Yeremi 32:44 - NQAARIIT NE ROOG

⁴⁴ Xan xa qol a njikteel xaaliis, a kayit a cikir a mbindel, a mbegtel o ñaasir, seede a mbaaƭel kam saax le Bensame, me widna a Yeerusaleem, kam teeru ke Yudaa, kam teeru ke no jegel ole na xa coong axe, kam teeru ke no jegel ole na yulanq ake fo kam teeru ke no jegel ole no ɓemb-roog o ñamaak. Yaam xam nomtiid we ƥiseena gilaa saax took o hup doole.» O Yaal oxe layun.

Yeremi 32:44 Referans Kwoze

Yeremi 17:26

Xan wiin a inoortiid no teeru ke Yudaa fo me widna a Yeerusaleem, no jegel ole Bensame, no le na yulanq ake, no le na xa coong axe fo no ɓemb-roog o ñamaak, a ƥisiid kam Mbind ne no Yaal oxe sadax toxel, sadax lakas, sadax tuufe-duufe fa cuuraay, a ƥisiid o Yaal oxe itam sadax fa ngidmir.

Yeremi 33:26

yaaga waagkoogaam o deɓ xa taan axe Yakoob fo axe Dawid fee o tag es, fañat o xotit na xa taan um waa na maadooxkaa took xa taan axe Abraham, Isaak fa Yakoob. Kaa koy, xam nomtiid we ƥiseena gilaa saax took o hup doole na den soo yirim a den.»

Yeremi 33:7

Xam nomtiid we ƥiseena gilaa saax took o hup doole na Yudaa fo we na Isra’el, dalnatin a den nen yaaga.

Yeremi 32:10

Bindaam a kayit a cikir, wegtin o ñaasir es, waaƭ seede soo peese’it xaaliis fee a poox.

Yeremi 32:37

‹Mi koy, xam fokatit a den na saax ake fop pasar’uuma a den kam fuux es, kam o say es fo no ngañak es. Xam nomtiid a den no mbiñ onqene, gennoor a den teen fo o woor.

Esayi 44:26

Kaam fadnaa fa lay no tag es soo fadnaa padafuleer ke duleer we mi a yegnitna. Kaam layaa a Yeerusaleem ee: ‹Xan o genel›, soo teeru ke Yudaa, um lay a den ee: ‹Xan nu maxatinel›, too xam inatin ke yaq’eena teen fop.

Yeremi 13:19

Teeru ke no ɓemb-roog o ñamaak kaa mbegel, o leng wetatee tokand ke den, yaam xeet fee Yudaa fop a ƥise took o hup doole, a ƥise took o hup doole ne da mbodeena fop.»

Yeremi 30:3

Ñaal key a ngaraa, kaa um nomtiidkaa we na xeet es, Isra’el fa Yudaa, ƥiseena gilaa saax took o hup doole, nomtiid a den no saax le ci’uuma daan den, too xan a njegkin. Mi o Yaal oxe layun.› »

Yeremi 31:23

Keeke o Yaal oxe Roog fee Isra’el Hupna fop a layu: «Keeke na laykahineel kam saax le Yudaa fo kam teeru ke ten, yaa um nomtiidkaa we ƥiseena gilaa saax took o hup doole na den: ‹Yaasam o Yaal oxe a barke’ong, wo o joong o tedu le Siyoŋ, ngenand o cofel ne.›

Yeremi 33:13

Kam teeru ke no jegel ole na xa coong axe, kam teeru ke no jegel ole na yulanq ake, kam teeru ke no ɓemb-roog o ñamaak, no saax le Bensame, me widna a Yeerusaleem fo kam teeru ke Yudaa xan a ked ake a ndeefahin teen no ɓay no kaynaak oxe na limaa a den.» O Yaal oxe layun.

Abjaas 1:19

Yuuyudaa we no ɓemb-roog o ñamaak xan a njang xa coong axe Esawu, we no saax le na yulanq ake no mudand ne a njang saax le no Fiifilista we. Xan a njang o fiisel ole Efrayim fo ole Samari, Beebensame we mat a njang a Galaad.

Abjaas 1:20

Ii-isra’el we ƥiseena gilaa saax took o hup doole xan a ndefat a yaj no xiixire maak, a njangit no saax le no Kaakanaan we boo Sarepta. We ƥisteena Yeerusaleem, ndefatna Sefarad, xan a njang teeru ke no ɓemb-roog o ñamaak ole Yudaa.

Sofoni 2:7

A ƥeeraamb akeene xan a ndefan we yoqna no mbind Yudaa. Meene a mbugko ngayaa, soo no yeng ole, da mbondook kam pind ke Askalon. O Yaal oxe Roog den xan a topatoox a den, a supit o roxanqol ole den.

Sakari 7:7

Ndax keene refee fa lay fee o Yaal oxe a layna a reefandin no duleer we yaaga, ye Yeerusaleem a geneena too a ref no yaadax, ten fo teeru ke mbiduuna, soo o jegel ole no ɓemb-roog o ñamaak fo ole na yulanq ake a ngenel itam?

Yeremi 30:18

Keeke o Yaal oxe a layu: «Xam xendandatin ƭiif ke Yakoob, yirim kenand ke ten, teeru fuu refna a maxatinel na pec um, mbind mosu nuu refna a daknel na seek a ndigil um.