DANIELI 4:34 - Biblia Ilagho Jiboie Kwa Wandu Wose

³⁴ Nebukadnezari ukaghamba, “Kutua kwa agho matuku, ini Nebukadnezari nerewusireghe meso ghapo cha mlungunyi, nawurilwa ni akili rapo, ngamkasa Uo-Uko-Aighu-Nandighi, ngamkasa na kumneka ishima uo uduagha moyo kwa kala na kala. Uo wadabonya nguma kwa kala na kala, na wuzuri ghwake ghwadakaia vivalwa na vivalwa.

DANIELI 4:34 Referans Kwoze

WUFUNUO 4:10

awo waghosi mirongo iwi na bana wadaghwa kijimijimi imbiri yake uo uko kidombo kifumbinyi cha nguma, na kumtasa uo uduagha moyo kwa kala na kala. Nawo wakumba virumbu vawo imbiri ya icho kifumbi cha nguma wikibora:

DANIELI 12:7

Nao uo malaika urwae marwao gha kitani, uko nalughu ya machi gha ugho moda ukawusira mikonu yake yose nokoighu cha mlungunyi; ngamsikira ukighema kwa uo uduagha moyo kwa kala na kala kukaia, ichadwa ngelo, na ngelo iwi, na nusu ngelo; na ndighi ra waeli rikameria kuvika kutua kwaro, malagho agho ghose ghichakaia ghakatishwa.

DANIELI 2:44

Matuku gha awo wazuri, Mlungu wa mlungunyi uchawika wuzuri ghusechaanonwa jingi, hata nguma raro nderichaasighilwa mndungi. Wuzuri ugho ghuchachikanya-chikanya agha mawuzuri ghose, na kughimeria; nagho ghuchadua kwa kala na kala.

JEREMIA 10:10

Ela BWANA ni Mlungu wa loli; Uo ni Mlungu uko moyo, na Mzuri wa kala na kala. Ndoe yadasughuswa ni machu ghake, iro mbari ra wandu nderidimagha kurumaghia lubio lwake.

ZABURI 145:13

Wuzuri ghwako ni ghwa kala na kala, na nguma rako radua vivalwa hata vivalwa. BWANA ni mloli kwa malagho ghake ghose, nao ni mucha kwa mabonyo ghake ghose.

DANIELI 6:26

Ini nafunya momu andenyi ya wuzuri ghwapo, wandu wiobuo na kusughisika imbiri ya Mlungu wa Danieli. Uo ni Mlungu uko moyo, uduagha kwa kala na kala; wuzuri ghwake ndeghuchaanonwa jingi; na nguma rake nderiwadie kutua kungi.

DANIELI 4:32

Oho kuchaghenjwa noko kufume kwa wandu, kukaianye na nyamandu ra isakenyi, kuje nyasi sa ng'ombe kwa miaka mfungade, hata kwameria kukufundisha kukaia Uo Uko Aighu Na Ndighi wabonyeragha mawuzuri gha wadamu nguma, na kumneka uo ose ukundagha.”

LUKA 1:33

Nao uchaibonyera nguma nyumba ya Jakobo kwa kala na kala; na wuzuri ghwake ndeghuchaakaia na kutua kungi anduangi.”

DANIELI 5:21

Orefunyiroghe kwa wandu, akili rake rikaghaluswa rikawuya ra nyamandu, ukakaianya na furo na kuja nyasi sa ng'ombe; mumbi ghwake ghukakabwa ni mami kwa mishushure ya mlungunyi hata ukatambua kukaia Uo-Uko-Aighu-Nandighi wabonyeragha mawuzuri gha ndoenyi nguma, na kummbika m'baa uo ose umkundagha.

DANIELI 4:26

Na sa iji erelaghiriloghe kusigha kirimba cha miri yaro, wuzuri ghwako ghuchamangishwa nyuma ya oho kumanya angu Mlungu wabonyagha nguma ndoenyi.

1 TIMOTHEO 6:16

Uo uekeri nuo uko na irangi jisenonekagha, nao wadakaia andenyi ya mwengere ghusedimagha kusoghoderwa, uo mndungi usemmbonie jingi, hata usedimagha kummbona; kwake uo ndejikaie ishima na kubonya nguma kwa kala na kala. Amen.

MIKA 4:7

Wakelemeshero na kuwikwa kula na mzawo, ela nichabonya masighariko ghawo wizoe kwa wuwishi, ela wichawuya mbari mbaa. Kufuma ngelo iyo, nichawibonyera nguma aighu ya Mghondi ghwa Sioni kwa kala na kala.”

DANIELI 4:3

Iro alama rake ni mbaa saki, na mashiniko ghake ghawadie ndighi saki! Wuzuri ghwake ni ghwa kala na kala, nao wadabonya nguma kivalwa hata kivalwa.

KILILO CHA JEREMIA 3:38

Welee, Uo-Uko-Aighu-Nandighi suo ughoragha mecha na mawiwi ghiche?

ISAYA 24:15

Kwa huwo, mnekenyi BWANA wubaa kufuma mashariki, na wandu wikaiagha masanga gha pwani ndewijikase irina ja BWANA, uo Mlungu wa Israeli.

ZABURI 146:10

BWANA, ni mzuri uchabonya nguma kwa kala na kala; Mlungu wako ee Sioni, uchabonya nguma ngelo rose. BWANA ndekaso!

ZABURI 123:1

BWANA, nakuzighana oho kuseriagha kifumbi cha nguma mlungunyi.

ZABURI 121:1

Nazighana cha mighondinyi. Wutesia ghwapo ghufuma hao?

ZABURI 107:31

Ndewimfunyire BWANA chawucha kwa wundu ghwa lukundo lwake lukatie, na kwa wundu ghwa kazi rake ra mashiniko uwibonyere.

ZABURI 102:24

Nani ngaghamba, “Ee Mlungu wapo, kusakenisigha nifo niko mkoo. Ee BWANA, oho kwadua kwa kala na kala.”

ZABURI 92:1

Ni nicha kukufunyira chawucha ee BWANA, kukuboria makaso oho Kuko-Aighu-Nandighi;

ZABURI 10:16

BWANA ni mzuri kwa kala na kala, watasi milimu wichatota isangenyi kwake.

WUFUNUO 11:15

Niko uo malaika wa mfungade ukaikaba tarumbeta yake, kukakaia na chwaka mbaa mlungunyi rikighamba, “Wuzuri ghwa wurumwengu ghwawuya wuzuri ghwa Bwana odu na ghwa Kristo wake, nao uchabonya nguma kwa kala na kala.”

1 TIMOTHEO 1:17

Idana kwa uo Mzuri wa ngelo rose, useidagha, usewonekagha, Mlungu uekeri, ndejikaie ishima na wubaa kwa kala na kala. Amen.

JOHANE 5:26

Sa iji koni uja Aba uko na irangi andenyi kwake, wokoni wamnekie Mwana kukaia na irangi andenyi kwake.

LUKA 18:13

Ela uja mmbwadi wushuru ukakaia kula koni, nao nderekundieghe hata kuwusira meso ghake cha mlungunyi, ela ukakukaba-kaba moni laghenyi kwake ukighamba, ‘Ee Mlungu, kunifue wughoma ini mundu wa kaung'a.’”

DANIELI 7:14

Ukanekwa kubonya nguma, na wubaa, na wuzuri; eri wandu wa mbari rose, na kichuku na viteto, wipate kumdumikia. Kubonya nguma kwake ni kwa kala na kala, na wuzuri ghwake ndeghuchaanoneka anduangi.

ZABURI 107:22

Ndewimfunyire vizongona va chawucha, na kughora malagho gha mabonyo ghake kwa chumbo na kuboilwa.

ZABURI 107:15

Ndewimfunyire BWANA chawucha kwa wundu ghwa lukundo lwake lukatie, na kwa wundu ghwa kazi rake ra mashiniko uwibonyere.

ZABURI 107:8

Ndewimfunyire BWANA chawucha kwa wundu ghwa lukundo lwake lukatie, na kwa wundu ghwa kazi rake ra mashiniko uwibonyere.

ZABURI 50:14

Mfunyire Mlungu vizongona va chawucha, mneke Uo-Uko-Aighu-Nandighi vindo kulaghirie.

ZABURI 9:2

Nichaboilwa na kuzuma andenyi kwako, nichakuboria makaso, ee Mlungu kuko Aighu-Na-Ndighi.

ZABURI 7:17

Nichamfunyira BWANA chawucha, angu ubonyere hachi yake; nichabora makaso kwa BWANA, Uo-Uwadie-Ndighi-Rose.

AYUBU 1:21

Nao ukaghamba, “Neevalwa duu, nani nichafwa duu; BWANA oreninekieghe, nao wawusa; irina jake ndejikaso.”

WUFUNUO 10:6

ukaghema kwa Mlungu ukaiagha moyo kwa kala na kala, uo oreumbieghe mlungunyi na vose viko andenyi yaro, ndoenyi na vose viko andenyi yaro, na bahari na vose viko andenyi yaro; kukaia, ndekuwuyakaia kuchelewa kungi sena.

WUFUNUO 4:9

Hata iro nyamandu riko moyo rikameria kumneka wubaa na ishima na chawucha, uo uko kidombo kifumbinyi cha nguma, uo uduagha moyo kwa kala na kala,

DANIELI 4:2

Nawona nicha kummanyisha alama na mashiniko ghibonyero kwapo ni uo Mlungu Uko Aighu Na Ndighi.

DANIELI 4:36

“Ngelo iyo cheni, iji akili rapo raniwuria, wubaa ghwa wuzuri ghwapo, ishima japo na kuboa kwapo vikaniwuria. Wanjama wapo na wabaa wikanilola, ngawuya na kumangishwa andenyi ya wuzuri ghwapo, na hata wubaa mungi ghukachurilwa aighu yapo.

DANIELI 5:18

Ee mzuri, Mlungu, Uo-Uko-Aighu-Nandighi, oremnekieghe ndeyo Nebukadnezari wuzuri, ndigi na wubaa, na nguma.

DANIELI 7:27

Niko wuzuri, na nguma rose na wubaa ghose ghwa agho mawuzuri gha ndoenyi ghichaanekwa waeli, awo wandu wa Uo Uko Aighu Na Ndighi, na wuzuri ghwawo ghuchakaia ghwa kala na kala. Wabonyi nguma wose wa ndoenyi wichawidumikia na kuwisikira.’

JONA 1:14

Kwa huwo wikamlilia BWANA wikaghamba, “Dakuvoya ee BWANA kusakeditalia ikosa kwa wundu ghwa kum'bwagha mundu usene ikosa, angu niko koni kwawona ikaie huwo ee BWANA.”

WUKUMBUSO 32:4

“BWANA ni mlindiri onyu uwadie ndighi, chia rake rose ni ra hachi; Mlungu onyu ni mloli na mhachi wadabonya agho ghiko gha loli na hachi.

2 SAMUELI 22:31

U Mlungu, chia rake reeka rikatie, malaghiro gha BWANA ghawonyera kukaia gha loli. Uo ni sa ngao kwa wose wikimbiriagha wulindiri ghwake.

1 MALAGHO GHA NGELO 29:10

Mzuri Daudi ukamkasa BWANA imbiri ya ikwanyiko jose ukighamba, “Ee BWANA Mungu wa aba odu Israeli, kukaso kwa kala na kala!

1 MALAGHO GHA NGELO 29:13

Na idana dakuneka chawucha Mlungu odu, na kujikasa irina jako ibaa.

ZABURI 66:7

Wadabonya nguma kwa kudima kwake kwa kala na kala, ukirizighana mbari ra wandu; waleghi wisekujose aighu yake.

ZABURI 111:7

Uo ni mloli na mhachi kwa agho ghose ubonyagha; memu yake yose ni erumirilwa.

ISAYA 2:11

Kuwoneka kwa wubaa ghwa mdamu kuchaserwa, kukujosa kwa wadamu kuchaserwa. BWANA uekeri nuo uchaajoswa ituku jija.

ISAYA 13:11

BWANA waghora huwu, “Nichaghukaba wurumwengu kwa wundu ghwa wuwiwi ghwake, na wawiwi, kwa wundu ghwa wulaghe-laghe ghwawo; kukukasa kose kwa wandu nichakumeria, na kuwisera awo wikudukie.

DANIELI 9:14

Kwa wundu ugho oho BWANA kukakaia tayari kudikaba; angu oho BWANA Mlungu odu koko mhachi kwa kazi rako rose kuribonyere, na isi dikalegha kukusikira.