1 MAKORINTIYO 7:17 - Ha`bari Ndjema ya I Maore

¹⁷ Ɓadi kula mutru naẽshi na lifungu Raɓi amudjaãlia, ha ihali aka uhiriwa yahe na Mungu. Iyo ɗe niãmurishao hari mwa piya ziDjama Ndziwaminifu.

1 MAKORINTIYO 7:17 Referans Kwoze

1 MAKORINTIYO 4:17

Iyo ɗe imana nimuv̄elesheaoni Timutausu alio amba hari mwa uv̄umoja na Raɓi, waye mwana wangu muv̄endzewa, tsena muaminifu. Atsomunahanidzani maendreleo yangu hari mwa uv̄umoja na Kristi-Insa, mauri ɗe inamuna niyasomedzao kula v̄ahanu moni na kula Djama Ndziwaminifu.

1 MAKORINTIYO 7:24

Kula moja wananyangu, naɓaki mbeli za Mungu ha ihali aka uhiriwa yahe.

2 MAKORINTIYO 8:18

Risuv̄eleha v̄umoja na waye umwananya wa shi uaminifu alio amba isifa yahe ha izo afanya ha tanafu ya iIndjili ienea hari mwa piya ziDjama Ndziwaminifu.

2 MAKORINTIYO 11:28

Wala tsisurongoa zaɓaki, amba ushahilifu wa kula suku wangu, ihamu yangu ha piya ziDjama Ndziwaminifu.

1 MAKORINTIYO 7:18

Mutru aka atahiriwa uhiriwa yahe, naɓaki na utahiriwa|utahiri yahe; mutru kaka atahiriwa uhiriwa yahe, asudzitahirise.

1 MAKORINTIYO 7:7

Natsov̄endza watru piya wake mauri ɗe wami. Ɓadi kula mutru asupara ulawa ha Mungu neema yahe yamuhusu, moja ini, na wangina ile.

1 MAKORINTIYO 14:33

Mana Mungu tsi Mungu wa fidjo, ɓadi Mungu wa utrulivu. Mauri ɗe hari mwa piya ziDjama Ndziwaminifu za watwaharifu,

MATIYO 19:12

Mana v̄wa ɓaãdhwi amba kawashindri ulola, ha inamuna yawo wadzalwa; v̄wa kawashindri ulola ha siɓaɓu ya shitrendro wanadamu wawafanyia; ɓaãdhwi iv̄o, wadzifanya wao wenyewe amba kawasulola, ha siɓaɓu ya Utawalizi wa Monyewe ziMbingu. Mutru ashindrao aɗunge trongo iyo, naiɗunge.»

1 MAKORINTIYO 16:1

Yahusu umutsango wa waaminifu, namufanye wajau mauri ɗe inamuna naambia ziDjama Ndziwaminifu za Galatwiya.

1 MAKORINTIYO 10:32

Musuke siɓaɓu ya ukwalisa, tsi ha Magiriki, wala tsi ha Mayahudi, wala tsi ha iDjama Ndziwaminifu ya Mungu,

1 MAKORINTIYO 11:16

Neka v̄wa mutru atsahao ashindrane na trongo iyo, wasi karisina udzevu wangina, ɓila tsena ziDjama Ndziwaminifu za Mungu.

1 MAKORINTIYO 11:34

Neka v̄wa aliona ndza, naɗye hahe, ile ungulidzana yanyu, isumuv̄ingiyeni hukuma. Zaɓaki, nitsozirengeledza wakati nitsowaswilio.

MAGALATWIYA 1:22

Na v̄av̄o tsakojulihana sura na ziDjama Ndziwaminifu za Yudeya zilio ha Kristi.

1 MATESALONIKA 2:14

Kweli amba wanyu wananya wa shi uaminifu mufanyiha wanyawe na ziNgudjama Ndziwaminifu za Mungu ziliona uv̄umoja na Kristi-Insa oho Yudeya. Mana muondesheha mihononi ha wanyanyu wa tsi moja, trongo ilio ɗe wiyo-wiyo ha wao waondesheha mihononi ha wanyawo Mayahudi.

2 MATESALONIKA 1:4

Ha izo, risudziɓua ha siɓaɓu ya wanyu hari mwa ziDjama Ndziwaminifu za Mungu, ha ustahamilifu wanyu na uaminifu wanyu hari mwa piya matreso yanyu na maondo muyav̄irao.