Колосс 3:16 - Гирами Китаб

¹⁶ Гъит, учвуъ Месигьдин гаф булди яшамиш ибшри. Хъа гьадмуган учвхьан вари фагьум хъади чиб-чпиз аьгъювалар улупуз ва насигьятар тувуз хьибдичвухьан ва, рюгь баркаллагьну абцӀну, Аллагьдиз юкӀв абцӀнайивалин Аллагьдиз мяълийир, тярифнан ва рюгьнан мяълийир апӀуз хьибдичвухьан.

Колосс 3:16 Referans Kwoze

Эфес 5:19

Чиб-чпихъди Мяълийирин китабдиан тярифнан ва рюгьнан мяълийириинди сюгьбатар апӀинай. Ичв юкӀвариъ Агъайиз мяълийир апӀури, Дугъан ад апӀинай.

Югьан 15:7

Хъа эгер Узу учвуъ ва Йиз гафар учвуъ аш, учвуз фу ккундуш, гьадму тӀалаб апӀинай, учвуз вари тувди!

Рим агьларихьна вуйи кагъаз 10:17

Гьаци вуйиган, Ужувлан хабар гъеебхьиган, хъугъвал гъюру. Хъа Ужувлан хабар, Месигьдикан ктибтруган, гъюру.

Югьандин-1 2:24

Сифте бинайиан гъеебхьубдихъди гъузай. Эгер учву, учвуз сифте бинайилан гъеебхьубдихъди гъузиш, Балихъди ва Адашдихъди хьидичва.

Эфес 1:17

Ихь Агъа Иса Месигьдин Аллагьди, адлу Адашди, фагьум туврайи Рюгь ва Чан гъавриъ ахъуз шлу ачмишʼвал учвуз тувуз кӀури, узу сикин дарди ккарагураза.

Якьубдин 3:17

Заълан гъюрайи фагьумлувал, сифте нубатнаъ, марцциб ву, гьацира мясляаьт хурайиб ву, аькьюллуб ву, аьлакьайихъна хруб ву, рягьимлувалихьди ва ужувлан ляхнарихьди абцӀна, диди адмийир ккунидаризна даккнидариз жара апӀдар ва машназ лигдар.

Югьандин-2 1:2

фицики ухьуъ гьякьвал яшамиш шула. Му гьякьвал ухьухъди гьаммишандиз хъайиб ву.

Тимофейиз-2 3:15

Гьеле бицӀидимиди увуз Гирами китабар аьгъявуз, ва гьадму Китабари Месигь Исайихъ хъугъувалилантина уьрхювалихьна гъахру аькьюл тувунвуз.

Колосс 1:9

Магьа гьаддиз, учуз учвкан гъеебхьу йигъхъанмина, учвхъанди гьаммишан ккарагурача. Ккарагруган, Аллагьдин ният учвуз гьубкӀну аьгъю хьуб ва Гирами Рюгьну туврайи гьарсаб фагьумлувалин учву гъаври ахъуб, ккун апӀури шулча.

Ачмиш 5:9

Дурари цӀийи мяъли апӀурайи: «Уву лайикь вува китаб бисуз ва дидлан печатар алдагъуз, гьаз гъапиш, Уву духьну гъурбан, Яв ифдиинди Уву Аллагьдиз адмийир гъадагъунва гьарсаб тухмиан ва чӀалнаан, гьар жюре миллетарикан ва халкьарикан.

Югьандин-1 2:27

Хъа учвуз кайиб: Месигьдихьан учвуз дурубкьнайи багъиш учвухьди гъубзди, ва, гьаддиз, учву, шлин-вуш дарсариз ккилигурайидар дарчва. Гирамирихьан учвухьна гъафи Рюгьну учвуз гьякьвалин дарсар кивра, ва гьич саб вахтнара Дугъу учвуз кучӀал апӀидар. Гьаци вуйиган, Гьадгъу улупурайибси апӀинай, ва Аллагьдиъди гъузай.

Колосс 4:6

Гъит, ичв сюгьбатар гьаммишан кабалгрудар ва фагьумлудар ишри ва, гъит, гьардиз лазим вуйи жаваб бихъри.

Эфес 5:17

ПчӀу юкӀв ади махьанай, хъа Агъа Аллагьдин ният фу вуш, гъавриъ ахъуз чалишмиш йихьай.

Якьубдин 5:13

Учвкан фуж балайикк ккахъиш, гъит ккарагри, фуж шадвали ацӀнаш, гъит Аллагьдиз мяълийир апӀри.

Титдиз 3:6

Дугъу Чан Рюгь, ухьу Уьрхруриланмина – Иса Месигьдиланмина ухьʼина, кӀюгъялвал адарди, улузну.

Коринф-1 14:26

Фу вухъа, гъардшар? Учву уч шлуган, гьарсарин фу-вуш кӀуруб шуличв: Аллагьдиз мяъли, насигьятнан гаф, Аллагьди ачмиш гъапӀуб, чӀалариинди улхуб, ясана думу чӀаларин гъавриъ ауб – гъит варидиз му вари мюгькамвализ ибшри.

Якьубдин 1:5

Эгер учвкан шлиз аькьюл гьубкӀрадарш, дугъу, гьяйиф ктарди багъиш апӀру ва камивалар дарагру Аллагьдикан тӀалаб апӀри ва Аллагьди дугъаз тувди.

Колосс 1:28

Ари Гьадгъукан учвуз, Аллагьдин улихь Месигьдихъди гьуркӀну дугъужвуз шлуси, учхьан удубкьру фагьумлувалиинди, насигьят туври, аьгъювалар улупури, хабар дебккрача.

Паччагьлугъар-3 3:28

Вари Израилиз паччагьди адабгъу думу къарарикан гъеебхьиган, дурари паччагьдиз гьюрмат апӀуз хъюгънийи, гьаз гъапиш дугъаз диван апӀуз Заанури аьяндарвал тувнайивал гъябкънийи.

Ачмиш 15:3

Дурари, Аллагьдин гъуллугъчи Мусайин мяъли ва Ччилан мяъли апӀурайи: «Зурба ва аьжайиб вуяв ляхнар, Агъа Аллагь, вари хилиъ Дибиснайир! Дугъри ва гьякь вуяв рякъяр, халкьарин Паччагь!

Югьандин-1 2:14

Узу учвуз, бицӀидар, Адаш аьгъю гъахьунчвуз, кӀури, гъибикӀнийза. Узу учвуз, абйир-бабар, дюнʼя-бина хьайиз Айир аьгъю гъахьунчвуз, кӀури, гъибикӀнийза. Узу учвуз, жигьилар, кьувватлу вучва, Аллагьдин Гаф учвуъ яшамиш шула ва Писубдиин гъалиб гъахьунчва, кӀури, гъибикӀнийза.

Тимофейиз-1 6:17

Гьаму дюнʼяйиин девлетлу вуйидариз йип: фурсар дарапӀри ва чпин девлетарихъ йирфар хътричри – думу мюгькам вуйиб дар. Уьмрикан кьукь ктабгъури яшамиш хьуз вари лазим вуйиб артухъра кади тувру Аллагьдихъ йирфар хъирчиш, хъа ужу ву.

Фессалоник-2 3:15

Дугъахъди, душмнихъдиси, махьанай, хъа, гъардшизси, гъавриъ шлу гафар йипай!

Фессалоник-1 4:18

Гьаци вуйиган, гьамцдар гафариинди чиб-чпик юкӀв капӀри гъузай.

Коринф-1 14:15

ГьапӀза? Узу рюгьниинди ккарагидиза, йиз фикрииндира ккарагидиза. Рюгьниинди Аллагьдиз мяълийир апӀидиза, йиз фикрииндира мяълийир апӀидиза.

Матта 26:30

Хъасин Аллагьдин тярифназ мяъли дапӀну, дурар Елион дагъдиз удучӀвуру.

Насигьятар 14:8

Аьяндрин аькьюл чан жилгъайин гъавриъ айивал ву, хъа абдлар чпин ахмакьвали алдатмиш апӀура.

Рим агьларихьна вуйи кагъаз 15:14

Йиз гъардшар, учву ужувлу ацӀнайиб, учвуз гизафубдикан аьгъю гъабхьиб ва сар-сариз учвхьан насигьятар тувуз шлуб якьинди аьгъязуз.

Лука 2:51

Хъа Иса дурарихъди Назаретдиз гъюру ва мютӀюгъ шулу. Дугъан дадайи вари гьаму ляхнар чан кӀваъ уьрхюри шуйи.

Ачмиш 19:10

Узу, му малайикдиз икрам апӀарза кӀури, дугъан ликариккна ис алахъза, хъа дугъу узуз гъапи: «Лиг, мици мапӀан! Узура, увуси ва яв гъардшарси, Исайикан шагьидвал апӀурайи лукӀ вуза! Аллагьдиз икрам апӀин! Гьаз гъапиш гьаму пайгъамбарвалин гафарин мяна Исайикан шагьидвал апӀуб ву».

Ачмиш 14:3

Дурари тахтнан улихь ва юкьрид гьяйванатарстаринна къарна юкьур аьхюдарин улихь цӀийи мяъли апӀурайи. Думу мяъли, дюнʼяйин тухмигъян гъядягънайи гьадму варжна ягъчӀвурна юкьуд агъзур касдихьантӀан гъайри, сарун гьич сарихьанра кӀваъланди дубгъуз шулдайи.

Насигьятар 18:1

Адмийирихьан жаради яшамиш шулайири чаз ккуниб апӀура, тувру насигьятар гьадаури тина.

Фессалоник-1 1:8

Гьамус учвлантина Агъайин гаф неинки Македонияйиъна Ахаяйиъ рабгъура, хъа гьацира – Аллагьдихъ учву хъугъра, кӀуру хабар варишвариз дубшна. Ва сарун дидкан фукӀара пуб учуз алабхъурадар.