YAKOƁU 2:8 - Ha`bari Ndjema ya I Maore

⁸ Ɓila shaka neka musutsimidza isharia ya shiufalume yalawana na uMuangishio amba: «Utsov̄endza munyaho mauri ɗe iwawe yaho», v̄av̄o musufanya ndjema.

YAKOƁU 2:8 Referans Kwoze

MAGALATWIYA 5:14

Mana piya iSharia itsimidziha hari mwa urongozi moja, ne ɗe unu: «Utsomuv̄endza munyaho mauri ɗe inamuna udziv̄endzao wawe monyewe.»

YAKOƁU 2:12

Namulaguwe na urendra shi watru watsohukumulwao ulawana na sharia ya shi unafasi.

MATIYO 22:39

Na ya v̄ili tsini ilio sawa na ya handra ile: ‹Utsomuv̄endza munyaho mauri ɗe iwawe yaho.›

MAGALATWIYA 6:2

Namutrihane udziro wanyu na wanyu, na v̄av̄o mutsotsimidza iSharia ya Kristi.

1 MONYE 2:9

Ɓadi wanyu kaɓila yatsahulwa, Matolezi-Masadaka ya shiufalume, nishani ndzitwaharifu, umati Mungu adziparia, ile mujudze yimisifio ya Uwo amuhirani ulawa shidzani mwendre hari mwa iheu ndzitukufu yahe.

YAKOƁU 1:25

Ɓadi mutru aangaliao ha makini iSharia yendza ukamilifu iv̄ingiao unafasi, amwesa aendreleao nayo, tsi amba ha uivulishia na uiɗela, ɓadi ha uitria ndziani, mutru uwo atsoɓarikishiha hari mwa izo atsofanyao.

1 MATESALONIKA 4:9

Hari mwa yahusu uv̄endzana wa shi unanya, tsi paka muangishiwe, mana wanyu-wanyu musomo ha Mungu amba muv̄endzane wanyu na wanyu.

MAFILIPI 4:14

Ɓadi mufanya ndjema iv̄o mwarenga fuvu hari mwa usongefu wangu.

MATIYO 25:23

Sa ile murumisa wahe amuambia: ‹Ufanya fetre, wawe murumizi mwema, muaminifu; uonesa uaminifu hari mwa trongo shashi, v̄av̄o nitsohudhwaminisha nyengi. Ko, uje ufurahi na murumisa waho.›

YAKOƁU 2:19

Usuamini amba Mungu moja? Usufanya fetre. Mazetwani uiamini wajau, tsena yasudridrima.

MATIYO 25:21

Sa ile murumisa wahe amuambia: ‹Ufanya fetre, wawe murumizi mwema, muaminifu; uonesa uaminifu hari mwa trongo shashi, v̄av̄o nitsohudhwaminisha nyengi. Ko, uje ufurahi na murumisa waho.›

MATIYO 7:12

Ɓasi piya izo mutsahao watru wamufanyiyeni, wanyu wajau namuwafanyiyezo. Iyo ɗe imana ya iSharia na marongozi ya yimitrume.»

MAROMU 13:10

Mutru av̄endzao munyahe, waye kamurendre mbovu. Ha izo uv̄endza, iyo utsimidza iSharia.

YAKOƁU 4:11

Mwasusingidziane wananyangu. Mutru asingidziao mwananya wa shi uaminifu au anamuao mwananyahe, asusingidzia iSharia na uinamua. Na neka usunamua iSharia, v̄av̄o kusi mutru aiɗungao, ɓadi wa munamuzi.