Abhaëfësö 4:1 - Imuuma Eehya

¹ Mbe, öni m-mobhohe ndë ko bhoora nkokorra Omonene Yëësu emeremo. Ku bhuyö ndabhasaasaama igha, mokore amangʼana ghano ghakwikererrania na keera kyaaghërrë Waryobha akabhabherekera igha mobhe abhantö abhaaye.

Abhaëfësö 4:1 Referans Kwoze

Abhakorosaai 1:10

Amangʼana ghayö, ngo tokobhasabhera, okore mobhe na eteemo eno Omonene Yëësu akutuna igha abhantö abhaaye bhabhe nayo. Mbe, hayö ho moraamötëghëri, ko mangʼana amaiya ghonswe igho ghano mokokora, kora ho moraamanye Waryobha bhököngʼu.

Abhafiripi 1:27

Engʼana enene ni-igha, mobhe na eteemo eno ekorengʼana na Amangʼana Amaiya agha Kiristo. Hano ndaashe okobhamaaha handë nange ukuusha, kasi nighwenga igha, nköghëndërrya mörë okonagha, kora moona öbhömwë. Nkunyankera mörë hamwë umukumo ghono ghokotooka ko Amangʼana Amaiya.

1 Abhatësarönikë 2:12

Ntwaabhatoghekanga mo-senkoro, torabhatërëmya na okobhakangʼasërrya, okore igha, mokore ghano Waryobha ahanshirë. Waryobha uyö, we akobhabherekera okore mosohe mo-Bhokama na mu-bhuhika ubhwaye.

2 Peetero 1:3

Waryobha yaatohaana ghonswe igho ghano tukutuna, okohetera ko obhotoro ubhwaye, okore tobhe na öbhöhöru, kora tomosooke. Yaatohaana ghayö ko enshera iya okomomanya. Ghwiki atöbhërëkëëyë ko okoghera iya ubhuhika na öbhöntö ubhwa heene ubhwaye.

2 Timoteo 1:9

Waryobha yaatötöörya, akatushaaghora tobhe abhantö abhaaye. Tiyaakörrë igho ko bhoora igha twaakora amangʼana amaiya, ti-igho hë. Kasi yaakörrë igho ko okoghera iya ësëëmyö iyaaye, na örööbhö urwaye. Yaatohaayë örööbhö ruyö, ko okoreeta Kiristo Yëësu ko okoghera iya bhëëtö. Yaakörrë igho kora ataraabhomba ekebhara.

1 Abhakörintö 4:16

Mbe, ndabhasaasaama mokorenga bhono öni nkokora.

2 Abhatësarönikë 1:11

Ku bhuyö nkobhasabhera törë sinsikö syonswe igho igha, Waryobha uwëëtö abhakore morengʼaane na keno yaabhabhërëkërra. Ghwiki nkobhasabhera törë igha, ko obhotoro ubhwaye, ahekerani amangʼana amaiya ghano mukutuna okokora, na okohekerania emeremo ighyënyu ghyonswe igho ighya umukumo.

Abhaëfësö 4:17

Mbe, keno nkutuna mbatëëbhi ni-igha, mwitegherre bhuuya amangʼana aghaane ghano. Omonene Yëësu Kiristo yaangʼaana ubhwera, ku bhuyö nkobhakaania ndë igha, motakaaghëndërrya okokora amangʼana kya Abhakyaro. Bho nkokora bharë amangʼana bhono abheene bhakutuna. Amaitegherro aghaabho, teghaana ubhwera bhwobhwonswe bhoora hë.

Abharuumi 12:1

Bhoono abhakumya bharikyëtö, ko bhoora igha Waryobha abhaayë na amaabhë na bhëëtö, ndabhasaasaama bhököngʼu igha, mwiruusi mobhe kya itugho ëhörëëru iya ikimwenso, eno ikushomera Waryobha. Okokora igho, nko enshera inshiiya iya okosengerra Waryobha.

Abhakorosaai 2:6

Bhoono ko bhoora mwaakumya Kiristo Yëësu igha m-Monene uwëënyu, möghëndërri okobha na öbhömwë nawe.

1 Peetero 3:9

Motakaahakanga ikisiiyomba ko abhantö, handë okotoka ömöntö ono akötökirë, kasi engʼana inshiiya ko-bhantö kya bhayö, no-kobhakorra ubhwa heene. Ghayö ngo mwaabherekerrwa igha mokore, okore mongʼoorwe.

2 Abhakörintö 6:1

Mbe, ko bhono tokokora emeremo hamwë na Waryobha, ku bhuyö nkobhasaasaama törë igha, örööbhö urwa Waryobha rono mwanyoora, rotakaaheta bhosa.

2 Yohana 1:5

Bhoono ore musubhaati omoghonshe, ndakosabha omanye igha, bhëëtö Abhakiristo, ni-igha tohanshane. Umughiro ghuyö te-mohya hë, kasi n-gooraghoora ughwa kare, ghono twaarenga tomanyirë ukurwa hano twaasimiri ukukumya Yëësu Kiristo.

1 Peetero 5:10

Waryobha uwa örööbhö rwonswe igho, yaabhabherekera, okore moghootane nawe ku-bhuhika ubhwaye ubhwa amakora ghonswe igho, ko bhoora ntoona öbhömwë na Yëësu Kiristo. Moraanyanke akabhagha akake igho, kasi we narebhatogheka, abhahaane singuru, na okobhaimererra.

1 Peetero 2:11

Abhaghonshe abhaane, bhëënyu m-baghëni bhahëti mörë ko-kebhara kono. Ku bhuyö, ndabhasaasaama igha, motakaikërrya okobhaahwa na oronamba oroghogho urwa ëmëbhërë ighyënyu. Oronamba oroghogho ruyö, nkurutana rörë na bhëënyu, okore robhabhaahe.

Abhaëbhuraania 13:21

Waryobha abhakore mohekerane ko amangʼana amaiya ghonswe igho, okore mokorenga bhono akutuna. Hayö ho araakore mö-bhëëtö keno kikumushomera ko okohetera ku-Yëësu Kiristo, aghëndërri okobha na ubhuhika ubhwa amakora ghonswe igho. Amina.

Abhafiripi 3:14

Nkwiköngʼërrya ndë nhike ku-muhiko, okore ntuhwe ituho iyaane. Ituho iyö, yo Waryobha akobherekerra abhantö mu-ryobha, ko okohetera ku-Kiristo Yëësu.

Abhaëfësö 5:2

Mohanshe abhantö abhandë, kya bhono Yëësu Kiristo yaatohanshirë akatukwera, akabha esadaaka na ikimwenso ikyëtö ikya ukurumbaasa bhuuya ku-Waryobha.

Abhaëfësö 4:4

Bhëëtö Abhakiristo n-kya bhono ömöbhërë ughwa ömöntö ghörë, ntoona Umwika Ömöhörëëru ooraoora, na ubhweseghe m-mboorabhoora toonabho bhono Waryobha yaatoraghaini hano yaatöbhërëkëëyë.

Abhaëfësö 3:1

Ko okoghera iya amangʼana ghayö ngambirë, öni Pauro nëmböhirwë ko okokorra Kiristo Yëësu emeremo kö-bhëënyu Abhakyaro. Nkobhasabhera ndë ku-Waryobha.

Abhagharatia 4:12

Abhakumya bharikyëtö, nkobhasaasaama ndë igha, mobhe abhatöönööni kya öni, ko bhoora öni wonswe kare haara n-kya bhëënyu igho naarë. Kasi, temwankörëëyë obhoghogho bhwobhwonswe igho hë.

Abhaëbhuraania 3:1

Mbe, bhëënyu abhakumya abhahörëëru bharikyane, bhano Waryobha yaashaaghora igha mobhe abhantö abhaaye, mwitegherre bhuuya amangʼana agha Omotomwa Yëësu Kiristo, ono arëngë Omonene uwa abhasëngëri uwa umukumo ghono tukwikërrya.

2 Abhakörintö 10:1

Mbe, ndabhasaasaama ko obhohaabhu na kö öbhöntö ubhwa heene ubhwa Yëësu Kiristo, nö-öni Pauro ono bhakoghamba igha, hano naabha hamwë na bhëënyu, nkobha ndë omohaabhu, kasi hano naabha hare na bhëënyu, ndabha omokarë.

Tiito 2:10

Bhatakaabheebheranga, kasi bhabhe abhantö abha heene, okore eteemo iyaabho irute abhantö, bhashomerwe na amëëghyö agha Waryobha Ömötöörya uwëëtö.

Abhakorosaai 4:12

Epafura Omokorosaai murikyënyu wonswe nkobhakëërya arë, wonswe m-mököri uwa emeremo uwa Kiristo Yëësu. Epafura uyö, naana omotono ughwa okobhasabhera nkaagha syonswe igho, nkobhasabhera arë igha, monaghe ku-mukumo ughwënyu, na mohangarre ko amangʼana ghano Waryobha akutuna igha mokore.

2 Abhakörintö 5:20

Mbe, bhoono Yëësu Kiristo atötömirë tokore emeremo ighyaye, nërëngë igha, Waryobha ko okohetera amangʼana ghano tokoghamba, nkokangʼasërrya arë igha, abhantö bhaighwerrane nawe. Kiyö nkyo kekoghera torabhasabha ku ukwimererra amangʼana agha Yëësu Kiristo igha, mwighwerrane na Waryobha.

Amangʼana agha Abhatomwa 9:31

Mbe, ekanisa ekabha na omorembe ahasë honswe igho, Yudea, mo-mokowa ughwa Ghariraaya na Samaaria. Abhakumya bhakaghëndërrya okonagha, na okosooka Omonene Yëësu. Ko okoseghwa na Umwika Ömöhörëëru, abhantö bhakaaruha mo-kanisa.

Abharuumi 11:29

Ko bhoora Waryobha yaabhahööyë na okobhangʼoora, tabhaigharanshore hë.

Abhaëfësö 2:10

Ko bhoora igha Waryobha yaatobhomba, na kö bhömwë ubhwëtö na Kiristo Yëësu, yaatobhomba bhohya, okore eteemo iyëëtö ebhe iya okokora amangʼana amaiya ghano yaatösëëmëëyi ukurwa kare igha toghakore.