1 MAKORINTIYO 10:23 - Ha`bari Ndjema ya I Maore

²³ V̄wa warongoao: «Piya ziruhusiwa.» Kweli, ɓadi tsi piya ziliona faida. «Piya ziruhusiwa», ɓadi tsi piya ɗe ziendresao mbeli.

1 MAKORINTIYO 10:23 Referans Kwoze

1 MAKORINTIYO 6:12

V̄wa warongoao: «Tsiruhusiwa piya.» Ɓadi tsi piya ɗe ziliona mana na mutru. Kweli amba tsiruhusiwa piya, ɓadi hanguju wami, tsitsodzilisha natawaliwa na itsokao yotsi.

1 MAKORINTIYO 8:9

Ɓadi namudzitahadharishe ile unafasi wanyu usuke siɓaɓu ya ukwalisa wao kawasi wahodari.

MAEFESO 4:29

Hanyoni hanyu v̄usulawe ata urongozi movu, ɓadi urongozi mwema utsoshindrao wakati walazimu, ufayidishe na uv̄ingia rehema wao waukiao.

1 MATESALONIKA 5:11

Ɓasi ha izo, namutriane ɓari na uhodarishana, mauri ɗe inamuna madza muifanyao.

MAROMU 14:15

Neka ha siɓaɓu ya shahula usutria utungu roho ya mwananya muaminifu, v̄av̄o kusuɗunga tsena indzia ya mahaɓa. Usutsonge ha ishahula yaho uangamifu wa uwo alio amba Kristi afu ha umukomboa.

1 MAKORINTIYO 14:17

Kweli amba v̄ale usuhimidia ha uzuri tu, ɓadi munyaho ule kasuhodarishiha.

1 MAKORINTIYO 14:26

Ɓasi rifanye jeje, wananyangu? Kula mwamongulidzana, moja atsojua akane himbo, moja musomo, moja trongo av̄enuliwayo, moja luha ashukidziwa, na wangina faswiri. Piya nazifanyihe ha uendresa mbeli idjama.

1 TIMUTAUSU 1:4

Waambiye tsena wasudzishapise na mahadisi yatrungwa na zingurudhwa kazina mwiso za wadzaɗe, trongo ziv̄ingao hari mwa mashindrano, ɓadi tsi hari mwa umupango wa Mungu uparihanao ha uaminifu.

1 MAKORINTIYO 14:12

Ɗe namuna iyo wanyu wajau. Rangu muliona huɓa mudjaãliwe neema za iRoho, namuzitsahe ha uwengi, ɓadi ile ha uhodarisha iDjama Ndziwaminifu.

1 MAKORINTIYO 8:1

Ɓasi yahusu nyama zatolewa sadaka masanamwe, risujua amba piyasi rina ujuzi. Ujuzi, uwo uv̄inga mutru adziɓuwe, ɓadi mahaɓa, yao uhudza.

2 MAKORINTIYO 12:19

V̄av̄o ukiri uka amba wakati unu piya musufikiri amba risudzidifaĩ mbeli zanyu. Ɗe mbeli za Mungu hari mwa uv̄umoja na Kristi ɗe rilaguao. Na piya izo wav̄endzewa, ɗe ha umuhodarishani.