erebonyeroghe ikatane chia rose, sentimeta mirongo ina na isanu kwa mirongo ina na isanu, na wuighu ghwaro ghorekoghe sentimeta mirongo ikenda; mbembe raro rerewadanishiroghe nayo.

WUKUMBUSO 9:9

Nani iji nerejokieghe mghondinyi kuwusa vishawalata va magho, ivo va ilaghano BWANA orejibonyereghe nenyo, nerekaieghe aighu ya mghondi matuku mirongo ina kio na dime; serejieghe vindo, hata kunywa machi ghangi.

WUKUMBUSO 9:11

Nao kutua kwa agho matuku mirongo ina kio na dime, BWANA ukanineka ivo vishawalata va magho va ilaghano.

WUFUNUO 11:19

Niko Hekalu ya Mlungu ikarughulwa mlungunyi, na Sanduku ya Ilaghano jake ikawoneka Hekalunyi; kukakaia kukaba chuhehia, chwaka, mirurumo ya lukuwa, msughusiko ghwa ndoe, na vua mbaa ya magho.