Abhaëfësö 2:2 - Imuuma Eehya

² Enkaagha iyö, mwaakoranga amangʼana agha ko-kebhara kono. Kora mwaasorananga omotangati omoghogho uyö, Omonene uwa singuru isya ighörö isya amasambwa. Uyö we bhoono igho akokora emeremo mo-bhantö bhano bhatakwighwera Waryobha.

Abhaëfësö 2:2 Referans Kwoze

Abhaëfësö 6:12

Nkobhatëëbhya ndë igho ko bhoora igha, riihë reno tukwitana, ti-irya kinyabhantö hë, kasi nkwitana törë riihë na ëbhëntö bheno bhetakomaahwa, ibhya ubhwera na obhotoro. Nkwitana törë riihë na abhanene abha amangʼana amaghogho, bhano bhakotonga ekebhara keno. Nkwitana törë riihë na amasambwa ghonswe igho ghano ghakokora amangʼana amaghogho, na amatöngi agha ahasë hano hatakomaahwa.

1 Yohana 5:19

Ntomanyirë igha, bhëëtö m-baana abha Waryobha törë. Kasi abhantö abhandë bhonswe igho bhano bhatakwighwera Waryobha, bhayö nkobhaahwa bharë na Oghosambwa.

Abhaëfësö 2:3

Bhëëtö bhonswe igho Abhayahudi na bhëënyu Abhakyaro, tetwaighweranga Waryobha hë. Hano waanyöörrë totaraakumya Yëësu Kiristo, ntwaarë kya bhayö bhatakwighwera Waryobha. Twaakoranga amangʼana ghano ëmëbhërë ighyëtö na sehakëri isyëtö bhyaatunanga tokore. Ntwaarë kya bhono abhantö abhandë bharëngë ko-kebhara kono. Ntwaaibhööywë na esemoko iya obhoghogho. Twaarërërrëëywë na Waryobha, kora nakaatushibhiri.

Yohana 12:31

Bhoono enkaagha iya Waryobha iya okobhotorra ekebhara keno ikiina, ihikirë. Bhoono Oghosambwa ghono ghokotonga ko-kebhara kono, ngoraatabhutwe kebhara iyö.

Abhaëfësö 5:6

Motakaikërrya ömöntö wowonswe oora, abhangʼaine ko amangʼana aghaaye agha obhokangi ghano akoghamba. Ko bhoora igha, Waryobha narishibhya abhantö bhano bhatakumwighwera, bhano bhakokora amangʼana amaghogho kya ghayö ngambirë.

Yohana 8:44

Bhëënyu na-abha Oghosambwa mörë, ghuyö ngwo suwëënyu. Oronamba urwa suwëënyu urwa okokora ghano akutuna, ndwo monaro. Oghosambwa ukurwa bhosemoka n-ghwiti, ghwiki teghohanshirë obhoheene hë, ko bhoora teghoona obhoheene hë. Hano Oghosambwa ghwaghamba obhorongo, iyö ne-teemo iyaaghwo ko bhoora n-gorongo, ghwiki ngwo suwaabho obhorongo bhwonswe igho.

Abhaëfësö 4:22

Abhëëghya abhëënyu bhaabhëëghya igha, mutighe seteemo isyënyu isya kare seera, seno syaabhasikyanga, isya ubhunyanku ubhwa oronamba rono rwaabhangʼënërryanga.

1 Abhakörintö 6:11

Abhandë mö-bhëënyu muyö, ni-igho mwaarë. Kasi bhoono mwoghibhwa obhoghogho ubhwënyu, mwahorwa, mokakorwa abha heene okohetera ku iriina irya Omonene uwëëtö Yëësu Kiristo, na ku-Mwika uwa Waryobha uwëëtö.

2 Abhakörintö 4:4

Amangʼana Amaiya teghakomanyekana ko-bhantö bhayö, ko bhoora Oghosambwa, oghokama ughwa ekebhara keno, ghoroghaini emetwe ighya abhantö bhano bhatakukumya. Nkyo kekoghera bhatakomaaha obhorabhu ubhwa Amangʼana Amaiya agha emerengaari ighya Yëësu Kiristo, uyö we ituubho iya Waryobha.

1 Yohana 5:4

Nkoghamba ndë igho ko bhoora igha, kera omoona uwa Waryobha, naana obhotoro ubhwa ukwanga obhoghogho ubhwa ko-kebhara kono. Obhoghogho bhuyö, nkubhwanga törë ku ukukumya Yëësu Kiristo.

1 Yohana 3:10

Kasi ömöntö ono atakokora amangʼana agha heene, handë ono atahanshirë umukumya murikyaye, uyö temoona uwa Waryobha hë. Ni-igho tokomanyërrya abhaana abha Waryobha bhono bharë, bheena abhaana abha Oghosambwa bhono bharë.

1 Peetero 1:14

Ko bhoora igha, bhoono m-baana abha Waryobha mörë, ni-igha mosooke Waryobha. Motakaikërrya ghwiki okobha na oronamba oroghogho rono mwaarenga naro kare, hano mwaarenga motaraamanya Amangʼana Amaiya agha Yëësu Kiristo.

Okohonyora 20:2

Akaghoota ughushoka ghoora. Ughushoka ghuyö, ngo inshoka iya kare eera ekobherekerwa igha, Nyangasheka, handë igha Oghosambwa. Akaghobhoha na ekeraangʼani, akaghotabhuta mu-bhwina ubhwa mu-kyaro ikya abhaku, akasiika-ho ekesaku, akamaameka-ko umuhuri ughwa ubhurimbo, okore ghotakaasha okongʼaina ghwiki Abhakyaro. Oghosambwa ghuyö ngorebhohwa imyoka ëkëkwë ëkëmwë. Hano ribhagha riyö rerehwa, ni-igha ghuruusibhwi mo-kebhohe ko-nkaagha enke igho.

1 Yohana 4:4

Bhëënyu abhaana abhaane abhaghonshe, m-baana abha Waryobha mörë. Kora mwaanga amangʼana agha abharööti abha obhorongo bhayö. Mwaanyoora obhotoro ubhwa okokora igho, ko bhoora Umwika Ömöhörëëru uwa Waryobha mö-bhëënyu arë. Umwika Ömöhörëëru uyö, we aana obhotoro okokera ëkëhwë ikya Oghosambwa, kiyö kekotangata abhantö bhano bhatakwighwera Waryobha.

1 Peetero 4:3

Kare hayö, mwaarenga na oronamba oroghogho, obhosooraare, na ubhunywi ubhwa amarwa. Mwaahanshirë sinyangi isya okorya, ubhunywi ubhwa okoheterania, na okosengerra ëbhëtöndö, engʼana iyö m-mughiro ku-Waryobha. Amangʼana ghayö mwaaghakörrë ibhagha itambë bhököngʼu. Bhoono motakaaghëndërrya ghwiki okokora igho.

Abhakorosaai 1:21

Kare hayö, hano bhëënyu motaarenga moraakumya Waryobha, hare mwaarë nawe, kora mokabha abhabhisa abhaaye, ko okoghera iya amaitegherro na seteemo isyënyu sengogho.

Abhagharatia 1:4

Kiristo yaairuusiri öbhöhöru ubhwaye, ko okoghera iya ukuruusya-ho ëbhëbhë ibhyëtö. Yaakörrë igho, okore atötööri turwe mo-mangʼana amaghogho ghonswe igho agha ko-kebhara keno ikya bhoono igho. Ghayö ghonswe igho ngaabhaayë igho, ko okorengʼaana na okohansha ukwa Waryobha Taata uwëëtö.

Abharuumi 12:2

Ku bhuyö, motakeegha seteemo isya abhantö abha ko-kebhara kono. Mutighe Waryobha abhasyöri senkoro isyënyu, okore mobhe na amaitegherro amahya. Hayö ho moreeghe, momanye keno Waryobha akobhatonera. Keno akobhatonera, na-mangʼana amaiya ghano ghahekerana, agha ökömötëghërya.

Yaakobho 4:4

Bhëënyu tëmörëngë abhantö abha heene ku-Waryobha hë, n-kya abhakari abhasooraare mörë. Kasi temomanyirë igha hano ömöntö yaghootana obhosaani na ekebhara, nkobha arë umubhisa uwa Waryobha? Ömöntö wowonswe ono araatune okoghootana obhosaani na ekebhara, uyö nkobha arë umubhisa uwa Waryobha.

1 Abhakörintö 5:10

Tenkoghamba igha motakaaghootana na abhasooraare abha ko-kebhara kono, handë abhahiti, handë abhasaki, handë abhasëngëri abha ëbhëtöndö. Mbe, hayö nekaabhaayë igha, murwe ko-kebhara kono.

Amangʼana agha Abhatomwa 5:3

Peetero akamötëëbhya igha, “Uwe Anania! N-kwakë Oghosambwa ghoroghaini enkoro iyaaho, kora ghöghërrë ötëëbhëri Umwika Ömöhörëëru obhorongo? Seehera isyëndë otabhööyë-ko, ubhisirë ka.

Yohana 15:19

Singa na-abha ko-kebhara kono mörë, abhantö abha ko-kebhara kono, mbakaabhahanshirë kya bhono bhahanshirë abhakebhara bharikyabho. Kasi ko bhono naabhashaaghora ukurwa ko-bhantö abha ko-kebhara kono, tëmörëngë abha ko-kebhara kono hë, kiyö nkyo kekoghera abhantö abha ko-kebhara kono bharabharegha.

Yohana 14:30

Öni tentore ukushumaasha na bhëënyu ku-ribhagha ritambë hë, ko bhoora Oghosambwa öghötöngi ughwa ekebhara keno ghoraasha. Kasi teghoona ubhwera bhwobhwonswe igho ku-öni hë.

2 Peetero 2:14

Amaiso aghaabho, n-ga kesooraare. Oronamba urwabho oroghogho urwa okokora ëbhëbhë, teroona umuhiko hë. Nköngʼënërrya bharë bhanyamukumo mötëntëëru. Senkoro isyabho, bhaasenarya ukwighomba ëbhëntö. Abhantö bhayö bhaihiimwa!

Yohana 16:11

Ko amangʼana agha okobhotorrwa ukwabho ikiina, n-ko bhoora Oghosambwa ghono ghokotonga ko-kebhara kono, ghwamara okobhotorrwa ikiina.

Yohana 13:27

Hano Yëësu yaamarrë okomohaana omokaate ghuyö, Oghosambwa ghokasoherra Yuuda. Yëësu akamötëëbhya igha, “Kora bhöngö ghano ukutuna okokora!”

Yohana 13:2

Yëësu na abheegha abhaaye, bhakaikara okorya ibhyakorya ibhya omoghoroobha. Enkaagha iyö, waanyöörrë Oghosambwa ghomarrë köngʼënërrya Yuuda, mura uwa Simööni Isikariyote, okore anyeere Yëësu inikö.

Yohana 8:23

Yëësu akaghëndërrya okobhatëëbhya igha, “Bhëënyu n-hansë hano mwaarwa, kasi öni mu-ryobha naarwa. Bhëënyu na-abha ko-kebhara kono, kasi öni tu uwa ko-kebhara kono ndë hë.

Yohana 7:7

Abhantö abha ko-kebhara kono, tebhaana ikibhuno keno keraaghere bhabhareghe hë, kasi öni bharaandegha, ko bhoora nkobhatëëbhya igha, amangʼana aghaabho m-maghogho.

Mataayo 13:38

Ömöghöndö, bhayö na-bhantö bhano bharëngë ko-kebhara kono. Na imbusiro inshiiya, bhayö na-bhantö bhano bhakotongwa na Waryobha. Ëntöki, iyö na-bhantö abha Oghosambwa.

Okohonyora 13:8

Abhantö bhonswe igho abha ko-kebhara kono, bhano amariina aghaabho ghatandëkirwë mo-ketabho ikya Öbhöhöru, mbareghosengerra. Eketabho kiyö, ni-ikya Omoona Ringʼöndi ono yaanshinshirwë, nkyaandëkirwë ukurwa okosemoka ukwa ekebhara.

1 Yohana 3:8

Kasi ömöntö wowonswe ono aköghëndërrya okokora ëbhëbhë, uyö m-möntö uwa Oghosambwa. Ntomanyirë igho, ko bhoora Oghosambwa n-gököri ughwa ëbhëbhë ukurwa kare. Kiyö nkyo ikibhuno keno kyaaghërrë Omoona uwa Waryobha akaasha ko-kebhara kono, okore asari emeremo ighya Oghosambwa.

Yaakobho 1:7

Ömöntö uwa eteemo iyö, atakaitegherra igha nanyoora ëkëntö ukurwa ko-Monene Waryobha.

2 Timoteo 4:10

ko bhoora Dema, yaantigha. Dema uyö, yaahansha amangʼana agha ko-kebhara kono, akamaaha igha aghende mu-mughi ughwa Tësarönikë. Kiresike, yaghëëyë mo-mokowa ughwa Gharatia, na Tiito, yaghëëyë mo-mokowa ughwa Darimatia.

Amangʼana agha Abhatomwa 19:35

Mbe, omokaraani omonene uwa umughi ghuyö, akakirya abhantö. Akabhatëëbhya igha, “Bhëënyu bhare abhantö abha Ëfësö, mu-bhyaro bhyonswe igho nawë ono atamanyirë igha, umughi ghono ngwo ghonaghëri risengerro irya risambwa rikari rinene reera igha, Aritëmi? Ëfësö keno, te-kyo kekonaghya kora ekesosa ikyaryo keno kyaaghööyë hansë ukurwa mu-ryobha?

Ruuka 22:31

Yëësu akaghamba igha, “Uwe Simööni, uwe Simööni uwe! Omanye igha, Oghosambwa ghosabhirë orohosa ku-Waryobha, ghobhashaashi bhëënyu bhonswe igho. Nerebha n-kya ukwirura öbhörwë.

Ruuka 16:8

“Hano umwamë uyö yaaighuurë amangʼana ghayö, akakumya umwimërërri uyö atarë uwa heene, ko-bhongʼaini bhono yaakörrë. Ko bhoora abhantö abha ko-kebhara kono, mbaana obhongʼaini, hano bhatighinkanerana abheene ko abheene, ko-mangʼana agha ko-kebhara kono, okokera abhantö abha Waryobha.

Mataayo 11:19

Mbe, bhoono öni Omoona uwa Ömöntö nishirë, nkorya ndë na ukunywa idivai, kasi nkoghamba bharë igha, ‘Tamaaha uyö, m-mohobhaaru, m-mörëëbhi, na kora m-mosaani uwa abhaghööti abha righööti na abha ëbhëbhë abhandë.’ Kasi obhongʼaini ubhwa Waryobha nkwörökya bhörë igha, m-boheene ko enshera iya öbhömënyi ubhwa abhantö abha Waryobha.”

Okohonyora 16:17

Mbe, maraika uwa muhungatë akahomorra ribhaköri iryaye ighörö iyö. Ghwiki nkaighwa engamba enene, erarwera ku-kitumbë ikya ekekama mu-nyumba iya Waryobha, eraghamba igha, “Bhoono ghahööyë!”

Okohonyora 13:14

Ghokangʼaina abhatakumya ko-kebhara okohetera kö ebhemanyërryö ibhya amakono bheno ghwaakörrë ko okoghera iya ughutyënyi ughwa mbere ghoora. Ghokatëëbhya abhantö igha, bhakore ritöndö ko okoghera iya okosooka ughutyënyi ughwa mbere ghoora ghwaaharaghirwë oroghoma urwa nyende na umushonge, kasi ghwiki, ghokabha öghöhöru.

Okohonyora 12:9

Ughushoka oghonene ghuyö, ghokarekerwa ko-kebhara hamwë na abhamaraika abhaagho. Ghuyö, ngwo ughushoka ughwa kare ghoora ghokobherekerwa igha, Nyangasheka handë igha Oghosambwa. Ghuyö, ngo ghwaangʼainirë abhantö bhonswe igho ko-kebhara kono, okore bhakore ëbhëbhë.

Mataayo 13:22

Ëkërëngyö ikya seheke isya imbusiro seera syaaghööyë mo-maanyamahwa, siyö no-oora akwighwa engʼana iya Obhokama ubhwa Waryobha, kasi abha na ehaho iya amangʼana amaaru na ukutuna ukwaye ubhwamë, komongʼaina. Ku bhuyö takukumya bhököngʼu engʼana iya Obhokama ubhwa Waryobha hë.

Maariko 4:19

Kasi inyanko iya ko-kebhara kono, iya ubhutuni ubhwa okobha na ëbhëntö, bheena ukwighomba amangʼana aghandë, mbyo bhikutimba engʼana, ekerwa ukwama.

Abhaëfësö 1:21

Kiristo uyö, nkotonga arë abhatöngi bhonswe igho kighörö iyö, abha ubhwera, abha singuru, abhanene na ibhyeo bhonswe igho bheno bhemanyekaini te-kokebhara kono aheene igho hë, kasi kora na ko-kebhara keno kiriisha.

Abhaëfësö 2:11

Mbe, ku bhuyö muhiite kya igho mwaarë kare. Esemoko iyëënyu, ti-iya abhantö abha Waryobha yaarë hë, kasi ni-iya Abhakyaro yaarë. Abhayahudi mbaabhabherekeranga igha “Abharëësya.” Kasi esaaro, nö-möntö akoghekora kö-möbhërë ughwa ömöntö.

Abhaëfësö 2:13

Kasi bhoono ko okobha na öbhömwë na Kiristo Yëësu, bhëënyu bhano mwaarë hare na Waryobha kare hayö, bhoono Waryobha abharëëtirë haangʼë nawe, okohetera ukweteka ukwa amaanyinga agha Kiristo Yëësu hano yaakuurë.

Abhaëfësö 4:17

Mbe, keno nkutuna mbatëëbhi ni-igha, mwitegherre bhuuya amangʼana aghaane ghano. Omonene Yëësu Kiristo yaangʼaana ubhwera, ku bhuyö nkobhakaania ndë igha, motakaaghëndërrya okokora amangʼana kya Abhakyaro. Bho nkokora bharë amangʼana bhono abheene bhakutuna. Amaitegherro aghaabho, teghaana ubhwera bhwobhwonswe bhoora hë.

Abhaëfësö 5:8

Nokaanyoora igha kare hayö mmu-kisuntë mwaarë, kasi bhoono igho mösöhirë mo-bhorabhu ko bhoora mobhaayë na öbhömwë na Omonene Yëësu Kiristo. Ku bhuyö mokore amangʼana kya abhantö bhano bharëngë mo-bhorabhu.

Yaakobho 1:27

Amangʼana amaiya agha idiini ghano ghakushomera Taata uwëëtö Waryobha, ghano akomaaha igha teghaana isoro hë, nö-kötöörrya sentakaana na abhasinö mu-sinyanko isyabho, na ukwibhasha ëbhëbhë ibhya ko-kebhara kono.