Abhaëfësö 1:7 - Imuuma Eehya

⁷ Ko okohetera amaanyinga agha Kiristo Yëësu, Waryobha yatutungurya, igha, atwabhëëyë ëbhëbhë ibhyëtö okorengʼaana na ubhwaru ubhwa örööbhö urwaye.

Abhaëfësö 1:7 Referans Kwoze

1 Peetero 2:24

Yëësu yaaghëghirë ëbhëbhë ibhyëtö kö-möbhërë ughwaye, kora akahanekwa ko-mosarabha. Yaakörrë igho, okore ëbhëbhë bhetakaatobhaaha ghwiki, okore tobhe na öbhömënyi bhono bhökötëghërya Waryobha. Bhëëtö twaahona ko okohetera okotemwa ukwaye.

Abharuumi 3:24

Kasi bhoono Waryobha kö örööbhö urwaye, aikërëëyi okobhara abhantö igha m-ba heene ku-mwene, bhatamohakirë kyokyonswe keera. Bhatunguribhwa ukurwa mö-bhëbhë ibhyabho okohetera ku-Kiristo Yëësu

Abhakorosaai 1:14

Twatunguribhwa ko okohetera Omoona uwaaye uyö, ko bhoora twabherwa ëbhëbhë ibhyëtö.

Abhaëbhuraania 9:22

Mo-maraghërryö agha Mosa, amaanyinga ngo ghaasaabhuuranga ëbhëntö bhyonswe igho. Hano amaanyinga ghataitëkirë, ukwabherwa ëbhëbhë tekooho hë.

Mataayo 26:28

Ko bhoora ghano ngo amaanyinga aghaane agha Imuuma, ghano ghareeteke ko okoghera iya ukwabhera abhantö ëbhëbhë ibhyabho.

Okohonyora 5:9

Bhakarëëtërya Omoona Ringʼöndi rirëëtyö reehya igha, “Uwe wingʼarëëyi okoghegha eketabho kiyö na okonaanora-ko ubhurimbo ubhwa ku-mihuri ighya-ko, ko bhoora uwe waashinshirwë. Okaghorra Waryobha ko amaanyinga aghaaho, abhantö abha amakabhira ghonswe igho, ebheghambo bhyonswe igho, sihiiri syonswe igho na ibhyaro bhyonswe igho.

1 Yohana 2:12

Bhëënyu abhaana abhaane abhaghonshe, nkobhandekera ndë, ko bhoora mwaabherwa ëbhëbhë ibhyënyu ko okohetera ku-Yëësu Kiristo.

Abhafiripi 4:19

Mbe, Waryobha uwaane naraabhahaane ghonswe igho ghano moonagho obhohabhë, okorengʼaana na ubhwamë ubhwaye obhonene. Naraakore igho ko okohetera ku ubhuhika ubhwa Kiristo Yëësu.

Abhaëfësö 2:7

Waryobha yaakörrë ghayö, okore aashe ukwörökya ekebhara ubhwamë ubhwa örööbhö urwaye, rono rotakorengʼaanibhwa na kyokyonswe keera ko amaabhë aghaaye, kö-bhëëtö bhano toona öbhömwë na Kiristo Yëësu.

1 Abhakörintö 1:30

Waryobha we abhaghootaini hamwë na Kiristo Yëësu. Uyö, we Waryobha yaamokora abhe obhongʼaini kö-bhëëtö, bhono bhukurwa ku-Waryobha, obhoheene, esaabhuuro na ubhutungurya ubhwa ëbhëbhë ibhyëtö.

Abhaëfësö 3:16

Nkobhasaasaamera ndë ku-Waryobha igha, ku ubhuhika ubhwaye ubhwaru bhono aanabho, Umwika Ömöhörëëru abhahaane singuru, mokongʼe mo-senkoro isyënyu,

2 Abhakörintö 8:9

Bhëënyu mmomanyirë örööbhö urwa Omonene uwëëtö Yëësu Kiristo igha, nokaanyoora m-mwamë yaarë, kasi yaaikërëëyi abhe ömötöbhu ko okoghera iya bhëënyu, okore mwamehe ko okohetera kö-öbhötöbhu ubhwaye.

Abharuumi 2:4

Waryobha n-wa heene bhököngʼu, nkukwabhera arë na ökököghömërrya bhököngʼu. Kasi uwe, nkwörökya örë igha, nkosera örë. Nyoore otakosera, n-kwakë otakomaaha öbhöntö ubhwa heene ubhwaye bhono akokora, ku bhuyö ohongore ëbhëbhë ibhyaho?

1 Yohana 2:2

Uyö we ikimwenso ikya ukutwighwerrania na Waryobha ku ukuruusya-ho ëbhëbhë ibhyëtö. Ghwiki të-bhëbhë ibhyëtö ibhyene igho hë, kasi kora na ëbhëbhë ibhya abhantö bhonswe igho abha ko-kebhara kono.

Tiito 2:14

Yaairuusiri ko okoghera iya bhëëtö, okore atutunguri ukurwa mo-bhosarya ubhwëtö bhonswe igho. Yaatunirë igha atosaabhuure, okore tobhe abhantö abhaaye abha heene, bhano bhairuusya okokora amangʼana amaiya.

Amangʼana agha Abhatomwa 2:38

Peetero akabhatëëbhya igha, “Kera ömöntö mö-bhëënyu muyö, ahongore ëbhëbhë ibhyaye, abhatiisibhwi ku iriina irya Yëësu Kiristo, okore aabherwe, ahaanwe ituho eno ërëngë igha, nu-Mwika Ömöhörëëru.

Mataayo 20:28

N-kya bhoora öni Omoona uwa Ömöntö, tenaasha igha abhantö bhantighinkanere hë, kasi naasha igha, ntighinkanere abhantö, na ukwiruusya öbhöhöru ubhwane, okore ntunguri abhantö abhaaru.”

1 Yohana 4:10

Righonshe rërëngë igha, ti-igha m-bëëtö twaatangatirë okohansha Waryobha, kasi we yaatangatirë okotohansha. Righonshe riyö, ndyo ryaaghërrë akatoma Omoona uwaaye, okore abhe ikimwenso ikya ukutwighwerrania na Waryobha, ku ukuruusya-ho ëbhëbhë ibhyëtö.

Amangʼana agha Abhatomwa 20:28

“Bhëënyu mwiraarerrenga abheene, na okonaghya bhuuya abhakumya. Umwika Ömöhörëëru we yaabhakora mobhe abhaimërërri abhaabho. Ko bhoora Yëësu, we yaabhatungurya okohetera ko-maanyinga aghaaye.

1 Peetero 3:18

Yëësu Kiristo wonswe n-kamwë igho yaakuurë ko okoghera iya ëbhëbhë ibhyëtö, okore atwighwerrani na Waryobha, kasi tiyaarë na ëbhëbhë bhyobhyonswe igho hë. M-möntö uwa heene yaarë. Yaaitirwë kinyamöbhërë, kasi ko obhotoro ubhwa Umwika Ömöhörëëru, akanyoora ghwiki öbhöhöru.

Abhaëfësö 3:8

Öni m-möntö moke ndë ko-bhantö abhahörëëru bhonswe igho abha Waryobha, kasi naahaaywë örööbhö urwa amaabhë aghaaye, okore ndaarekere Abhakyaro ubhwamë ubhwa Yëësu Kiristo. Ubhwamë bhuyö, tebhoona ekerengere hë. N-këköngʼu okomanyërribhwa na abhantö.

Amangʼana agha Abhatomwa 10:43

Uyö we abharööti bhonswe igho bhaaimërërrëëyë bharaghamba igha, ömöntö wowonswe igho ono arimukumya, naryabherwa ëbhëbhë bhyonswe igho, ko okohetera iriina irya Yëësu.”

Yohana 20:23

Ömöntö wowonswe ono moraabhere ëbhëbhë ibhyaye, uyö nabhëëywë. Na ono moraange ukwabhera ëbhëbhë ibhyaye, uyö taabherwe hë.”

Maariko 14:24

Akabhatëëbhya igha, “Ghano ngo amaanyinga aghaane agha Imuuma ghano ghareeteke ko okoghera iya abhantö abhaaru.

Tiito 3:6

Waryobha yaatöhömërrëëyë bhököngʼu Umwika Ömöhörëëru, ko okohetera ku-Yëësu Kiristo Ömötöörya uwëëtö.

1 Timoteo 2:6

Yëësu uyö, yaairuusiri umwene igha akwe, okore atunguri abhantö bhonswe igho. Kiyö nkyo ekemanyërryö keno Waryobha yaatohaayë ko-nkaagha eno umwene yaasëëmëri.

Abhakorosaai 2:13

Bhëënyu n-kya abhaku mwaarë ko okoghera iya ëbhëbhë ibhyënyu, kora temwarenga moraasaarwa esaaro iya ëbhëbhë ibhëënyu. Kasi Waryobha yaabhahaana öbhöhöru hamwë na Kiristo, hano yaatwabhëëyë ëbhëbhë ibhyëtö bhyonswe igho.

Abhakorosaai 2:2

Nkokora ndë igho, okore senkoro isyabho setereme, bhabhe ëkëntö ëkëmwë ku righonshe, bhanyoore obhongʼaini bhono bhoraaghere bhamanye bhuuya igha, Yëësu Kiristo we ësëëmyö iya Waryobha.

Abhakorosaai 1:27

Bhayö mbo Waryobha yaahanshirë igha abhahonyorre engʼana enene iyö iya ubhuhika eno yaakörrë ko okoghera iya Abhakyaro. Engʼana iya ikibhisirë iyö yo Kiristo ono arëngë mo-senkoro isyënyu, ghwiki we akobhahaana ubhweseghe igha moraasange ubhuhika ubhwa Waryobha.

Abhaëfësö 2:4

Kasi bhoono ko bhoora Waryobha naana amaabhë bhököngʼu, natohanshirë ku righonshe iryaye reno retaana umuhiko.

Abharuumi 9:23

Yaakörrë igho ko okoghera iya abhantö bhano yaasëëmëri igha, nakaabhaabhëëyë. Yaasëëmëri ghayö ukurwa kare igha, arebhahaana ubhuhika ubhwaye.

Amangʼana agha Abhatomwa 3:19

Ku bhuyö, mohongore ëbhëbhë ibhyënyu, mukyore ku-Waryobha, abharuusiri-ho ëbhëbhë ibhyënyu, okore siishe senkaagha sensambaaroku, isya okobha-ho ukwa Omonene. Hayö ho Waryobha araabhamuunyi ko okotoma Yëësu Kiristo.

Ruuka 24:47

Ko-maraghërryö aghaane, na ku ubhwera ubhwane, amangʼana ghano, ngareraarekwa ko-bhantö abha ibhyaro bhyonswe igho, ukusimirya Yërusarëëmu. Amangʼana ghayö, na-agha abhantö okohongora ëbhëbhë ibhyaho, okore bhaabherwe.

Ruuka 1:77

Nooreraarekera abhantö abhaaye igha, mbarëtööribhwa ku ukwabherwa ëbhëbhë ibhyabho.

Okohonyora 14:4

Abhantö bhayö, nkosoorana bharë Omoona Ringʼöndi ahasë hohonswe igho hano akughya. Tebhaarenga bhainyankuhiri ko okotaara na abhakari, ku bhuyö, nsi-ntindë bhaarë. Bhaatunguriibhwi ukurwa mo-bhantö abhandë, bhakakorwa ikimwenso ikya obhotongore ku-Waryobha bhaana Omoona Ringʼöndi.

Abhaëfësö 1:6

Ku bhuyö ni-igha tumukumi, ko okoghera iya örööbhö urwaye urwa ököröghöörya, rono yaatohaayë bhosa igho okohetera ku-Kiristo Yëësu ono Waryobha ahanshirë.

Mataayo 6:12

Utwabhere obhosarya ubhwëtö, kya bhono bhëëtö tukwabhera bhano bhakotosarrya.

Abharuumi 3:25

Waryobha yaakörrë Yëësu abhe ikimwenso ikya ukwighwerrania abhantö na Waryobha. Yaakörrë ghayö, okore abhantö bhaabherwe ëbhëbhë ibhyabho, ku ukukumya igha Yëësu Kiristo yaakuurë ko okoghera yaabho. Ni-igho Waryobha yaakörrë, okore ööröki abhantö igha, wa heene, ko bhoora yaaghömërrëëyi, tiyaabhashibhiri kö ëbhëbhë bheno bhaakörrë.

Abhaëfësö 1:8

Örööbhö n-dwaru bhököngʼu atohaayë, kora aghërrë tobhe na obhongʼaini bhwonswe igho, na okomanya bhuuya amangʼana.

Abhaëfësö 1:14

Umwika Ömöhörëëru uyö, n-kya ekebhete ikya Waryobha kö-bhëëtö igha, Waryobha naretohaana ëbhëntö ibhyëndë bhyonswe igho, bheno yaaraghaini igha, aretohaana. Umwika Ömöhörëëru uyö, we ono Waryobha yaatoora-ho okohekera hano aritutungurya bhëëtö abhantö abhaaye. Ku bhuyö ni-igha tumukumi ku ubhuhika ubhwaye.

Abhaëfësö 1:18

Ghwiki nkobhasabhera ndë igha, abhatöörri momanye obhoheene, okore momanye ubhweseghe bhono yaaraghaini kö-bhëënyu hano yaabhabhërëkëëyë. Momanye ubhwaru ubhwa obhongʼoore ubhwaye bhono yaaraghaini igha akaahaayë abhantö abhaaye.