Эфес 1:5 - Гирами Китаб

⁵ Чан хушнииндина ниятниинди, Иса Месигьдилантина ухькан Чаз веледар ктауз улихьмиди кьаст дапӀнади гъахьну.

Эфес 1:5 Referans Kwoze

Эфес 1:11

Гьадгъахъди саб гъахьиган, Аллагьди Чан вари хушниинди ва ниятниинди улихьмиди апӀурайи ниятнаъ айиси, учу ктагъну.

Югьандин-1 3:1

Ихь Адашди ухьуз Чан – Аллагьдин веледар пубʼинди фукьан зурба вуйи масанвал улупнуш, учву фикир апӀинай. Ухьу гьаци хьузра вухьа! Му дюнʼяйиндари ухьу кьабул апӀурадар, гьаз гъапиш дурари Думу кьабул гъапӀундар.

Югьан 1:12

Учв кьабул гъапӀдариз ва Чан ччвур дибисну хъугъдариз Дугъу дурар Аллагьдин веледар хьувал багъиш гъапӀну.

Рим агьларихьна вуйи кагъаз 8:23

Неинки вари халкь дапӀнайиб, хъа гьацира Рюгьну ацӀну цӀийи уьмур ккебгъу ухьура вари ккилигурайхьа. Дидлан гъайри, Аллагьди ухьу Чан веледарди гъадагъур, кӀури, ва ихь жанар азад апӀур, кӀури, айтӀанзина аьзабнаъ ккилигури айхьа.

Галат 3:26

Учву вари Месигь Исайихъ хъугърувалилантина Аллагьдин баяр вучва.

Коринф-2 6:18

«Узкан ичв Адаш хьиди, ва учвкан Йиз баярна шубар хьиди», – кӀура вари Чан хилиъ айи Агъайи.

Ачмиш 21:7

Гъалиб гъахьириз Узхьан гьаму вари ирсди рубкьиди. Гьацириз Узу Аллагь хьидиза, хъа думу Узуз бай хьиди.

Эфес 1:9

Дугъу ухьуз Чан хушниинди Чан ниятнан сир ачухъ гъапӀну. Думу ният Месигьдиланмина арайиз хуз ккайиб вуйи.

Югьан 11:52

ва неинки гьаму халкьдихъанди, хъа гьацира вари дюнʼя вуйибси дарагънайи Аллагьдин веледар сабвалихъна хпан бадалира.

Фессалоник-2 1:11

Гьаддиз Аллагьди Чан дих апӀбаз учву лайикь хьпан бадали ва Чан кьувватниинди вари ичв ужудар ниятар ва хъугъувалин ляхнар тамам апӀбан бадали, учу учвхъанди гьаммишан ккарагурира шулча.

Лука 10:21

Гьадму сяаьтна Иса Аллагьдин Рюгьналан шадвали ацӀру ва кӀуру: – Адаш, заваринна жиларин Агъа! Аьяндрарихьанна аькьюллударихьан гьитӀибкӀнайиб бицӀи касариз ачухъ апӀбаз Увуз чухсагъул! Ав, Адаш, Увуз думу Яв ужувлан ният гьаци дубхьну ккундувуз.

Коринф-1 1:21

Аллагьдин зурба фагьми дебккганси, гьаму дюнʼяйин фагьмихьан Аллагь аьгъю апӀуз дархьиган, Хабарну дебккрайи «ахмакьвалихъ» хъугъдар уьрхюз Аллагьдиз ккун гъабхьну.

Югьан 20:17

– Узук мукучан! – кӀуру дугъаз Исайи. – Узу сабан Йиз Адашдихьна хъадакнадарза. Уву, душну, Йиз чвйириз: «Узу Йиз Адашдихьна ва ичв Адашдихьна, Йиз ва ичв Аллагьдихьна хътакураза», кӀура, йип.

Матта 11:26

Ав, Адаш, Увуз думу Яв ужувлан ният гьаци дубхьну ккундувуз.

Лука 11:32

Гъиямат йигъан Ниневияйин агьалйир му наслин адмийирин дивандиз дуфну, дурарин тахсрар ачухъ апӀиди, фицики Юнусди улупу аьгъювалариинди дурари чпин гунгьар гардандиъ гъидисну. Хъа магьа мушвахь ЮнустӀан аьхюр Вуйир хьа!

Филипп 2:13

Фицики иллагьки Аллагьди, Чаз ккуниб апӀбан бадали, ичв тямягь арайиз хуру ва ляхнарихъ хъаъру.

Коринф-1 1:1

Иса Месигьдин вакил хьуз Аллагьди дих дапӀнайи Павелихьан ва Сосфен гъардшихьан

Матта 1:25

Амма Марʼямди чан сарпи Бай апӀайизкьан, Юсуф дугъахь гьучӀври гъахьундар; хъа Бай гъашиган, Дугъʼин Иса кӀуру ччвур иливуру.

Лука 12:32

ГучӀ мапӀанай, бицӀи лиж! Фицики ичв Адашди учвуз Чан Паччагьлугъ тувуз ужуб кьаст дапӀна.

Ляхнар 13:48

Му гафар гъеерхьиган, жугьуд дарудар шад гъаши ва дурари Агъайин гафнан тяриф апӀуз хъюгъю; ва гьаргандин уьмриз кадагънайидар хъугънийи.

Колосс 1:19

фицики Аллагьдиз, вари тамамвал Гьадгъаъ ади хьуб ккун гъабхьну.

Жугьдариз 2:4

Агъа Исайин Хабар гьякь вуйивал Аллагьди аьжайиб лишнариинди, аьламатариинди, гьар жюреди ачмиш шлу кьудратниинди ва Чан ниятниинди Чаз ккунириз тувру Гирами Рюгьнан багъишар гьаъбиинди тасдикь гъапӀну.