TITO 1:9 - Biblia Ilagho Jiboie Kwa Wandu Wose

⁹ Suti ukaie mundu ujiwadiagha nicha ijo ilagho ja loli jirumirikie, seji koni ufundishiro; eri udime kufundisha mafundisho gha loli, na wokoni udime kuwisima kwa kuwiwonyera makosa awo wijitangalagha.

TITO 1:9 Referans Kwoze

2 WATHESALONIKE 2:15

Kwa wundu ugho wanidu, mangenyi gi na kumazira agho mafundisho deremfundishireghe; ngera ni kwa chia ya madedo ghedu, angu kwa chia ya barua.

2 TIMOTHEO 1:13

Nugha mfwano ghwa malagho gha loli, agho koreghisikireghe kwapo, kwa irumirio na lukundo luko andenyi ya Kristo Jesu.

1 TIMOTHEO 6:3

Ngera mndungi wafundisha wuzima, nao nderumiriagha malagho gha loli gha Bwana odu Jesu Kristo, na mafundisho ghiko na kuobua kwa Mlungu,

1 TIMOTHEO 1:10

na walaki; womi wilakagha na womi, waiwi wandu, watee, na waghemi wa tee, chiaimweri na maza zima rose risewadanagha na mafundisho gha loli;

WUFUNUO 3:3

Idana kumbuka seji korefundishiroghe na seji koresikireghe, kuwadie na kuhea. Kukalegha kuwuka, nichacha sa kitoi, na oho ndekuchaamanya ingelo nikucheagha nayo.

1 TIMOTHEO 1:15

Ilagho iji ni ja loli, najo jafwana kurumirilwa putu, kukaia Jesu orechieghe wurumwengunyi kukira wakaung'a; na wa imbiri wa awo wakaung'a ni ini moni;

TITO 2:1

Ela oho, fundisha agho malagho ghiko gha loli.

TITO 1:11

Suti winyamiro, kwa kukaia waawuyasumbua wandu wose kula kinyumba kwa kufundisha iro maza risewifwane kufundisha; na agho waawuyabonya kwa wundu ghwa kupata fwaida isefwanagha.

2 TIMOTHEO 4:3

Angu matuku ghichacha ngelo wandu wisechaaghirumiria mafundisho gha loli, ela wikikaia wikunde kusikira malagho kunughana na bea rawo reni, wichakukwanyira weni walimu, awo wichaawineka mafundisho agho wighikunde;

1 WATHESALONIKE 5:21

ela mritime maza rose, na kurimazira iro riko riboie;

MAKATANISHO 23:23

Kughuo loli, ela kuseiuze; pata hikima, mafundisho, na kutambukilwa.

AYUBU 2:3

BWANA ukamkotia Shetani, “Welee, kwammbonie mdumiki wapo Ayubu? Ndekuwadie mndungi ndoenyi uko mloli na mucha sa uo. Wadanitasa na kukulindia usebonye ilagho jingi iwiwi. Kwanishingirie nikusighe kumkabe duu, ela Ayubu waduagha mloli.”

WUFUNUO 3:11

Niacha shwa-shwa, maziria icho kuko nacho, mndungi usechekusoka kirumbu chako.

WUFUNUO 2:25

ela ugho ghoni ghwa inyo kumazira icho muko nacho hata nacha.

JUDA 1:3

Wakundwa, ngikaia na bea mbaa emuandikia malagho aighu ya kukia kodu isi diwose, nerewonieghe ni suti niandike, ngimlomba angu mujidederie ijo irumirio werenekeloghe awo waeli indo jimweri tua.

2 TIMOTHEO 2:25

na kuwiwonyera kwa wumboa awo wimtangalagha. Kewada Mlungu uchawineka kuhea na kuvikia kuimanya ija loli;

2 TIMOTHEO 2:2

Na agho kughisikire ngighora imbiri ya washahidi wengi, kuwifundishe wandu wazima wiko wa loli, awo wichaadima kuwifundisha wazima wokoni.

1 TIMOTHEO 4:9

Ilagho iji ni ja loli, najo jafwana jirumirilo putu.

1 TIMOTHEO 1:19

kukijimazira ijo irumirio na nia iboie. Wandu wamu waleghie kuisikira iyo nia, wikadima wakunonia irumirio jawo;

MABONYO GHA WADUMI 18:28

ukawisima Wayahudi imbiri ya wandu wose, ukiwonyera kwa Maandiko Ghielie kukaia Jesu nuo Kristo.

AYUBU 27:6

Nichaimaziria hachi yapo, hata sichaaisigha; ngolo yapo ndeiwuenitanya kwa ilagho jingi.

1 WAKORINTHO 14:24

Ela ngera wose wachila, na mundu wa shighadi angu userumirie ungie, ghose uchaaghisikira ghichamtanya, nagho ghichamfunukuya mawiwi ghake;

2 TIMOTHEO 3:14

Ela oho, dua kwa agho kukufundishire na kughirumiria putu, kukimanya awo wandu kukufundishire kwawo,