TITUSA 3:13 - Ha`bari Ndjema ya I Maore

¹³ Fanya djitihadi umusaidiye Zenasu, mutaãlamu wa iSharia, v̄umoja na Aɓulusu, na izo zawalazimu hari mwa umusafara, ile wasukosewe na itsokao yotsi.

TITUSA 3:13 Referans Kwoze

MAV̄INGIZI-RISALA 18:24

V̄uka Muyahudi wa shi Aleksandriya akohiriwa ha lidzina la Aɓulusu, aka awaswili Efeso. Aka muhodari wa urongozi, amwesa akana ujuzi muɓole hari mwa uMuangishio Mutwaharifu.

MATIYO 22:35

Moja hari mwawo, aka fundi wa Sharia, amudzisa suala lini ha utsaha amulimbiye utra:

MAV̄INGIZI-RISALA 28:10

Wariv̄a sheo ha uwengi, tsena wakati rakolawa, waritamania izo zaka zarilazimu.

1 MAKORINTIYO 16:11

Ɓasi v̄wasuke ata mutru amudharau. Namumuendrese ha usalama umusafara wahe ata aje anipare, mana nisumulindra v̄umoja na uwananya waaminifu.

MAROMU 15:24

nisutumainia nimuoneni wakati nitsokao hari mwa musafara wa uendra Espanya. Tsina tama ya uv̄ira nimuoneni, nipare musada wanyu wa wami uendrelea na umusafara, ɓaanda nitsojiv̄iwao v̄umoja na wanyu hari mwa mwana muda.

MAV̄INGIZI-RISALA 21:5

Ɓadi suku saɓa ukoma yazo, rirenge indzia raha, rilawa. Wariɗungu piyawo, v̄umoja na uwatruwashe na uwana, ata v̄ondze na liɗago. Rivundzu malondro tsandzaleni, rifanya mamilio.

LUKASI 14:3

Ɓas, Insa arenge umurongo, aambia mataãlamu wa Sharia na yaMafarisayo: «Hali iruhusiwa mutru uzihira Suku ya Uv̄umuzi, au kayaruhusiwa?»

LUKASI 11:52

Maondo hanyuju, wanyu mataãlamu ya Sharia! Mana mutowo umufunguo wa ujuzi; wanyu-wanyu kamwangia, amwesa muwazia wale wakotsaha wangiye.»

LUKASI 11:45

Sa ile v̄wa mutaãlamu wa Sharia arenga umurongo, amuambia: «Fundi, wamorongoa namuna iyo, v̄av̄o wasi ne usurirema.»

LUKASI 10:25

Ɓas, v̄uhimi mutaãlamu wa Sharia, amuambia Insa ha umudjereɓu: «Fundi, trini ɗe yalazimu niifanye ile nipare uhayati mukamilifu?»

LUKASI 7:30

Ɓadi watru wa ishama ya Mafarisayo na wajuzi wa sharia, ha iv̄o wahara uɓaĩshiwa na waye, v̄av̄o kawakuɓali yamav̄endzeleo ya Mungu hawoju.

MAV̄INGIZI-RISALA 15:3

Ɓas, wav̄elehwa na iDjama Ndziwaminifu, wav̄iria iFonikiya na Samariya ha ujudza umuzingio wa roho wa zinishani zangina, ata wafurahisha halisi piya uwananya wa shi uaminifu.

MAV̄INGIZI-RISALA 19:1

Wakati Aɓulusu aka Korintiyo, Ɓaulusu awaswili Efeso, ɓaanda av̄iria yimikaɓala ya uju ya iAziya. Oho, aonana na ɓaãdhwi ya maswihaɓa.

1 MAKORINTIYO 16:12

Yahusu umwananya Aɓulusu, tsimutria ɓari hodari aje amuoneni v̄umoja na uwananya waaminifu, ɓadi ha kweli kayaka mav̄endzeleo yahe waye uifanya av̄asa; atsoja wakati atsoparao inafasi.