JOELI 3:16 - Biblia Ilagho Jiboie Kwa Wandu Wose

¹⁶ BWANA wadoka kufuma Mghondi ghwa Sioni lwaka lwake lwaruruma kufuma Jerusalemu; mawingunyi na ndoenyi kwasughusika. Ela BWANA uchawilindia wandu wake.

JOELI 3:16 Referans Kwoze

AMOSI 1:2

Amosi ukaghamba, “BWANA waruruma kufuma Mghondi ghwa Sinai; wadeda kufuma Jerusalemu. Milamba elisha yaoma, na nyasi aighu ya Mghondi ghwa Karmeli rawuya manjano.”

HAGAI 2:6

“Ini BWANA Uwadie-Ndighi-Rose naghamba kukaia kafwani koni nichasughusa mlungunyi, na ndoenyi, na ndoe iomie, na bahari.

JEREMIA 16:19

Ee BWANA, oho kuko ndighi rapo na ngome yapo, andu kwapo kokimbiria ngelo ya wasi; mbari ra wandu richacha kwako kufuma kutuonyi kwa ndoenyi wikighamba, “Weke aba ndewerewadieghe kindo chingi, ela milungu ya tee, iyo milimu ya duu isene fwaida ingi.

ISAYA 42:13

BWANA wafuma karakara na ing'oni, wawukwa ni mware na kukema kara kara na mundu wa wuda; kuwonyera ndighi rake kwa wamaiza wake.

MAKATANISHO 18:10

Irina ja BWANA ni mnara ghumange; mhachi wadaghukimbiria na kukaia banana.

EZEKIELI 38:19

Na kwa wundu ghwa iriso na machu ghapo ghibirie, naghamba, Ituku ijo kuchakaia na msughusiko m'baa andenyi ya isanga ja Israeli;

ISAYA 51:16

Nakunekie malagho ghapo gheghora, nani ngakulindia kwa ndighi rapo; ni ini nibonyere mlungunyi, na kuwika misingi ya ndoenyi; nani nadawizera wandu wa Jerusalemu, ‘Inyo mo wandu wapo.’”

ZABURI 61:3

Angu oho ko andu kwapo kokimbiria, mnara ghumange ngelo elwa na m'maiza.

WUFUNUO 16:18

Kukakaia kukaba chuhehia, na chwaka, na mirurumo ya chukuwa, na msughusiko m'baa ghwa ndoe na jingi ghuserekoghe huwo kufuma wandu wizoe kukaia ndoenyi; msughusiko ugho ghorekoghe m'baa na ndighi.

ZABURI 18:2

BWANA mlindiri wapo; ni ngome yapo na mkiri wapo. Mlungu wapo ni mlindiri wapo nimkimbiriagha. Uo ni sa ngao yapo, na Mkiri wapo uwadie ndighi; nuo andu kwapo kokimbiria.

ISAYA 33:16

Uo mundu uchakaia banana, andu kuko na wulindiri ghukate sa ngome ya magho; uchanekwa vindo vake na machi ghake ghimkate.

ZABURI 29:11

BWANA ndewineke ndighi wandu wake, BWANA ndewirasimie wandu wake kwa kuwineka sere.

1 SAMUELI 15:29

Sena Mlungu, uo uko Wubaa ghwa Israeli ndeghoragha tee hata ndeghalukagha sa mdamu anduangi.”

WUFUNUO 11:19

Niko Hekalu ya Mlungu ikarughulwa mlungunyi, na Sanduku ya Ilaghano jake ikawoneka Hekalunyi; kukakaia kukaba chuhehia, chwaka, mirurumo ya lukuwa, msughusiko ghwa ndoe, na vua mbaa ya magho.

WUFUNUO 11:13

Ngelo ija cheni, korekoghe na msughusiko m'baa ghwa ndoe, na ifungu ja ikumi ja muzi jikaghwa; wandu elfu mfungade wikabwaghwa ni ugho msughusiko; na awo weresigharikieghe, wikakambwa ni chongo na ndighi, na kuobua, nawo wikamneka wubaa Mlungu wa mlungunyi.

WAEBRANIA 12:26

Ngelo iyo, lwaka loresughusireghe ndoe; ela idana walaghira huwu, “Indo jimu sena nichasughusa si ndoe iekeri anduangi, ela na mlungunyi wori.”

ZEKARIA 10:12

Nichawibonya wandu wapo wikaie na ndighi, wichanitasa na kunisikira.” Ini BWANA naghamba.

AMOSI 3:8

Shimba yameria kururuma; nani useobuagha? BWANA wameria kughora; ni mlodi uao usefunyagha wulodi?”

HOSEA 11:10

“Wandu wapo wichaninugha, iji nawirurumia wamaiza wawo sa shimba. Wichashashira kunikimbiria wikisughusika kufuma magharibi.

ZEKARIA 10:6

“Nichawibonya wandu wa Juda wikaie na ndighi; nichawikira wandu wa Israeli. Nichakaia na wughoma nawo, na kuwiwunja wose mzawo. Wichakaia seji serewileghieghe jingi. Ini ne BWANA Mlungu wawo; nani nichatumbulia malombi ghawo.

ISAYA 33:21

Aho BWANA uchakaia ukiditesia; kuchakaia na meda mibaa na mitini, andu meli ra wamaiza risedimagha kughenda, hata meli ra wabaa risedimagha kuida.

JEREMIA 17:17

Kusakenibonya nikuobuo angu oho koko andu kwapo kokimbiria ituku ja wasi.

NAHUMU 1:7

BWANA waboie; wadawilindia wandu wake ngelo ya wasi. Wadawilindia awo wimrumiriagha.

HAGAI 2:7

Mbari rose ra wandu nicharikumba noko, na mali rawo wicharireda aha, na Hekalu ichachulwa ni mali.

ZEKARIA 9:12

Wuyenyi inyo m'barishiro muko na isuwirio, wuyenyi andu konyu kwa wubanana. Naghamba nichamlipa marasimio mando awi.