Sakari 1:12 - NQAARIIT NE ROOG

¹² Maaga, malaaka fee no Yaal oxe a laya yee: «O Yaal oxe Hupna fop, xa kiid qarɓeen ɓetuu ƭik axey axaa fuuxanoona a Yeerusaleem fo teeru lakas ke Yudaa. Ndi neeke o fañkaa o yirim a den boo a mban?»

Sakari 1:12 Referans Kwoze

Sakari 7:5

«Layi xeet fee no saax le fop fo saasadax we yee: ‹Ye nu ngooraa soo ƭomatooxaa no nqool o ƥetkandeer fo no ɓetuu ƭikandeer onqe boo xa kiid qarɓeen ɓetuu ƭik a gar fa xaye, ndax no ndigil mi nu ngooranoogu?

Dañel 9:2

Mi Dañel, ɓaaloogaam a safe ke no duleer we boo ga ee o Yaal oxe a yegin’a o tuleer Yeremi yee xan Yeerusaleem a fes a pec boo xa kiid qarɓeen ɓetuu ƭik.

Yeremi 29:10

Kaa koy, keeke o Yaal oxe a layu: ‹Yaa xa kiid qarɓeen ɓetuu ƭik axe a mbadnooxkaa na Babilon, xam topatooxahin a nuun, fadnan a nuun a tegit es, nomtiid a nuun no mbiñ onqene.

A kim a tedu ke 102:13

Wo o Yaal oxe o mat, xan o maadaa boo kili, too gon of xan a ref no suk boo no suk.

A kim a tedu ke 74:10

Wo Roog, o pañ oxe kaa bugko paaƈang neeke boo a mban, o noon oxe a gen no xaadnooxang?

Mbeeñil 6:10

Kaa mbalalooxoogu a maak ee: «O Yaal o tedu fo o tigil oxe, boo a mban o cungkaa ndax o hate we ngenna na adna fee, xaw a den, yaam ne da mbar’ina a in?»

Sakari 1:8

Kam o yeng ole, daawaam mbeeñil nene: Ga’aam o koor oxaa ŋaayna pis jakeer soo a geenoox a ndeer pafid mirti kam a yulanq, too a jeg’a a cinj um pis jakeer fo oldu fo bari.

2 Caloori ke 36:21

Neene, ke o Yaal oxe a lay’ina, a reefandin no tuleer Yeremi a fadnooxa: «Xan saax leeke a xaƴel boo xa kiid qarɓeen ɓetuu ƭik ndax ta rafoox camaane ke na ñootnax ale ndeef’andeena ne waritna.»

Hebre 7:25

Ten taxu, ndiiki Yeesu a waaga o mucil boo faw we na matiidaa a Roog na pexey um, yaam oxe ñoowaa boo xaye, ndax ta xeɗanaa a den a Roog.

Esayi 63:9

Kam naqad den fop, refee oxaa luleena mbaat malaaka, ndaa mukit um sax sax muclu a den. Ten fa xoox um a wata a den no mbeq um fo na yirmande um. A meeɓa a den soo a gadoox a den no ñaal ke yaaga fop.

A kim a tedu ke 69:5

We sibaxama ngupu wiil le no xoox es. We na mbaaƭaa o saŋkaam kaa njeg doole, a mbañtaam cegeer. Faw um rabid ke guuɗeeruuma.

A kim a tedu ke 102:10

Kaam buqaa ndaw nen mbuuru, too kuu um yeraa rek, xa kooniit es owaay kam faa.

Yeremi 12:4

Saax le kaa refkaa neeke na naqad boo a mban, soo daaƭ le na koƥ ale fop ee ŋayam? Ƥaaɓaan ke fo tiiƭ ke no saax le a sooƴa, yaam kañaan ne no we ngenna teen. Kaa da layaa yee: «Roog ga’ee ke na dalkaa a in.»

Yeremi 15:17

Moofiim muk a ndeer no we na mbumbaayaa, ndax um ŋas. O ɓay o mayu katil ole wo a seraxam um moof sang es, yaam kaa o mayƭand’aam fo fuux.

Yeremi 30:18

Keeke o Yaal oxe a layu: «Xam xendandatin ƭiif ke Yakoob, yirim kenand ke ten, teeru fuu refna a maxatinel na pec um, mbind mosu nuu refna a daknel na seek a ndigil um.

Dañel 12:6

O leng na den a laamta o koor oxaa rokooxna ndoki njoor, a yooroox foofi le no xuluɓ ole yee: ‹Mban com’andtu kene a muukooxkaa?›

Habakuk 1:2

O Yaal oxe, kaam bugko ƴufginooxang boo a mban, soo o fañaam o nan-giloox? Kaam bugko faɗooxaa yee: «A ƭom-yedar oo!» boo a mban, soo o fañ o ƴufig?

A kim a tedu ke 79:5

O Yaal oxe, kaa o fuuxankaa a in neeke boo a mban? Ndax naal ne wo kaa bugko kaƥaa cay nen fiɗel?

O baawaare xe 3:3

hap o war fo hap o wodand, hap o bayit fo hap o max,

Esayi 47:6

Kaam fuuxan’u xeet es, fudin we jeg’uuma soo ɓoxotong a den. Wo o mat, yirmiro a den, gadnaa o nogoy oxe sax kadoor meɗu ke wo.