NEHEMIA 9:5 - Biblia Ilagho Jiboie Kwa Wandu Wose

⁵ Walawi winughagha wikawanga wandu wichemtasa Mlungu: Jeshua, Kadmieli, Bani, Hashabneia, Sherebia, Hodia, na Shebania, na Pethaya, wikighamba, “Wukenyi mumkase BWANA Mlungu onyu; mkasenyi kwa kala na kala! Kula mundu ndejikase irina jake ja wubaa, hata ngera ndeidimikagha mdamu umkase kwa kukata.”

NEHEMIA 9:5 Referans Kwoze

1 PETRO 1:3

Mlungu ndekaso, uo Ndee Bwana odu Jesu Kristo. Kwa wughoma ghwake m'baa, isi derevaloghe wuwishi, dipate kukaia na isuwirio jiko moyo kwa chia ya uko kuruka kwa Jesu Kristo kufuma kwa wafu;

2 WAKORINTHO 4:6

Angu uo Mlungu ughambie, “Mwengere ndeghung'ale-ng'ale kufuma kirenyi”, nuo moni ung'alie andenyi ngolonyi kodu, na kudineka mwengere, dipate kughumanya wubaa ghwa Mlungu ghwawuyang'ala-ng'ala wushunyi kwa Kristo.

MATHAYO 11:25

Ngelo iyo Jesu ukaghamba, “Nakuneka chawucha ee Aba, Bwana wa mlungunyi na ndoenyi, angu korewivisireghe wandu wa akii na suku maza iri, kukawiwonyera wanake watini.

EZRA 3:11

Nawo wikabora kwa kudikiana wikikasa na kumfunyira BWANA chawucha huwu: “BWANA ni mucha, angu lukundo lwake kwa Israeli, lwadua matuku ghose.” Na wandu wose wikakema wikimkasa BWANA kwa lwaka lubaa, kwa kukaia msingi ghwa Hekalu ghorekoghe ghwazolwa.

1 MALAGHO GHA NGELO 29:13

Na idana dakuneka chawucha Mlungu odu, na kujikasa irina jako ibaa.

ZABURI 146:2

Nichamkasa BWANA ngelo rose niko moyo; nicham'boria makaso kari kose.

ZABURI 145:5

Wichaghora maza ra wubaa ghwako ghwa kiwuzuri, nani nicharirikanya maza ra kazi ra mashiniko.

ZABURI 145:2

Nichakukasa oho kula ituku, na kujikuma irina jako kwa kala na kala.

ZABURI 134:1

Choonyi mumkase BWANA inyo wadumiki wake wose, mdumikagha andenyi ya Hekalu yake nakio!

ZABURI 106:2

Nani udimagha kughora mabonyo ghose gha ndighi BWANA ughibonyere? Nani udimagha kumkasa kwa kukata?

ZABURI 16:2

Nadamzera BWANA, “Oho ko BWANA wapo; siwadie kindo chingi kicha kuchumba oho.”

2 MALAGHO GHA NGELO 20:19

Walawi wa kivalwa cha Kohathi na cha Kora wikawuka kimusi kumkasa BWANA, Mlungu wa Israeli kwa lwaka lubaa na ndighi.

2 MALAGHO GHA NGELO 20:13

Wandu wose wa Juda werekaieghe kimusi imbiri ya BWANA chiaimweri na waka wawo na wana wawo aho Hekalunyi.

1 MALAGHO GHA NGELO 29:20

Niko Daudi ukajizera ikwanyiko jose, “Mkasenyi BWANA Mlungu odu.” Na iwkanyiko jose jikamkasa BWANA Mlungu wa weke ndee, wikaghoghomesha vongo vawo, wikamtasa BWANA na kumneka ishima mzuri.

1 MALAGHO GHA NGELO 29:11

Oho koko m'baa na wa ndighi, wa wubaa kukumikie wa kiwuzuri.

1 WAZURI 8:27

“Ela loli Mlungu wadima kukaia ndoenyi? Zighana mlungunyi kwa ighu ndekukukatagha, ni kuchumba saki i Hekalu nakuaghia!

1 WAZURI 8:22

Niko Solomoni ukakaia kimusi imbiri ya madhabahu gha BWANA ikwanyiko jose ja Israeli jikiwona; ukaiwusira mikonu yake cha mlungunyi

1 WAZURI 8:14

Nao Mzuri Solomoni ukawighalukia wandu wa Israeli werekoghe kimusi, ukawirasimia.

WUKUMBUSO 28:58

“Kukalegha kulindia na kubonya malagho agha ghose gha sharia ghiandikilo andenyi ya chuo ichi; eri kupate kujiobua ijo irina ja BWANA Mlungu wako, jiko ibaa, jeobosha,

KUFUMA 15:11

“Nani uko sa oho ee BWANA aghadi ya milungu? Nani uko sa oho kwa wubaa andenyi ya wueli? Mabonyo ghako gha wubaa ghiaobosha, ghiko gha mashiniko?

KUFUMA 15:6

Mkonu ghwako ghwa kiwomi ee BWANA, ghoko na wubaa na kudima, mkonu ghwako ghwa kiwomi ee BWANA, ghwamfasha-fasha m'maiza.

1 WAZURI 8:15

Ukighamba, “BWANA, uo Mlungu wa Israeli ndekaso. Wakatishire ijo ilaghiro jake oremlaghirieghe aba Daudi kwa momu ghwake ukighamba,

NEHEMIA 9:4

Korekoghe na kiwayo kwa wundu ghwa Walawi. Jeshua ukakaia kimusi aighu yaro, chiaimweri na Buni, Kadmieli Shabania, Buni, Sherebia, Buni, na Kenani. Wikamlomba BWANA Mlungu wawo kwa lwaka lubaa.

NEHEMIA 9:6

Niko wandu wa Israeli wikalomba huwu: “Oho BWANA, ni oho kuekeri kuko BWANA; korebonyereghe ndoe na bahari na vose viko andenyi yaro; kukawineka wose irangi. Ijeshi jose ja mlungunyi jaghoghoma kukutasa oho.

WATANYI 13:18

Malaika wa BWANA ukamzera, “Kwaki kukotiagha irina japo, na irina ijo ni ja mashiniko?”

1 MALAGHO GHA NGELO 16:36

BWANA, uo Mlungu wa Israeli ndekaso! Ndekaso kwa kala na kala! Niko wandu wose wikaghamba, “Amen!” nawo wikamkasa BWANA.

AYUBU 1:21

Nao ukaghamba, “Neevalwa duu, nani nichafwa duu; BWANA oreninekieghe, nao wawusa; irina jake ndejikaso.”

ZABURI 66:2

borenyi gha wubaa ghwa irina jake, kasenyi wubaa ghwake.

ZABURI 99:3

Ndewijikase irina jake ibaa jeobosha. Uo ni Mweli.

DANIELI 2:20

“Irina ja Mlungu ndejikaso kwa kala na kala, hikima na kudima vadakaia kwake.