1 Yohana 4:4 - Imuuma Eehya

⁴ Bhëënyu abhaana abhaane abhaghonshe, m-baana abha Waryobha mörë. Kora mwaanga amangʼana agha abharööti abha obhorongo bhayö. Mwaanyoora obhotoro ubhwa okokora igho, ko bhoora Umwika Ömöhörëëru uwa Waryobha mö-bhëënyu arë. Umwika Ömöhörëëru uyö, we aana obhotoro okokera ëkëhwë ikya Oghosambwa, kiyö kekotangata abhantö bhano bhatakwighwera Waryobha.

1 Yohana 4:4 Referans Kwoze

Abharuumi 8:31

Bhoono iyakë tokaaghamba ko-mangʼana ghayö? Hano oraanyoore nku-kiina ikya Waryobha törë, m-maheene ömöntö uwa okotobhaaha, taaho hë.

1 Yohana 5:4

Nkoghamba ndë igho ko bhoora igha, kera omoona uwa Waryobha, naana obhotoro ubhwa ukwanga obhoghogho ubhwa ko-kebhara kono. Obhoghogho bhuyö, nkubhwanga törë ku ukukumya Yëësu Kiristo.

Abharuumi 8:37

Ntokaanyoora inyanko yoyonswe igho, kasi bhëëtö ntoraaghëndërri okobhaaha, ko bhoora Kiristo ono atohanshirë we akötötöörrya.

1 Yohana 4:16

Bhëëtö ntomanyirë, kora nkukumya törë igha, Waryobha natohanshirë. Waryobha we righonshe. Ömöntö wowonswe igho ono akobha na righonshe, we aana öbhömwë na Waryobha, na Waryobha wonswe, nkobha arë na öbhömwë na ömöntö kya uyö.

1 Abhakörintö 2:12

Bhëëtö, tetwahaanwa enkoro iya ko-kebhara kono, kasi nu-Mwika ono akurwa ku-Waryobha we twaahaanwa, okore tomanye amangʼana ghano Waryobha yaatohaana bhosa igho.

1 Yohana 5:19

Ntomanyirë igha, bhëëtö m-baana abha Waryobha törë. Kasi abhantö abhandë bhonswe igho bhano bhatakwighwera Waryobha, bhayö nkobhaahwa bharë na Oghosambwa.

1 Yohana 4:13

Bhëëtö ntoona öbhömwë na Waryobha, umwene wonswe naana öbhömwë na bhëëtö. Ntomanyirë igho, ko bhoora yatohaana Umwika uwaaye.

Abhaëfësö 6:10

Amangʼana aghaane ghano nkobhatëëbhya agha okomarërrya ni-igha, monaghe ko-Monene Yëësu, mutighe abhahaane singuru na obhotoro ubhwaye obhonene.

Abhaëfësö 3:17

okore Yëësu Kiristo amenye këmwë mo-senkoro isyënyu ku umukumo ghono moonagho. Ndabhasabha igha, möghëndërri okohanshana. Righonshe n-kya imiri, imiri nkokora ghërë ëmëtë ghenagha, kora ghwiki n-kya inyumba eno ehaghaashirwë ku-musingi.

Okohonyora 12:11

Abhakumya bharikyëtö, bhaanyöörrë singuru isya okobhaaha Oghosambwa okohetera ko amaanyinga agha Omoona Ringʼöndi, na ko okoghera iya ubhwimërërri bhono bhaamwimërërrëëyë, ko bhoora tebhaatöniibhwi na öbhöhöru ubhwabho hë. Mbaaikërëëyi ukukwa, ko okoghera iya ukukumya Omoona Ringʼöndi.

1 Yohana 3:24

Ömöntö wowonswe igho ono akwighwera imighiro ighya Waryobha, uyö naana öbhömwë nawe. Waryobha wonswe naana öbhömwë na ömöntö kya uyö. Ntomanyirë igha, Waryobha naana öbhömwë na bhëëtö, ko okohetera Umwika Ömöhörëëru ono yaatohaana.

Yohana 12:31

Bhoono enkaagha iya Waryobha iya okobhotorra ekebhara keno ikiina, ihikirë. Bhoono Oghosambwa ghono ghokotonga ko-kebhara kono, ngoraatabhutwe kebhara iyö.

Yohana 17:23

öni neena öbhömwë nabho, na uwe noona öbhömwë na öni. Ku bhuyö nkosabha ndë bhahekeranibhwi kö-bhömwë ubhwabho. Engʼana iyö yo eraaghere abhantö abha ko-kebhara kono bhamanye igha, nu-uwe waantoma, okahansha abhasoorani abhaane bhayö, kya bhono onhanshirë.

1 Yohana 4:6

Bhëëtö m-baana abha Waryobha törë. Ömöntö wowonswe ono amanyirë Waryobha, nkutwitegherra arë. Kasi ono atarë omoona uwa Waryobha, takutwitegherra hë. Ku bhuyö ni-igho tokotora okomanya na ukwahora abhantö bhano bhakotangatwa na Umwika Ömöhörëëru uwa obhoheene, na bhano bhakotangatwa na ëkëhwë ikya obhorongo.

2 Abhakörintö 6:16

M-borengerrania kë bhooho, inyumba iya Waryobha na ëbhëtöndö? Bhëëtö mbo inyumba iya Waryobha ömöhöru! N-kya bhoora Waryobha yaaghambirë igha, “Nendaabhenga ghatë iyaabho, ndaghenda hamwë nabho. Nendaabhe Waryobha uwaabho, na abheene bhonswe mbaraabhe abhantö abhaane.”

1 Yohana 2:13

Bhëënyu bhaataata, nkobhandekera ndë ko bhoora momanyirë Yëësu Kiristo, ono yaarenga-ho ukurwa okosemoka. Nkobhandekera ndë bhëënyu abhamura, ko bhoora mwabhaaha Oghosambwa. Nkobhaadekera ndë bhare abhaana, ko bhoora mmomanyirë Taata Waryobha.

1 Abhakörintö 6:13

Abhantö abhandë bharaghamba igha, enda n-ko okoghera iya ibhyakorya, na ibhyakorya n-ko okoghera iya enda. Kasi bhyonswe igho bhibhërë bhiyö, enda na ibhyakorya, Waryobha naribhiruusya-ho. Kasi ömöbhërë te-ko okoghera iya obhosooraare hë, kasi n-ko okoghera iya Omonene uwëëtö, na Omonene n-ko okoghera iya ömöbhërë.

Abhaëfësö 2:2

Enkaagha iyö, mwaakoranga amangʼana agha ko-kebhara kono. Kora mwaasorananga omotangati omoghogho uyö, Omonene uwa singuru isya ighörö isya amasambwa. Uyö we bhoono igho akokora emeremo mo-bhantö bhano bhatakwighwera Waryobha.

Yohana 16:11

Ko amangʼana agha okobhotorrwa ukwabho ikiina, n-ko bhoora Oghosambwa ghono ghokotonga ko-kebhara kono, ghwamara okobhotorrwa ikiina.

2 Abhakörintö 4:4

Amangʼana Amaiya teghakomanyekana ko-bhantö bhayö, ko bhoora Oghosambwa, oghokama ughwa ekebhara keno, ghoroghaini emetwe ighya abhantö bhano bhatakukumya. Nkyo kekoghera bhatakomaaha obhorabhu ubhwa Amangʼana Amaiya agha emerengaari ighya Yëësu Kiristo, uyö we ituubho iya Waryobha.

Yohana 14:30

Öni tentore ukushumaasha na bhëënyu ku-ribhagha ritambë hë, ko bhoora Oghosambwa öghötöngi ughwa ekebhara keno ghoraasha. Kasi teghoona ubhwera bhwobhwonswe igho ku-öni hë.

1 Yohana 2:1

Bhëënyu abhaana abhaane abhaghonshe, nkobhandekera ndë amangʼana ghano, okore motakaakora ëbhëbhë. Kasi ömöntö wowonswe igho hano araakore ëbhëbhë, amanye igha ntoona ono akotosabhera ko-Taata Waryobha. Uyö we Yëësu Kiristo, ömöntö uwa heene.

1 Yohana 3:20

Nokaanyoora torashuutwa mo-senkoro isyëtö igha m-ba ëbhëbhë törë, kasi ntoona omorembe, ko bhoora ntomanyirë igha Waryobha, we omonene okokera senkoro isyëtö, kora namanyirë amangʼana ghonswe igho.