Yeremi 26:13 - NQAARIIT NE ROOG

¹³ Ndiiki koy, supityo a pesoorooƭ nuun fo a pi nuun, nan-giloox o ñuxur no Yaal oxe Roog nuun. Yaaga xan o Yaal oxe a ricoox paaxeer ke ta waajan’ina a nuun.

Yeremi 26:13 Referans Kwoze

Yoona 4:2

Keeke refu ke ta xeɗ’ina o Yaal oxe: «O Yaal oxe, keene o mat saɗaroogum, ye maad’uuma o refaa no saax es, too ten taxu um ñof’u o ƴufaa farna fa Tarsis. Andaam koy ee Roog fa laabiiru fa mayu yirmande refo. Kaa o muñ, may fo o paaxel, too kaa o ricooxaa paaxeer ke yuuɓoona.

Yoona 3:9

Neene, xeƈa xan Roog a supit pexey, a waas fuux maak le ten, soo a fañ o warnoor a in.»

Esayi 1:19

Boo nu njaɓna o nananaam, xan nu ñaamaa paax ke no saax le.

Hebre 5:9

Neene a ñaktu sik, boo a refat a cur a muc a pagkeer ale no we nananuuna fop.

Yowel 2:14

Xeƈa xan o Yaal oxe Roog nuun a supit a qalaat soo a barke duufe le nuun. Maaga, xan nu mbaagahinin o ƥisiid sadax tuufe-duufe fa sadax biiñ.

Yeremi 38:20

Yeremi a doonaan ee: «Ɓoxotkaandee. Nan-gilooxi o ñuxur no Yaal oxe ne laytoonga o ten, yaaga xan a malong, too xan o mucil o ñis of.

Yeremi 36:3

Xeƈa xan wiin we Yudaa a and taamaala fee yuuɓanuuma a den fop, ndax da mbes a cinj a ƭat a paaxeer ale den. Maaga, xam waasanit tooñ den fo pakaad den.»

Yeremi 35:15

Lultiidaam a nuun duleer we dag es fop, roog fuu feedna um luliid a den, ndax da lay a nuun ee: ‹Mbesyo a cinj a ƭat a paaxeer ale nuun, supit a pesoorooƭ nuun too ba nu ndeef roog lakas ke, ndax nu mbaɗoox a den.› Yaaga, xan nu ngen no saax le ci’uuma a nuun, nuun fo daan nuun. Kaa koy, nu ndungee nof nuun, nu nan-gilooxiraam.

Yeremi 26:19

Ndax Hiskiya fee o maad Yudaa fo we Yudaa fop a mbarnoor’aan? Ndax Hiskiya saɗar’ee o Yaal oxe? Ndax ƴufginoox’ee o Yaal oxe? Maaga, o Yaal oxe a ricooxa paaxeer ke ta waajan’ina a den. In o mat, i mbug o ngadin a qoox in paaxeer magnitu neene!»

Yeremi 26:3

Xeƈa xan a nan-giloox, a mbes a cinj a ƭat a paaxeer den. Maaga, xam ricoox paaxeer ke yuuɓan’uuma a den yaam kañaan ne na pi den.

Yeremi 18:8

Kaa koy, boo xeet feene a fesna a cinj ke taxna um fuuxanin, xam ricoox paaxeer ke yuuɓan’anuuma.

Esayi 55:7

Fat o soxodu xe a waas a ƭat um, o piifi paaxeer oxe a supit a qalaat um. Fat a ngeleeroox farna fo o Yaal oxe na yirimkaa a den, a njaɓnoox na Roog in fee na waasantaa boo ta dey sik.

Heseki’el 33:11

Layi a den ee: Ne ta wooritna yee mexe ñoowaa, mi o Yaal oxe na refkaa boo faw layun: O soxodu xe a saŋkoox moƴaniraam, ke buguuma kañ refu yee ta supit a pesoorooƭ soo a muc. Nomtooxiidyo, kaam ee nu nqaƴ a ƭat a paaxeer ake nuun. Ndi xar taxu nu mbug o nqon, nuun mbind Isra’el?

Yeremi 42:10

‹Nu saxangaa tigi no saax lene, xam maxatin a nuun nu ndefat xeet too yaqkatiim a nuun, xam jimb a nuun too fuurkatiim a nuun. Maaga, xam ricoox paaxeer ke fi’uuma a nuun.

Haahate we 2:18

Mbanuu o Yaal oxe a sutanna a den o kaahate, a refooga fo ten, a wataa a den na xa ƥay no fañ den no ñoow ole no kaahate xeene fop, yaam o Yaal oxe a yirmooga a den yaa da iinaa no we ñagadiloogna a den fo no we ngal’andoogna a den.

A cangatin ale 32:36

O Yaal oxe xan a ɓoxot xeet um ɓur, a yirim dag um, yaa ta ga’na yee doole den a naaga tak, fop a fagat.

A sutax ale 32:14

Cinj a qeƭax alaaga, o Yaal oxe a waasa paaxeer ke ta yuuɓan’ina xeet um.

Yeremi 11:4

Dalnanaam a den daan nuun a koom alaa suttuuma a den no saax laa Misira, a kaleera cawir celem ale, lay ee: Nan-gilooxyo o ñuxur es too mbi fop ke dalnanuuma a nuun, yaaga xan nu ndef xeet es, soo um ref Roog nuun.

Yeremi 18:11

Ndiiki koy, layi wiin we Yudaa fo we ngenna Yeerusaleem ee: Keeke o Yaal oxe a layu: Mexe fexeyanaa a nuun taamaala, yuuɓanaa a nuun yuuƥ paaxeer. Fat oxuu refna na nuun a fes a ƭat a paaxeer um a cinj. Njagandatinyo a ƭat nuun fo a pi nuun.