Saak 4:4 - NQAARIIT NE ROOG

⁴ Kaa nu ngore’ee! Ndax nu andee yee oxe fexna tig adna, o pañ Roog oo? O kiin oxuu bugna xaariitoor fo tig adna, a refata o pañ Roog.

Saak 4:4 Referans Kwoze

O leetar ole Pool a bindna GIMU WE NGENNA ROM 8:7

We na topatooxaa ke cer ke a mbugna, fañ Roog a ndefu, yaam cer den kaa mbañ o nanan kebil ke Roog, kaa mbaagiran a mbaag sax.

Galati 1:10

Ndiiki koy, kaa felna wiin we um waaƭaa ndi kaa felna a Roog? Kaam ee ndax kaam waaƭaa o fel wiin we? Um maad’angaa o felaa wiin we, refkoogiim o paɗ Kiristaa.

YEGIL MBAAX NE YEESU ne Saŋ a bindtuuna 15:19

Nu mbog’angaa na adna, a fexkooga a nuun, yaam ke fogna fo ten rek a fexu, ndaa koy feek nu mbogee no ten, ndoon teen um jil a nuun, xan a sib a nuun.

Mace 6:24

«O leng waagee o dagoox yaal ɗik, yaam yaaga xan a fex oxene soo a fañ oxaana, mbaat ta damoox no xene soo a sib oxe yoqna. Nu mbaagee ndagooxaa a Roog, soo mbug o ndagoox Xaaliis.»

YEGIL MBAAX NE YEESU ne Saŋ a bindtuuna 17:14

Kaam coox a den fa lay of, adna fee a sib a den, yaam ne da mbogeerna na adna fee, ne fogteeruuma teen, mi itam.

Saak 1:27

Roog Faap fee kaa lay ee o reefin ndigil refu: O topatooxaa xa baan axe fo ñaaw we ndefna na coono, wootoox a xoox of itam, ndik paaxeer ke na adna fee a naxong, a mbi’noorong paaxeer.

O leetar ole Pool a bindna GIMU WE NGENNA ROM 5:10

Kaa i ndeeƭu fañ Roog, ndaa fa nqon fee no Ƥeem a jofooranda a in fo ten. Njofoor neene taxu a qontax ale no Ƥeem waagkee o ñak o mucil a in.

Mace 16:4

Xeet fa soxodu fa ngore’aƭaru fene fesna a Roog a cinj, oxe xeɗaa o anddiloor, ndaa Roog ci’kee a den o anddiloor o lakas olaa refeerna ole Yoona.» A xaƴa den maaga, soo a ret.

Hoose 3:1

O Yaal oxe a layaxam ee: «Retahini, o bugir fo o tew oxeene jegna xa pes too a seeqaa. Bugteen ne bugtuuma Ii-isra’el we, mi o Yaal oxe, ke da ngeleerooxaa farna fo roog lakas ke fop oo, a mbex o ƥoxotaa a den xa kaf xa tim biiñ.»

YEGIL MBAAX NE YEESU ne Saŋ a bindtuuna 7:7

Adna fee mbaagee o sib a nuun. Mi koy, mbaagiraam o ñak o sib, yaam kaam seede’anaa a den a qool qac ee ke da mbi’aa faaxee.

A kim a tedu ke 73:27

We na ngoƭang, xan a saŋkoox, we na mbesang a cinj, a mbaɗooxaa roog lakas, o duguñ a den.

YEGIL MBAAX NE YEESU ne Lik a bindtuuna 19:27

Fañ we mi koy mbugeerna um maadoox took den, ƥisiidaamoo a den mene, too mbar a den mbaambir es.› »

Mace 12:39

Yeesu a doona a den ee: «Xeet fa soxodu fa ngore’aƭaru fene fesna a Roog a cinj, oxe xeɗaa o anddiloor. Kaa koy, Roog ci’kee a den o anddiloor o lakas olaa refeerna ole no tuleer oxaa ne’eena Yoona.

A kim a tedu ke 21:8

O maad oxe kaa hooloox o Yaal oxe, too tolofkee muk yaam o mbeq onqe no xe Took-ee-took.

Yeremi 9:2

O Yaal oxe kaa tee: «Ɗelem den kaa nand nen a qali ŋaayne, ndax da maaɓ doŋ. Ndigil taxee da maadooxaa no saax le, yaam kaa mbi’aa paaxeer took paaxeer too nqalamiraam o and.

Esayi 57:3

«Matiidyo mene, nuun lakas we, xa ƥiy no tew o naq oxe nu ndefna, xeet fa mbeefes fee fo fa njaga’u fee.

A kim a tedu ke 50:18

O ga’angaa o kuuɗ, o xaariitoor fo ten, soo ref o yoon no seeseeq we.

Yeremi 2:2

«Reti o yegin a Yeerusaleem kene: O Yaal oxe kaa tee: Kaam wetandooxaa ne gore’it’oona na mi, ye o refaa o ndeɓandoong, ne bugit’axamoona ye o refaa o toog es, ne reeftoogaxamoona na koƥ-a-ƥor alaa, no jegel olaa dara a saxkeerna.

Mberaand 3:15

Xam ɓek njofooraƭar ndeer of fo o tew oxe, ndeer we mbaqaqoorna na wo fo we mbaqaqoorna no ten. Xan oxe faqaqoorna no ten a gef xoox of bo tee rip, soo wo o gaañin no faaɗ.»

Heseki’el 16:32

Kaa o reeƭu o tew o seeseeq oxaa na dalnaa genar, a waas o kor um.

1 Korint 1:20

Ten taxu ndiiki, an refu meen o yaal o and? An refu meen o cangu? An na inooxkaa meen a ñimatireel, ndax ta lalit yiif um? Kaa Roog feeñlee yee ke na fakoorteel na adna fee ñaku xoox oo?

1 Korint 1:21

Ne andoona yee ke adna a mbi’na o and ɓakandee a den no and a Roog, ten taxu Roog a mucla we ngimna, a reefandin na waare fee wiin we a mbi’na ñaku xoox.