1 Peetero 2:21 - Imuuma Eehya

²¹ Ni-igha möghömërri, ko bhoora Yëësu Kiristo umwene yaatësëkirë ko okoghera iya bhëënyu. Ko okokora ghayö, akabhateghera ëkërëngyö, okore mweghenga okokora kya igho.

1 Peetero 2:21 Referans Kwoze

1 Yohana 2:6

Hano ömöntö yaghamba igha aana öbhömwë na Waryobha, ni-igha abhe kya bhono Yëësu yaarë.

Mataayo 16:24

Ho Yëësu yaamarrë akatëëbhya abheegha abhaaye igha, “Ömöntö wowonswe ono akutuna igha ansoorane, ni-igha aikaane umwene, aiteeke omosarabha ughwaye, ansoorane.

Yohana 13:15

Mbakörëëyë ëkërëngyö, ku bhuyö mokorenga kya bhuyö mbakörëëyë.

Abhaëfësö 5:2

Mohanshe abhantö abhandë, kya bhono Yëësu Kiristo yaatohanshirë akatukwera, akabha esadaaka na ikimwenso ikyëtö ikya ukurumbaasa bhuuya ku-Waryobha.

1 Yohana 3:16

Hano Yëësu Kiristo yaaruusiri öbhöhöru ubhwaye ko okoghera iya bhëëtö, yaatwörökëri righonshe irya obhoheene. Kora bhëëtö bhonswe ni-igha turuusi öbhöhöru ubhwëtö, ko okoghera iya abhakumya bharikyëtö.

1 Peetero 2:24

Yëësu yaaghëghirë ëbhëbhë ibhyëtö kö-möbhërë ughwaye, kora akahanekwa ko-mosarabha. Yaakörrë igho, okore ëbhëbhë bhetakaatobhaaha ghwiki, okore tobhe na öbhömënyi bhono bhökötëghërya Waryobha. Bhëëtö twaahona ko okohetera okotemwa ukwaye.

1 Abhakörintö 11:1

Ku bhuyö mweghe amangʼana aghaane, kya bhono öni nkwegha amangʼana agha Kiristo.

1 Peetero 4:1

Mbe, ko bhoora Yëësu Kiristo yaatëësirwë kö-möbhërë ughwaye, bhëënyu bhonswe mwisëëmi okoteeseka kya we. Nkoghamba ndë igho, ko bhoora igha, ömöntö ono amarrë koteeseka kö-möbhërë ughwaye, uyö takobhaahwa na ëbhëbhë hë.

Abhafiripi 2:5

Mobhe na enkoro eeraeera Kiristo Yëësu yaarë nayo.

Mataayo 11:29

Öni m-mohaabhu ndë, na ubhwihöötu nu-bhwane. Ku bhuyö mwibhohere ijööki iyaane, mweghe ku-öni, ho ndaabhahaane omorembe mo-senkoro isyënyu.

Abharuumi 8:29

Waryobha yaamanyirë abhantö abhaaye kora ataraabhomba ekebhara. Bhayö mbo yaashaaghööyë bhabhe kya bhono Omoona uwaaye Yëësu Kiristo arë. Yaakörrë igho, okore Omoona uwaaye Yëësu Kiristo uyö, abhe omotangi ko-bhakumya abhaaru abha Waryobha.

Amangʼana agha Abhatomwa 14:22

Bhakaheta mu-mighi ghiyö bharatërëmya abheegha abha Yëësu, okore bhaghëndërri okobha na umukumo. Mbaabhatërëmyanga ko okobhatëëbhya igha, “Ni-igha tohetere mu-nyanko insharu, totaraasoha mo-Bhokama ubhwa Waryobha.”

1 Peetero 3:18

Yëësu Kiristo wonswe n-kamwë igho yaakuurë ko okoghera iya ëbhëbhë ibhyëtö, okore atwighwerrani na Waryobha, kasi tiyaarë na ëbhëbhë bhyobhyonswe igho hë. M-möntö uwa heene yaarë. Yaaitirwë kinyamöbhërë, kasi ko obhotoro ubhwa Umwika Ömöhörëëru, akanyoora ghwiki öbhöhöru.

Mataayo 10:38

Ömöntö wowonswe ono ataikërri ukunyoora inyanko iya okonsoorana, uyö taingʼarëëyë okobha umwegha uwaane hë.

1 Peetero 3:9

Motakaahakanga ikisiiyomba ko abhantö, handë okotoka ömöntö ono akötökirë, kasi engʼana inshiiya ko-bhantö kya bhayö, no-kobhakorra ubhwa heene. Ghayö ngo mwaabherekerrwa igha mokore, okore mongʼoorwe.

Yohana 16:33

Mbatëëbhëri amangʼana ghayö, okore mobhe na omorembe ko bhoora moona öbhömwë na öni. Moona inyanko ko-kebhara kono, kasi motakaakwa emetwe, ko bhoora öni nabhaaha ekebhara keno.”

Okohonyora 12:11

Abhakumya bharikyëtö, bhaanyöörrë singuru isya okobhaaha Oghosambwa okohetera ko amaanyinga agha Omoona Ringʼöndi, na ko okoghera iya ubhwimërërri bhono bhaamwimërërrëëyë, ko bhoora tebhaatöniibhwi na öbhöhöru ubhwabho hë. Mbaaikërëëyi ukukwa, ko okoghera iya ukukumya Omoona Ringʼöndi.

Abhaëbhuraania 2:10

Waryobha we yaabhomba ëbhëntö bhyonswe igho, akabhetoora bhuyö bhërëngë. Yaatëghëribhwi okoreeta abhantö abhaaru mu-bhuhika ubhwaye, ku bhuyö yaakörrë Yëësu ahekerane ko okohetera amateeso ghayö yaanyöörrë. Yëësu uyö, we esemoko iya öbhöhönia.

2 Timoteo 3:12

Mbe, bhonswe igho bhano bhakukumya Kiristo Yëësu, na bharatuna igha bhabhe na eteemo iya okosooka Waryobha, bhonswe mbaranyankibhwinga.

1 Peetero 1:20

Waryobha yaamwahööyë ukurwa kare kora ekebhara ketaraabhombwa, ko okoghera iya ësëëmyö iyaaye. Kasi akaghanya okohekera ko-nkaagha iya umuhiko eno, akamoreeta, akamotoora harabhu igho ko-bhantö bhonswe igho abha ko-kebhara kono. Yaakörrë ghayö ghonswe igho, ko okoghera iya bhëënyu.

1 Abhatësarönikë 4:2

Ko bhoora mmomanyirë bhuuya amaraghërryö ghano twaabharaghërrëëyi ku ubhwera ubhwa Omonene Yëësu.

1 Abhatësarönikë 3:3

Ntwaakörrë igho, okore ömöntö wowonswe atakaakwa omotwe ku ikibhuno ikya inyaanyi eno mukunyoora. Bhëënyu mmomanyirë igha, ni-igha tohetere mu-nyaanyi muyö.

Amangʼana agha Abhatomwa 17:3

Akatona amangʼana, arabharahorra kya igho ghaarë igha Yëësu nakaatëësirwë, aitwe, hano akomara, aryoke ukurwa mo-bhaku. Pauro akabhatëëbhya igha, “Yëësu uyö nkobhatëëbhya amangʼana aghaaye, we Kiristo.”

Amangʼana agha Abhatomwa 9:16

Nendaamwöröki kya igho araatundësibhwi bhököngʼu, ko okoghera iya iriina iryane.”

Ruuka 24:26

Kasi tiyaarë igha, Kiristo ateeswe, na asohe mu-bhuhika ubhwaye?”

1 Peetero 4:13

Kasi bhoono bhëënyu mushomerwe igha, nkunyoora mörë inyaanyi, kya bhoora Kiristo yaanyöörrë. Bhoono ni-igha, mushomerwenga, okore muushe kushomerwa bhököngʼu, hano ariisha na ubhuhika ubhwaye bhötöörwë harabhu igho.