Yohana 20:19 - Imuuma Eehya

¹⁹ Abheegha abha Yëësu bhaaikomaini hamwë mu-nyumba, omoghoroobha ughwa urusikö ruyöruyö. Bhakasiika-ho ebhesaku, ko bhoora bhoobhohanga abhatangati abha Abhayahudi. Mbe, mbaatöökëëyë Yëësu aimërëëyë ghatëghatë iyaabho, akabhatëëbhya igha, “Mobhe na omorembe bhamurë.”

Yohana 20:19 Referans Kwoze

Yohana 20:26

Hano sinsikö monaane syaahëtirë, okanyoora abheegha abha Yëësu bhaikomaini ghwiki mu-nyumba. Toomasi wonswe ho yaarë. Ebhesaku mbyaarenga bhisiikirwë, kamwë igho, bhakatookera Yëësu areemerra ghatëghatë iyaabho, akabhakëërya igha, “Mobhe na omorembe!”

Yohana 14:27

Motame na omorembe, omorembe ughwane ghuyö nkobhahaana, teghonga kya omorembe ughwa ko-kebhara kono hë. Motakaabhaabhayera mo-senkoro isyënyu, kora motakoobhoha kyokyonswe keera.

Yohana 20:21

Yëësu akabhakëërya ghwiki igha, “Mobhe na omorembe bhamurë. Kya bhono Taata Waryobha yaantoma, ni-ighoigho na öni wonswe nkobhatoma ko-kebhara kono.”

Abhaëfësö 2:14

Ko bhoora Yëësu Kiristo uyö yaatohaana omorembe, akatokora bhëëtö bhano twaarë amakomo abhërë, Abhakyaro na Abhayahudi, tobhe ikomo imwë. Yaakörrë igho ku ukuruusya-ho ekerebherro keno kyaare-ho na okotemora urughito urwa ubhubhisa rono rwaatwahokanianga.

2 Abhatësarönikë 3:16

Bhoono, Omonene Yëësu umwene, ömösëmöri uwa omorembe, abhahaanenga omorembe senkaagha syonswe igho, ko-senshera syonswe igho. Abhe hamwë na bhëënyu bhonswe igho.

Yohana 7:13

Kasi tiyaare-ho ömöntö ono yaaghambirë Yëësu harabhurabhu igho, ko bhoora mboobhohanga abhatangati abha Abhayahudi.

Maariko 16:14

Ekahekera-ho enkaagha, Yëësu akabhooshokera abheegha abhaaye ikömi na ömwë, hano bhaaryanga ibhyakorya. Akabhahamera ko bhoora bhaangirë ukukumya, ko bhono senkoro isyabho, syaangirë okoghoota amangʼana ghano bhaatëëbhiibhwi na bharikyabho bhano bhaamörööshë igha m-möhöru, aryökirë ukurwa mo-bhaku.

Okohonyora 1:4

Öni Yohana, ritashandighi reno, m-bëënyu nkwandekera abhasoorani abha Yëësu abha amakanisa muhungatë ghano gharëngë ikyaro ikya Asia Enke. Munyoore örööbhö na omorembe ukurwa ku-Waryobha ono aaho, ho yaarë ukurwa okosemoka, nanyabhoono ho arë, na ukurwa ku-Miika muhungatë bhano bharëngë bhöröngë ubhwa ikitumbë ikya ekekama,

1 Abhakörintö 15:5

Akabhooshokera Keefa, ghwiki akabhooshokera abhatomwa abhaaye ikömi na bhabhërë.

Yohana 16:33

Mbatëëbhëri amangʼana ghayö, okore mobhe na omorembe ko bhoora moona öbhömwë na öni. Moona inyanko ko-kebhara kono, kasi motakaakwa emetwe, ko bhoora öni nabhaaha ekebhara keno.”

Abhaëbhuraania 7:2

Mbe, Ibhurahimu akahaana Mërikizëdëki ikitweno ikya ikömi, ikya ëbhëntö bheno yaanyöörrë mu-riihë. Mbe, ensonga iya mbere iya iriina Mërikizëdëki ni-igha, “Omokama uwa heene,” ghwiki arabherekerwa igha, “Omokama uwa Sarëëmu,” ensonga iyaaryo ni-igha, “Omokama uwa omorembe.”

Abhafiripi 1:2

Örööbhö na omorembe ukurwa ku-Waryobha Taata uwëëtö, na ko-Monene uwëëtö Yëësu Kiristo bhebhe hamwë na bhëënyu.

Abhaëfësö 6:23

Abhakumya bharikyëtö, Waryobha Taata uwëëtö na Omonene uwëëtö Yëësu Kiristo bhabhahaane omorembe. Bhaghere mohanshane, kora möghëndërri okobha na umukumo ku-Yëësu Kiristo.

Abharuumi 15:33

Waryobha ono akobhahaana omorembe, abhe hamwë na bhëënyu bhonswe igho. Amina.

Yohana 16:22

Ni-ighoigho kora na bhëënyu bhonswe mobhaabhayëëyë, kasi nendaashe mmaahane ghwiki na bhëënyu, mushomerwe mo-senkoro isyënyu. Taaho ömöntö araabharuusiri-ho ukushomerwa ukwënyu kuyö.

Mataayo 18:20

Ko bhoora igha, hano bhasikana hamwë abhantö bhabhërë handë bhatatö ku iriina iryane, öni wonswe kunyoora örë hamwë ndë nabho.”

Mataayo 10:13

Hano abhantö abha ku-mughi kuyö bharaabhaikërri, obhongʼoore ubhwa omorembe mboraabhaikarre. Kasi hano bharaange okobhaikërrya, Waryobha tangʼoore abhantö abha ku-mughi kuyö hë.

Yohana 21:1

Hano ghayö ghaahööyë, Yëësu ghwiki akabhooshokera abheegha abhaaye haangʼë na inyansha iya Tibhëëria, amangʼana ghayö, ni-igha ghaabhaayë.

Yohana 21:14

Ruyö nu-urwa katatö rwaarë, urwa Yëësu okobhooshokera abheegha abhaaye, ukurwa roora Waryobha yaamuryökëri ukurwa mo-bhaku.

Amangʼana agha Abhatomwa 1:3

Ku-sinsikö merongo ene ukurwa rono yaaryökirë, yaabhooshokeranga abhatomwa abhaaye, kö ebhemanyërryö ibhyaru, akabhöörökya heene igha m-möhöru. Akabha arabhëëghya amangʼana agha Obhokama ubhwa Waryobha.

3 Yohana 1:14

Keno nkwitengʼera ni-igha, m-böngö ndaabhataarre. Hayö ho torebha hamwë tushumaashe.