DANIELI 8:3 - Biblia Ilagho Jiboie Kwa Wandu Wose

³ Ngawusira meso ghapo ngazighana; ngawona bauru iko kimusi mbai na mbai ya moda. Erekoghe na mbembe iwi, rose riko ndacha; ela lwembe lumweri, ulo locheebuka nanyuma, lorekoghe lulacha kuchumba mmbao.

DANIELI 8:3 Referans Kwoze

DANIELI 8:20

“Iyo bauru kuiwonie iko na mbembe iwi, ni wazuri wa Waamedi na wa Pashia.

DANIELI 10:5

Ngawusira meso ghapo na kuzighana, ngawona mundu urushiro nguwo ya kitani, urwae mkowa ghwa dhahabu iboie na ndighi kiwonunyi kwake.

ZEKARIA 6:1

Nao ngazighana ngawona magare ana ghafuma ghadi na ghadi ya mighondi iwi erekoghe ya shaba.

ZEKARIA 5:9

Nao ngawona waka wawi wikiburuka cha kwapo na mawawa ghiwadie ndighi sa gha ichachula. Wikaduka icho kikapu na kuburuka nacho.

ZEKARIA 5:5

Niko uo malaika oreghorieghe nani ukacha sena ukanizera, “Zighana kuwone ngera niki chija chawuyacha.”

ZEKARIA 5:1

Nerezighanireghe sena, ngawona chuo chiburukagha!

ZEKARIA 2:1

Nerezighanireghe andenyi ya mawono ghamu ngawona mundu wawadia kamba epima!

ZEKARIA 1:18

Sena ngawona kwa mawono mbembe ra ng'ombe inya.

DANIELI 7:5

Ngawona nyamandu zima ya kawi ifwanane na kibarabara. Ikawusirwa luwaru lumweri, nayo erekoghe na mbaru idadu momunyi kwake ghadi na ghadi ya maghegho ghake; ikazerwa, ‘Wuka kuje nyama nyingi.’

DANIELI 6:28

Kwa huwo Danieli ukakaia nicha matuku ghose Dario na Koreshi, Mpashia werekoghe wikibonya nguma.

DANIELI 5:31

na Dario Mmedi, uo orekoghe na miaka mirongo irandadu na iwi, ukabonya nguma wulalo ghwake.

DANIELI 2:39

Nyuma ya oho, uchawuka mzuri mzima; na wuzuri ghwake ghuchakaia mtini kuchumba ghwako. Wuzuri ghumu ghwa kadadu, niyo iyo shaba, ghuchaabonya nguma wurumwengu ghose.

JEREMIA 51:11

Kalishenyi mawanu, mmbwade ngao! Ini BWANA narinyavurishire roho ra wazuri wa Wamedi, kwa kukaia makusudi ghapo aighu ya Babuloni ni kutotesha ugho muzi; angu icho nicho kisasi chapo kwa wundu ghwa Hekalu yapo.

ISAYA 44:28

Ni ini nimzeragha Koreshi, ‘Oho kuchabonya nguma kwa wundu ghwapo, na oho kuchakatisha makusudi ghapo;’ ngighuzera muzi ghwa Jerusalemu, ‘Kuchaaghwa; na misingi ya Hekalu ichaaghwa.’”

ISAYA 21:2

Nawonie mawono gha malagho ghikurie: mundu osoka, waawuyasoka; na mtoteshi, waawuyatotesha. Inyo majeshi gha Elamu, kabenyi muzi; inyo majeshi gha Media, ghurughaienyi muzi. Mlungu uchaghumeria wasi ghose ghuredelo ni Babuloni.

ISAYA 13:17

BWANA waghora huwu, “Nichawinyavura Wamedi, wandu wisena bea na feza hata dhahabu, wipate kuikaba Babuloni.

ESTA 1:3

Nao mwaka ghwa kadadu ghwa kubonya nguma kwake, mzuri Ahasuero orewibonyereghe karamu vilongozi na wadumiki wa serikali yake. Majeshi gha Pashia na Media wori gherekoghe, chiaimweri na wabaa wa masanga na wandu wabaa wa ishima.

EZRA 4:5

Wikawihonga wabaa wa Serikali ya Pashia eri wibonye chia etangala wandu wa Juda wisekatishe mpango ghwawo matuku gha Koreshi mzuri wa Pashia, hata kuvikia ngelo ra Dario mzuri wa Pashia.

EZRA 1:2

“Koreshi mzuri wa Pashia waghora huwu: BWANA, uo Mlungu wa mlungunyi, waninekie kubonya nguma wurumwengunyi kose, nao wanilaghirie nimuaghie Hekalu Jerusalemu, iko Juda.

1 MALAGHO GHA NGELO 21:16

Daudi ukawusira meso ghake ukammbona uo malaika wa BWANA, uko kimusi ghadi na ghadi ya mlungunyi na ndoenyi uko na lufu mkonunyi walughorua aighu ya Jerusalemu. Daudi na waghosi wirwae nguwo ra magunia wikaghwa kiwushu-wushu.

JOSHUA 5:13

Nao iji Joshua wavika kaavui na Jeriko, ukawona mndumu uko na lufu imbiri kwake. Ukamghendia na kumkotia, “Welee, oho koko luwaru lodu angu luwaru lwa wamaiza wedu?”

MITALO 24:2

Hata iji wawusira meso ghake, ukawona wandu wa Israeli widungie kambi kichuku kwa kichuku. Roho wa Mlungu ukamchea aighu yake,

WUFUNUO 5:6

Niko neremmbonieghe Mwana wa Ng'ondi uko kimusi ghadi na ghadi ya icho kifumbi cha nguma, na iro nyamandu riko moyo inya, na awo waghosi. Nao orekoghe ukiwoneka seji odebwaghwa; orekoghe na mbembe mfungade, na meso mfungade, nagho ni roho mfungade ra Mlungu ridumilo ndoenyi kose.

WUFUNUO 13:11

Niko ngawona nyamandu zima sena ikijoka kufuma ndoenyi; nayo erekoghe na mbembe iwi sa mwana wa ng'ondi, na kudeda sa choka.

DANIELI 8:2

Ngawona mawono seji neeka andenyi ya muzi m'baa Susa ghuko andenyi ya isanga ja Elamu, niko kimusi kaavui na Moda ghwa Ulai.