HOSEA 2:7 - Biblia Ilagho Jiboie Kwa Wandu Wose

⁷ Uchawinugha wakundwa wake, ela ndechaawipata; niko aho uchaghora, ‘Nichammburia mndwawomi wapo wa imbiri, kwa kukaia nerekoghe nicha kwake kuchumba idana.’

HOSEA 2:7 Referans Kwoze

JEREMIA 2:2

“Ghenda kuwizere wandu wa Jerusalemu, BWANA waghamba welee, Nakumbuka sa iji korekoghe mloli ngelo ya wanake ghwako, sa iji korenikundeghe kara kara na bibi arusi, sa iji koreninughieghe kireti isanga jisedimagha kuwalwa kindo chingi.

HOSEA 5:13

“Nao iji Israeli wawona seji uko mkongo, na Juda kuwona seji washoghonaka, Israeli ukaghenda cha Ashuru kulomba wutesia kwa m'baa wa isanga, ela ndereboisireghe hata kuhoa kushoghonoka kwake.

HOSEA 13:6

Ela iji morejieghe mkaghuda andenyi ya isanga ja ilaghiro, morekujosereghe ngolonyi konyu mkaniliwa.

EZEKIELI 23:4

Uja mwai m'baa orewangwaghwa Ohola, na mruna orewangwagha Oholiba. Ngawilowua wose wawi, nawo wikava wana wa womi na wa waka. Kunughana na marina ghawo, Ohola ni Samaria; na Oholiba ni Jerusalemu.

JEREMIA 14:22

Eko milungu ingi ya tee ya iro mbari ra wandu idimagha kureda vua? Hata mawingunyi kuekeri ndekudimagha kureda mishushure. Wele si oho kumoni kubonyagha agha ghose, ee BWANA Mlungu odu? Nesi dawika isuwirio jedu kwako.

HOSEA 14:1

Ee wandu wa Israeli, wuyenyi kwa BWANA Mlungu onyu, kwa kukaia mookuwishwa ni makosa ghenyu gheni.

HOSEA 5:15

“Nichawisigha wandu wapo hata witiriro ni kaung'a rawo kwa kukata; wiwonecha wikinilola. Kewada andenyi ya matiriro ghawo, wadima kunilola hata winiwone.”

DANIELI 5:21

Orefunyiroghe kwa wandu, akili rake rikaghaluswa rikawuya ra nyamandu, ukakaianya na furo na kuja nyasi sa ng'ombe; mumbi ghwake ghukakabwa ni mami kwa mishushure ya mlungunyi hata ukatambua kukaia Uo-Uko-Aighu-Nandighi wabonyeragha mawuzuri gha ndoenyi nguma, na kummbika m'baa uo ose umkundagha.

DANIELI 4:32

Oho kuchaghenjwa noko kufume kwa wandu, kukaianye na nyamandu ra isakenyi, kuje nyasi sa ng'ombe kwa miaka mfungade, hata kwameria kukufundisha kukaia Uo Uko Aighu Na Ndighi wabonyeragha mawuzuri gha wadamu nguma, na kumneka uo ose ukundagha.”

DANIELI 4:25

Kuchawingwa kufuma kwa wadamu, na oho kuchakaianya na nyamandu ra isakenyi; kuchaja nyasi sa ng'ombe, na oho kuchakabwa ni mami kwa mishushure ifumagha mlungunyi. Miaka mfungade ichaida, hata kwamanya kukaia Uo Uko Aighu na Ndighi wabonyagha nguma aighu ya mawuzuri gha wadamu, nao wadamneka uo ose umkundagha.

DANIELI 4:17

Kutanya uko kwanughana na sharia idumbulo na kutangazwa ni weke malaika waeli wichereshagha, eri kutua wandu wiko moyo wimanye kukaia Uo-Uko-Aighu-Nandighi wadabonyera mawuzuri ghose gha wadamu nguma, nao wadamneka uo ose umkundagha, na kumjosa uo uko mnyonge.’

EZEKIELI 23:22

“Kwa huwo ee Oholiba, ini Bwana MLUNGU naghamba huwu: Ola nichawiwusira awo wakundwa wako wawuyakuzamia wilo na oho, nichawireda kufuma kula andu.

EZEKIELI 20:32

Mwaawuyaghamba wei mwakunde mfwanane na wandu wa mbari zima mtaseghee midi na magho. Agho maghesho muko nagho ndeghichaakaia jingi.

EZEKIELI 16:18

Kukawada marwao ghako ghitolelo na kurifinikira; kukawika mavuda na marumba ghapo imbiri yaro.

EZEKIELI 16:8

“Iji nereidieghe kaavui na oho sena, ngakuzighana na kuwona angu kwameria kuzoghua na kuvika ngelo ekundwa; ngaghorua kidambi cha nguwo yapo, ngakufinikira wuduu ghwako; ee, ngakubonyera ilaghano, na oho kukawuya wapo. Ini Bwana MLUNGU naghamba.

JEREMIA 31:32

Ilaghano ijo ndejichaakaia sa iji nerejibonyereghe na weke ndee iji nerewifunyireghe isanga ja Misri ngiwidwa na mkonu; ilaghano japo ijo werejichikanyireghe, hata ngera nerekoghe kwawo sa mumi wawo.

JEREMIA 31:18

“Nasikire wandu wa Israeli wikiruma, ‘Oho kwadiwunjire kwa kudikaba, karakara na ngache isefundishiro dikafundishika; kudiwunje dipate kuaghika, angu oho ko BWANA Mlungu odu.

JEREMIA 2:36

Kwaghalue chia rako mando mengi! Kuchafushwa waya ni Wamisri, sa iji koni korefushiroghe waya ni Waashuru.

JEREMIA 2:28

Da milungu yako iyo korekubonyereghe kumoni iao? Ndeiwukecho ikakaia idimagha kukukira ngelo ya wasi ghwako? Kwa kukaia eko mingi andenyi ya mizi yako ee Juda.

ISAYA 30:16

mkaghamba, “Ndedikunde! Isi dichakimbia kwa farasi redu riwadie iseghe,” na huwo mchakimbia kwa farasi riwadie iseghe, ela awo wimmbingagha wichamnugha kwa shwa-shwa.

ZABURI 116:7

Hora ee roho yapo; BWANA wakubonyere maza ndicha.

JEREMIA 3:1

BWANA waghamba, “Keni mundu ukamsigha mkake, nao ulowolo ni mundu mzima, wadima sena kummburia muka uo? Huwo isanga ndajadalushwa anguwada? Ela oho Israeli kwanughie milungu mingi sa malaya unughagha wandu wengi, sena kookunda kuwuya kwapo.

HOSEA 2:16

“Niko aho uchaniwanga mumi wake sena ndechaaniwanga Baali wake sena.

2 MALAGHO GHA NGELO 28:23

Ukafunya kizongona kwa milungu ya wandu wa Dameshki awo weremsimieghe ukighamba, “Kwa kukaia milungu ya mzuri wa Siria yawiteserie, nani moni nichaifunyira kizongona initesie.” Ela niyo iwurie ikamnona putu chiaimweri na wandu wa Israeli wose.

JEREMIA 44:17

ela isi dichabonya agho malagho dereghibonyerieghe ighemi; kumfukiria marumba Malkia wa Mlungunyi, nesi dichamdungia vizongona vedu venywa, sa iji koni dibonyagha na sa iji koni weke aba werebonyagha, chiaimweri na wazuri wedu na wabaa wedu, andenyi ya mizi ya Juda na chia ra Jerusalemu; na aho derekoghe na vindo vingi na kuwona nicha, hata ndederewonieghe wuwiwi ghungi anduangi.

EZEKIELI 23:12

Ukakundana na Waashuru na kubonya wumalaya na wabaa, na wabaa wa majeshi, masikari ghirwae maswagha ghose, wajoki farasi; wandu wose wa irika wewasira bea ukabonya wumalaya nawo.

HOSEA 1:2

Iji BWANA orezoyagha kudedanya na Hosea oremzerieghe, “Ghenda kulowuo muka mlaki; kupate wana wichaafwanana nao, kwa kukaia iji isanga jeechulwa ni wulaki kwa wundu ghwa kunisigha.”