Abhafiripi 4:8 - Imuuma Eehya

⁸ Mbe, bhoono abhakumya bharikyëtö, amangʼana agha obhoheene, amangʼana ghano ghaingʼarëëyi okosookwa, amangʼana agha heene, amangʼana ghano ghataraaishooghana na obhoghogho, amangʼana ghano ghakushomera abhantö na amangʼana amaiya, amangʼana ghano ghaingʼarëëyi, na amangʼana ghano abhantö bhakukumya, ghayö ngo amangʼana agha ukwitegherra mo-metwe ighyënyu.

Abhafiripi 4:8 Referans Kwoze

Yaakobho 3:17

Kasi, obhongʼaini bhono bhukurwa ku-Waryobha, m-buuya, mboona omorembe, na obhohaabhu, nkwitegherra bhörë bhuuya amangʼana agha abhantö. Obhongʼaini bhuyö, nkokora bhörë amangʼana amaiya, kora mboona ikyabhera, tebhoona ekeroterro, handë ubhwahöri ubhwa abhantö, handë ubhwihunaania.

Tiito 2:7

Uwe Tiito, ko amangʼana ghonswe igho, obhe ëkërëngyö ikya abhantö ökörëngya okokora amangʼana amaiya. Obhe ömöntö uwa obhoheene na ono onaghirë kö-mëëghyö aghaaho.

2 Abhakörintö 8:21

Keno tukutuna, tokokora bhuuya mbere iya Omonene aheene igho, kasi kora na ko-bhantö honswe.

Abhagharatia 5:22

Kasi hano oraanyoore igha Umwika Ömöhörëëru we akototangata, ntoraabhe na ehagho iya Umwika Ömöhörëëru. Ehagho iyö ni-iya righonshe, ukushomerwa, omorembe, ököghömërrya, öbhöntö ubhwa heene, öbhösërëënia, obhoheene,

1 Peetero 2:12

Mobhe na eteemo inshiiya mo-bhantö bhano bhatamanyirë Waryobha, okore hano bhareghambanga igha m-baghogho mörë, bhamaahe amangʼana aghëënyu amaiya ghano mokokora. Bhoono hayö, ho bharëtöönia Waryobha ko okoghera iya bhëënyu, urusikö rono ariisha.

Abhaëbhuraania 13:18

Motosabherenga, ko bhoora nkukumya törë igha, ntoona amaitegherro amaiya, kora nkutuna törë tobhe abhantö abha heene ku kyokyonswe keera toraakore.

1 Timoteo 4:12

Ömöntö wowonswe oora atakaakosera igha m-mumura ökërë, kasi okore omotono ughwa okobha ëkërëngyö ko abhakumya, ko bhoghambi ubhwaho, eteemo iyaaho, righonshe iryaho, umukumo ughwaho, otakaabha na risoro.

Abhaëfësö 5:9

Ndabhatëëbhya igho ko bhoora igha, ëbhëntö ibhiiya bhyonswe igho, ibhya heene na ibhya obhoheene, no-bhorabhu bhokobhereeta.

Tiito 1:8

Kasi asërëëninga abhantö, abhe ömöntö ono ahanshirë amangʼana amaiya, abhe ömöntö ono akogheera ngʼora amangʼana, ömöntö uwa heene, ömöhörëëru, ono akwirebherra umwene.

1 Yohana 3:3

Ömöntö wowonswe igho ono akwitengʼera igha atuubhane na Yëësu Kiristo, aisaabhuure, abhe ömöhörëëru kya Yëësu Kiristo.

1 Peetero 1:22

Öbhömënyi ubhwënyu, nkorengʼaana bhörë na amëëghyö agha heene agha amangʼana agha Yëësu Kiristo. Ku bhuyö senkoro isyënyu syasaabhuurwa, na bhoono nkotora mörë okohansha abhakumya bharikyënyu këmwëkëmwë. Mbe, mohanshane bhököngʼu,

Tiito 3:14

Abhakumya bharikyëtö bhonswe, bheeghe okokora amangʼana amaiya, okore bhatöörri abhahabhë. Hano bharaakorenga igho, mbaraabhe abhantö abha ubhwera tebhahete bhosa igho hë.

Abharuumi 13:13

Tobhe na eteemo inshiiya kya iya abhantö abha mo-merengaari ighya urusikö orohya. Totakaabha abhaköri abha sinyangi isya obhohoobhaaru na öbhörëëbhi, totakaabha abhasooraare, totakaakora amangʼana agha sënsöni, ubhutindi na rikenge.

Yaakobho 1:27

Amangʼana amaiya agha idiini ghano ghakushomera Taata uwëëtö Waryobha, ghano akomaaha igha teghaana isoro hë, nö-kötöörrya sentakaana na abhasinö mu-sinyanko isyabho, na ukwibhasha ëbhëbhë ibhya ko-kebhara kono.

1 Yohana 3:18

Bhëënyu abhaana abhaane abhaghonshe, totakaahanshana ko mangʼana agheene igho hë, kasi tohanshane këmwëkëmwë ko okokorrana ubhwa heene.

Tiito 2:2

Ötëëbhi abhaghaaka igha, bhagheerenga ngʼora amangʼana, bhaisooke, bhairebherre, bhabhe na umukumo ughwa obhoheene, bhaghömërringa, kora bhabhe na righonshe.

2 Abhakörintö 13:7

Nkosaasaama törë Waryobha motakaakora engʼana engogho yoyonswe eera, te-ko okoghera igha toratuna tomaahekane igha bhëëtö töhëkëëyë ekerengere kiyö. Kasi keno tukutuna, ni-igha bhëënyu mokore amangʼana amaiya, nokaanyoora bhëëtö tonga kya bhano twakerwa.

Abhakorosaai 4:5

Mbe, ni-igha mobhe abhangʼaini ko-teemo iyëënyu hano wanyoora mörëngë hamwë na abhantö bhano bhataraakumya Yëësu. Umweya ghwoghwonswe igho ghono mukunyoora, mokorenga igho.

1 Peetero 4:8

Engʼana enene okokera ghonswe igho, ni-igha mohanshane bhököngʼu, hano moraahanshane, moraabherane bhököngʼu obhosarya ubhwënyu bhono mokokorrana.

Abharuumi 13:3

Ko bhoora omotangati takööbhöhërrya ömöntö ono akokora amangʼana amaiya hë, kasi ikyöbhöhërryö ikyaye, nkobhasarya kërë. Ku bhuyö nyoore otakutuna okoobhoha ömötöngi, ni-igha okorenga amangʼana amaiya, hayö ho araakukumi.

Tiito 2:14

Yaairuusiri ko okoghera iya bhëëtö, okore atutunguri ukurwa mo-bhosarya ubhwëtö bhonswe igho. Yaatunirë igha atosaabhuure, okore tobhe abhantö abhaaye abha heene, bhano bhairuusya okokora amangʼana amaiya.

Abhafiripi 3:1

Mbe, bhoono abhakumya bharikyëtö, nkobhatëëbhya ndë igha, mushomerwe ko bhoora m-bantö abha Omonene Yëësu mörë. Tenkorosa ukukyorra amangʼana ghaara naabhandëkëëyë, ko bhoora amangʼana ghayö, ngo orobhagho urwa umukumo ughwënyu.

Abharuumi 2:29

Ti-igho hë! Kasi ömöntö ono akosooka Waryobha mo-nkoro iyaaye, uyö we uwaaye. Na esaaro inshiiya, ne-eera iya Umwika Ömöhörëëru akotogheka ömöntö mo-nkoro, tokoghoota amaraghërryö agha Mosa hë. Ömöntö kya uyö takukumibhwa na abhantö hë, kasi Waryobha we akumukumya.

1 Timoteo 2:2

Ndabhakangʼasërrya igha, mosabherenga abhakama na abhatangati bhonswe igho, okore tobhe na omorembe, tosooke Waryobha na okobha na eteemo inshiiya.

1 Timoteo 5:10

Abhe uwa eteemo inshiiya, abhe igha, nö-möntö ono yöörökërryanga abhaana abhaaye eteemo inshiiya, yaasërëënianga abhaghëni, yaatighinkananga ukwisaabhya abhantö abha Waryobha amaghörö aghaabho. Umusinö uyö, abhe ono yaatöörryanga bhano bhaanyankibhwanga, ghwiki abhe ono yaakora amangʼana amaiya.

Abhaëfësö 6:14

Ku bhuyö ni-igha mwisëëmi ukwitana riihë. Mwibhohe umushibhi mo-bhokende. Umushibhi ghuyö no-bhoheene ubhwa Waryobha. Motoore idirii mu-kikubha. Idirii iyö, no-kokora amangʼana agha heene.

1 Abhatësarönikë 4:12

Hayö ho mörööröki eteemo inshiiya ko-bhantö bhano bhatarëngë Abhakiristo. Ghwiki temoobhe abhantö abha ukwesegha ëbhëntö ibhya abhandë hë.

Abhaëfësö 4:25

Mbe, ku bhuyö mutighe obhorongo, kasi moteebhaninga obhoheene, ko bhoora bhëëtö bhonswe igho, n-kya imyaho ighya ömöbhërë öghömwë.

2 Abhakörintö 6:8

Bhëëtö twamara ukwiruusya igha, abhantö mbakaatosooka, handë bhatosere, mbakaatoghamba bhuuya, handë bhatoghambe bhoghogho, te-ngʼana hë. Nkomaahekana törë igha m-barongo törë, kasi no-bhoheene tokoghamba.

Amangʼana agha Abhatomwa 10:22

Bhakamötëëbhya igha, “Töötömirwë na omonene uwa abhasirikare, ono akobherekerwa igha Körönëriö. Körönëriö uyö, nkosookwa arë na Abhayahudi bhonswe igho, ko bhoora akwighwera Waryobha, ghwiki m-möntö uwa heene. Maraika uwa Waryobha yaamötëëbhëri igha, akobherekere oghende waaye ka, okore aighwe amangʼana ghano oraamötëëbhi.”

Yohana 7:18

Ömöntö wowonswe igho ono akoghamba ku ubhwera ubhwaye umwene, uyö nu-bhuhika ubhwaye umwene akwitonera. Kasi ono akutuna ubhuhika ubhwa oora yaamotoma, uyö no-bhoheene akoghamba, takoghamba obhorongo hë.”

Ruuka 2:25

Yaare-ho ömöntö nyabhorebhe Yërusarëëmu hayö, ono yaabherekerwanga igha Simeoni. Ömöntö uyö, yaaingʼarëëyë ku-Waryobha kora m-möntö uwa heene yaarë. Yaaighombanga amaahe ököröörisibhwa ukwa Abhaisiraëri. Umwika Ömöhörëëru hamwë yaarë nawe.

Ruuka 16:15

Yëësu akabhatëëbhya igha, “Mo-bhantö, bhëënyu moraikora igha, m-bantö abha heene mörë, kasi Waryobha, namanyirë ghano gharëngë mo-senkoro isyënyu. Ko bhoora amangʼana ghano abhantö bhakukumya, ngo amanyënyëëri ku-Waryobha.

1 Abhakörintö 4:5

Ku bhuyö motakaabhotora ikiina, enkaagha iyaako etaraabha, moghanye okohekera hano Omonene ariisha. We aremoreka amangʼana agha mu-kisuntë ghonswe igho ghano ghabhisirwë, na okotoora harabhu ghano gharëngë mo-senkoro isya abhantö. Hayö ho bhoono kera ömöntö arinyoora sinkuma seno aingʼarëëyi, ukurwa ku-Waryobha.

Amangʼana agha Abhatomwa 22:12

“Mu-mughi muyö, yaarenga-mo ömöntö ono yaasookwanga na Abhayahudi bhonswe igho abha iyö, yaabherekerwanga igha, Anania. Anania uyö, yaasookanga amaraghërryö aghëëtö.

1 Yohana 4:1

Abhaghonshe abhaane, motakaakumya kera ömöntö ono akoghamba igha aana Umwika Ömöhörëëru uwa Waryobha. Kasi mumwitaahe bhuuya, momaahe nyoore aana Umwika Ömöhörëëru uwa Waryobha. Ni-igha momanyërri obhoheene bhuyö, ko bhoora abharööti abhaaru abha obhorongo, bhaibhoka ko-kebhara kono.

1 Timoteo 5:2

Abhakungu, obharaghërri kya hano waraghërrya bhanyakuwëënyu, na abhaisëkë, kya bhono okoraghërrya abhaisëkë abhëënyu. Ughinga orakora engʼana iyö kwa enkoro inshiiya.

Ruuka 23:50

Yaare-ho ömöntö uwöndë ono yaabherekerwanga igha Yusufu, uwa mo-mokowa ughwa Yudea mu-mughi ghono ghwaabherekerwanga igha Arimatea. Yusufu uyö, wonswe no-motangati uwa Abhayahudi yaarë. Kasi umwene, tiyaikererraini na bharikyaye, ku-kiina ikya ukwita Yëësu, ko bhoora m-möntö uwa heene yaarë ku-Waryobha. Kora yaaghanyerranga, ukuusha ukwa Obhokama ubhwa Waryobha.

1 Timoteo 3:4

Abhe ono akwimererra bhuuya umughi ughwaye, ömöntö ono akwörökërrya abhaana abhaaye eteemo inshiiya, iya ukwighwera abhantö na okobhasooka.

Amangʼana agha Abhatomwa 6:3

Bhoono abhakumya bharikyëtö, engʼana eno eeho ni-igha, mushaaghore abhashaasha muhungatë mö-bhëënyu muyö, bhano bhaana eteemo inshiiya, bhano bhaishööyë Umwika Ömöhörëëru, na obhongʼaini. Abhantö kya bhayö, mbo toraaghööti omoremo ghuyö, bhaghwimererre,

Mataayo 22:16

Ku bhuyö Abhafarisaayo bhayö, bhakatoma ku-Yëësu abheegha abhaabho, hamwë na abhasoorani abha rikomo irya omokama Herode. Hano bhaahikirë ku-Yëësu, bhakamöbhöörya igha, “Umwëghya, bhëëtö ntomanyirë igha, uwe m-möntö uwa heene örë, nkwëghya örë abhantö obhoheene ubhwa engʼana iya Waryobha. Kora tokoobhoha ömöntö wowonswe oora hë. Nakaabha na ikyeo ekenene iyakë, uwe tokomoobhoha hë.

Abhaëbhuraania 11:2

Umukumo, ghwaaghërrë abhakörö abhëëtö bhakatëghërya Waryobha.

1 Timoteo 3:11

Bhakaabho bhonswe bhabhe na eteemo inshiiya, bhatakaabha abhaghambi abha abhantö, bhagheerenga ngʼora amangʼana, ghwiki ni-igha bhabhe abhantö abha heene ko amangʼana ghonswe igho.

2 Abhakörintö 8:18

Hamwë na uyö, nkotoma törë umukumya murikyëtö ono akukumibhwa na amakanisa ghonswe igho, ko-meremo ighyaye, ighya okoraareka Amangʼana Amaiya.

2 Peetero 3:1

Abhaghonshe abhaane, ritashandighi reno nkobhandekera, ni-irya kabhërë. Naakora omotono ughwa okosesemora amaitegherro aghëënyu amaiya, mo-sehakëri isyënyu ko okobhahiitökya mo-matashandighi ghonswe igho abhërë ghayö.

Abharuumi 14:18

Mbe, hano ömöntö akörëëyë igho Yëësu Kiristo, uyö nkötëghërya arë Waryobha, kora abhantö nkumwikërrya bharë.