Yeremi 7:13 - NQAARIIT NE ROOG

¹³ Ndiiki koy, mi o Yaal oxe, mexe layaa a nuun ee nu mbi’a a pi akeene fop. Roog fuu feedna um lay fa nuun, too nu nan-gilooxee, um xoy a nuun boo naag cat, too nu njaaɓee.

Yeremi 7:13 Referans Kwoze

Esayi 65:12

mi o mat jagandanu a nuun fa nqon fa nqanqaar. Nuun fop xan nu ngooknoox, ndax nu nqirsel, yaam kaam xoy a nuun, nu njaaɓee, um lay fa nuun, nu mbañaam o nan-giloox. Ke faaxeerna na kid es doŋ nu mbi’u, too ke feleeraxama nu njilu.»

Yeremi 7:25

No kaa xotitna no ñaal naa daan nuun a sutoorna no saax laa Misira, a gar fa xaye, kaam lultiidoogu a nuun duleer we dag es, roog fuu feedna um luliid a den.

Xa peƭit axe 1:24

Kaa koy, kaam xoy a nuun, nu nqox, um letin xa ƥay es, ndaa fidee o leng na nuun.

Mace 23:37

«Yeerusaleem, Yeerusaleem, wo fee na saŋkaa duleer we, wartaa a kac we luliideena me wo, a caf a mayu bug’aam o fokat xa ƥeef ne a cek a fokatta xa ñeek um yoora a nafir um, too nu mbañ!

Sakari 7:13

Feek nan-gilooxee, ye um xoyaa a den, mi itam nan-gilooxiim, ye da ƈufginooxaxama. Mi o Yaal oxe Hupna fop layun.

Hoose 11:7

Xeet es kaa nqar no mbesaam a cinj. Kaa nqoyel me na mi fee Took-ee-took, ndaa o leng na den inooxee.»

Hoose 11:2

Kaa koy, lakas a nqoyaan, ta fesaam ndiiñ, a ɓoxotaa a Baaliin sadax, a doxanaa nitaal roog ke cuuraay.

Yeremi 44:4

Kaam gen no luliidaa a nuun duleer we dag es ñaal oo ñaal, ndax da lay a nuun ee: ‹Mbaasyo a pi a cednooxu leene sibuuma!›

Yeremi 35:17

Ten taxu, keeke layum, mi o Yaal oxe Roog fee Hupna fop, Roog fee Isra’el: Xam hebliid took xeet fee Yudaa fo took we ngenna Yeerusaleem fop taamaala fee regdinooxuuma a den fop, yaam kaam lay fa den, too nan-gilooxiraam, um xoy a den, da mbañaam o njaaɓ.»

Yeremi 35:15

Lultiidaam a nuun duleer we dag es fop, roog fuu feedna um luliid a den, ndax da lay a nuun ee: ‹Mbesyo a cinj a ƭat a paaxeer ale nuun, supit a pesoorooƭ nuun too ba nu ndeef roog lakas ke, ndax nu mbaɗoox a den.› Yaaga, xan nu ngen no saax le ci’uuma a nuun, nuun fo daan nuun. Kaa koy, nu ndungee nof nuun, nu nan-gilooxiraam.

Yeremi 25:3

«No kaa xotitna no hiid xarɓaxay fo o hiid o dadkandeer ole no maat Yosiya fee o ƥiy Amon too a ref o maad Yudaa, a gar fa xaye, xa kiid qarɓeen ƭik fo xa kiid xa tadaq axey axaa um daawaa fa lay fee no Yaal oxe, yegnan a nuun roog fuu feedna, ndaa nu nan-gilooxee.

Yeremi 11:7

Yaam kaam maƭooxoogu daan nuun no kaa xotitna a koom alaa suttuuma a den no saax laa Misira, a gar fa xaye. Kaam maƭooxoogu a den roog fuu feedna yee: Nan-gilooxyo o ñuxur es!

Esayi 66:4

mi itam, xam sawar no xijil a den soo ɓisiid me den paaxeer kaa da saɗarna, yaam kaam xoy, ndaa o leng na den jaaɓee, um lay fa den, da mbañ o nan-giloox. Ke faaxeerna na kid es doŋ a mbi’u, too ke feleeraxama a njilu.»

Esayi 50:2

Ye garuuma, xar taxu soƥiim meen o leng? Ye xoyuuma, xar taxu jaaɓaandeem? Ndax o ɓay es a raƥa raƥ boo waagee o mucil? Ndax kaa jegiim doole faa wattuuma? Aca i ndet boog! Kaam weernitaa o maag ole fa lay es, supit xa quluɓ axe a koƥ-a-ƥor boo liƥ ke a nqonaa fo a koɗom yaam ne foofi a ñakna soo a mbotaa.

Yeremi 13:11

Yaam kat, ne o koor a humnoortaa o kumnoor no ndet um, neene humnoorit’um maat ne Isra’el fop fo ne Yudaa fop, ndax da ndef xeet es, o niwel es, a simat es fo kelax es. Kaa koy, nan-gilooxee.» O Yaal oxe layun.

Yeremi 26:5

nan-giloox fa lay no duleer we dag es um lultiidaa a nuun roog fuu feedna, too nu nan-gilooxee a den.

Yeremi 32:33

Kaa mbesaam ndiiñ, a mbañ o ƭeetaam. Ke aqatinuuma a den roog fuu feedna fop oo, nan-gilooxee, ndax da njaɓ a maƭax es.

Yeremi 35:14

Yoonadab fee o ƥiy Rekab a xañta xa taan um da yer biiñ, too a ngayaan. Boo xaye sax yeree biiñ, yaam a nananaa ke o taan den a heblitna. Mi o mat, layaam fa nuun roog fuu feedna, ndaa nu nan-gilooxiraam.

Yeremi 44:23

Yaam ne nu ndoxanna roog can cuuraay, mbakaad no Yaal oxe, yaam ne nu nan-gilooxeerna o ñuxur no Yaal oxe too nu ndeefee kebil um, bargal um fo a cangin um, taxu taamaala feeke a dal a nuun, ne ta refitna xaye.»

Yeremi 5:21

Nan-gilooxyo kene, nuun xeet fa ƥodaxu too a ñak-yiif. Nu njega a kid, ndaa nu mbaagee a ka, njeg nof, ndaa nu mbaagee o nan.

Yeremi 6:10

An um layitkaa? Ndi an um raagooxkaa, ndax um nan-gilooxel? Nof ke den kaa sux, mbaagee o nan-giloox muk. Fa lay fee no Yaal oxe kaa ref na den calat, mbugiran.

Yeremi 11:8

Kaa koy, nan-gilooxee, ndungee nof den. Kaa nqox no saƭik xoox o faaxeer ole den. Maaga, fadnaam took den a maƭax es fop, yaam ndeefee bargal ke no ngiɓoor neene hebil’uuma a den.»

Yeremi 13:10

Xeet fa soxodu feene kaa mbañ o nan-giloox fa lay es. Kaa nqox no saƭik xoox ole den, a ngiɓoor fo roog lakas, ndax da mbaɗoox a den soo a ngungaa mbaambir den. Xan a nand nen o kumnoor olene jiriiñateerna tus.

Yeremi 29:19

yaam nan-gilooxee fa lay es, den we um lultiidaa roog fuu feedna duleer we dag es. Nuun o mat oo, nu nan-gilooxee a den. Mi o Yaal oxe layun.›

Hoose 9:17

«Roog es xan a deɓ a den, yaam nan-gilooxiran, too xan a njoqooyooxaa a ndeer qeet lakas ke.»