Югьан 20:16 - Гирами Китаб

¹⁶ – Марʼям! – кӀуру Исайи. Марʼям илдицуру. – Раввуни! (Жугьуд чӀалниинди: «Мялим»), – пну, чӀигъ апӀуру Марʼямди.

Югьан 20:16 Referans Kwoze

Югьан 10:3

Гъаравли дугъаз урар арццру. Марччар дугъан дихнахъ хъпехъуру. Дугъу чан марччариз ччвурариинди кӀуру ва чӀатинди адауру.

Югьан 1:38

Иса кьяляхъинди илтӀикӀуру ва, дурар дяркъну, гьерхру: – Фу ккундучвуз? – Я Рабби! (Му илтӀибкӀиган «Мялим» кӀуру гаф ву.) Уву наан яшамиш шулава? – пну гьерхру дурари Исайихьан.

Ляхнар 10:3

Аьжайиб рябкъбиинди йигъну, сяаьт шубуб шулайи арайиъ, дугъаз Аллагьдин малайик чан улихьна дуфну ачухъди рякъюру. Малайикдира дугъаз: «Корнилий!» – пну, дих апӀуру.

Ляхнар 9:4

Думу жилʼина алдакуру ва чаз кӀурайи сес ебхьуру: – Саул, Саул! Уву Узухъ гьаз хъергнава?

Югьан 6:25

Иса гьюлин тмуну гъирагъдихъ дагну, Дугъаз дурари кӀуру: – Мялим! Уву мина фила гъафунва?

Эвел 22:11

Хъа гьадмуган аьршариан РАББИЙИН малайикди дугъаз дих апӀуру: – Ибрагьим! Я Ибрагьим! – Гьай! – кӀуру дугъу.

Югьан 20:28

– Йиз Агъа ва йиз Аллагь! – гьарайниинди гъапи Фомайи.

Югьан 13:13

Учву Узуз «Агъа», «Мялим» кӀуручва ва гьякьди кӀурира ачва, гьаз гъапиш Узу якьинди гьадму хьузра вуза.

Югьан 11:28

Гьамци дупну, Марфайи, Марʼямдиз жиниди дих дапӀну, кӀуру: – Мялим гьамшваъ а, Дугъу увуз дих апӀура.

Югьан 5:2

Ерусалимдиъ Марччарин латар кӀурушвахь, жугьуд чӀалниинди «Вифезда» (Рягьимлувалин хал) кӀуру саб кахъру гьямам хьайи. Дидихьна элеркнайи гъвандин мурхьлар ккудукьнайи хьуб дегьлиз гъюрайи.

Югьан 3:2

Йишвну Исайихьна дуфну, дугъу кӀуру: – Мялим! Учуз уву Аллагьдихьан дуфнайи Мялим вуйиб аьгъячуз, фицики Уву апӀрусдар аьламатар, эгер Аллагь Увухъди хътайиш, сарихьанра апӀуз даршлийи.

Югьан 1:49

– Агъа! Уву Аллагьдин Бай вува – Израилин Паччагь! – гьевесниинди гъапи Нафанаили.

Лука 10:41

Исайи дугъаз жаваб вуди гъапи: – Гьей Марфа, Марфа! Уву гизаф ляхнарин гъайгъушнаъ ади гъяжяргъюрава.

Матта 14:27

Ва гьадмусяаьт Исайи дурариз гъапи: – ЮкӀв ижми апӀинай, му Узу вуза, гучӀ мапӀанай.

Паччагьлугъар-1 3:10

РАББИ учӀву ва, дийигъну, цӀийикӀултӀан, мугагьназси, дих гъапӀу: – Шамуил! Шамуил! – Йип, Яв лукӀ увухъ хъпехъура, – жаваб туву Шамуили.

Паччагьлугъар-1 3:6

РАББИЙИ хъана Шамуилиз дих гъапӀу. Думу гъудужву, Илийихьна гъафи, ва дугъу гъапи: – Уву узуз дих гъапӀнийва – узу гъафунза. – Ваъ, узу дих гъапӀундайза, йиз бай, – жаваб туву дугъаз Илийи. – Кьяляхъ гъарах, дахъ.

Эвел 45:12

Учвузра, йиз чве Вениаминдизра ичв улариинди рябкъюрачвуз: узу, учвухъди улхурайир, якьин узу вуза.

Эвел 22:1

Гьаму гьядисйирин кьяляхъ сацӀиб вахтналан Заанури Ибрагьим ахтармиш апӀуру. – Я Ибрагьим! – дих апӀуру дугъаз Заанури. – Гьай! – кӀуру Ибрагьимди.

Марк 10:51

– Узкан фу ккундувуз? – гьерхру Исайи. – Мялим, узуз рябкъюз ккундузуз! – жаваб тувру кури.