Saak 1:12 - NQAARIIT NE ROOG

¹² Oxe saƭikna, yaa ta ɗeetlooxeena, a ɗaaya. Ƭeetlax keene a mbaafangaa, xan a su’nel o ñoow ole Roog a regna we mbexuuna, ta ref o ndip um.

Saak 1:12 Referans Kwoze

1 Piyeer 5:10

Roog fee mayna yirmande, xoyu a nuun na Kiristaa, ndax nu mbog no ndam o mbagkeer onqe ten. Roog fa xoox um xan a fap a nuun na Kiristaa, a cinj yaa nu coono’na o ndik, a saƭkand a nuun, a ci a nuun doole, a fi a nuun bo nu mbaagkee o yen.

Mbeeñil 2:10

Ba o diid no ke o ñagadilkeel. Nan-gilooxi: Xan o ƈiƴ oxe a ɗeetloox a nuun. Xan a ɓek leng-leng na nuun kam kaso, too xan nu toroxandel boo ñaal xarɓaxay. Fat o gore boog boo na fa nqon, too xam cooxong o ñoow ole, ta ref o ndip of.

Saak 5:11

In we layaa yee a ƭaaya, yaam kaa da saƭik’u. Yob o mat, nu nana boo ƈut o saƭkel ole ten. Nu andahina ke o Yaal oxe a coox’uuna cinj ƭeetlax ke ten. No ndigil, o Yaal oxe a yirma wiin we, a naaga o fi’anaa a den paax.

O leetar ole Pool a bindna GIMU WE NGENNA ROM 8:28

I anda yee Roog kaa jalaa no ke na xewaa no ñoow no we mbexuuna fo no we ta xoyna no yuuƥ um fop, ndax ta rim o njiriiñ na den.

Mace 10:22

Xan fop a sib a nuun yaam gon es, ndaa oxuu saƭikna boo no muukandoong naa xan a muc.

1 Korint 9:25

Oxe bugna o ref mbir tigi a naaga o fesaa mayu a cinj, too keene fop kaa waagna o sooƴ soom a nqirooxanaa. In koy, fat i moƴ o ngumnoox yaam a laay a sooƴkeer muk refu mbaambir in.

1 Piyeer 3:14

A soƥangaa sax ee, kaa nu coono’aa yaa nu mbi’aa ke jofna, nu ƭaaya. Ba nu saɗar ke wiin we a saɗaraa, too ba nu njaaxiɗ.

2 Timote 4:8

Andaam ee o ndip onqe jofu we a cooxeel, oxe cungaxam. O Yaal oxe refna o Kaahate cofu xe xan a cooxaam o ten na bes faa ta nomtooxiidkaa. Refee koy ee mi soom a cooxkan, ndaa fop we na tayaa a nomtooxiid ale ten.

Saak 2:5

Fog es we fexuuma, nan-gilooxyo a paax: Ndax nu andee yee Roog jilu we adna fee a ƭeetaa nen rool, ndax o ngim den na Yeesu Kiristaa a ref halal den, da njeg maat ne ta regna we mbexuuna?

1 Piyeer 5:4

Nu mbi’angaa keene fop, xan nu ndaaw o ndam onqe nen o ndip o yaqooxkeer, yaa o Kaynaak o maak oxe a feeñkaa.

1 Korint 2:9

No kaa farna no jeg-yiif oleene koy, a Pind a Tedu ke a laya yee: «Kaa ref kaa a ngid a ga’eerna, nof ɗaaɗiran, too yiif no kiin gomiran. Kaa ref kaa Roog a roxanna we mbexuuna.»

A cangatin ale 8:2

Fat nu mbetandooxaa a ƭat ale o Yaal oxe Roog nuun a xotnoorna a nuun fop kam a koƥ-a-ƥor ale na xa kiid qarɓeen nahik axeene. A doona a nuun coono mayu, ndax ta ɗeetloox a nuun boo a ga ke refna kam a qeeñ nuun, a and ndax nu mbuga ndeef kebil ke ten, ndax nam.

Xa peƭit axe 17:3

Xaaliis fa wurus kaa ƭeetloorteel fiɗel, a qeeñ ake mat o Yaal oxe na ɗeetlooxaa a den.

Sakari 13:9

Aleene seek koy, xam ɓekin na fiɗel, jawtin ne xaaliis a jawteel, xoolandin ne wurus a xoolandteel. A koom, xan a ƈufginoor gon es, um jaaɓ a den, lay a den ee: ‹Nuun ndefu xeet es!› Xan a ndoonaam ee: ‹Wo o Yaal oxe, wo refu Roog in.› »

Mbeeñil 3:21

Oxe na maafkaa, xam ci’in ta moof fa mi took gamb no maad le mi, ne maaftuuma mi fa xoox es boo moof fa Faap fee no gamb no maad le ten.

1 Piyeer 4:13

Kaa nu mbar o mbelakinoox kañ, yaam ne nu njegna a las no coono ke Kiristaa, ndax nu may fo o ɗaay itam, yaa o ndam onqe ten a feeñilkeel.

1 Korint 8:3

Kaa koy, oxuu fexna a Roog, Roog a andaan.

Mbeeñil 3:19

Mi o mat, kaam yaraa we fexuuma. Jaflaxi boog, too fes pakaad of a cinj.

A cangatin ale 13:3

ndax ta ɗooqloox a nuun nu mbaɗook roog lakas kaa nu and’eerna, njalan a den. Boo o anddiloor ole mbaat com’andtu ke a jegitna ne ta yegnit’uuna a nuun sax oo,

Hebre 10:32

Mbetandooxyo ñaal eetaand ke nuun! Ye nu sogna o ndaaw a qoolaand ale, kaa nu njimboox’u na ñox a maak a ƭomu, yoonandtin o muñ.

A kim a tedu ke 119:71

Paax oo na mi ye neewandeema, yaam a aqatinaxam ke dalnoona.

A cangatin ale 7:9

Fat nu and boog ee o Yaal oxe Roog nuun soom refu Roog. Kaa gore too a gayaa ngiɓoor um fo o paaxel um boo no suk cuni-cuni no we mbexuuna, a ngayaa kebil um.

Hebre 6:15

Abraham a cungooga fo o muñ, too neene a daawa ke Roog a regit’ina.

Mace 25:34

Maaga, xan o Maad oxe a lay we ndefna na ñamaak um ee: ‹Ngaryo, nuun we Faap es a barke’na. Njangyo Maat ne nu njagandan’eena yaaga adna a sogaa feroox,

A kim a tedu ke 119:67

Kaam mo’’u mir yaaga neewandaandeem, ndaa ndiiki o ñuxur of um gayaa.

Nehemi 1:5

soo lay ee: «Ey, o Yaal oxe Roog fee na asamaan, Roog fa maak fa saɗarnooxu fee, wo fee na geekaa ngiɓoor ne soo laltaa yirmande no we mbexoonga too a ngayaa kebil of,

Hebre 11:17

O ngim tax’u Abraham a ɓoxot a Isaak fee o ƥeem nen sadax, ye Roog a ɗeetlooxan. Abraham feene o mat, Roog a coox’u ndegit ne, ndaa yaqanee ta fapooxan o ƥiy o leng kut onqe ta jeg’ina, ndax ta ɓoxotin nen sadax.

A kim a tedu ke 119:75

O Yaal oxe, andaam ee ke simtoona a jofa, too wo ɓuru neewandaam.

1Saŋ 4:19

In o mat, kaa i mbexin, yaam ten eetu o fex a in.

Esayi 64:4

Kaa o xetiidaa fo we na mbi’aa cofu, a mbi’tan o ɗaay, too a mbetandooxang, yaa da ñaaƴaa na ƭat of. Kaa koy, fuuxaa, yaam ne i mbakaadna. Neene a refu yaaga boo fa ndiik. O koo, an na mucilkaa a in?

A kim a tedu ke 5:11

Wo Roog, gadni a den tooñ den! Fat yuuƥ den a maafnoor a den. Raxi a den yaam tooñ mayaan ke den, yaam kaa siiknoor fa wo.

A sutax ale 20:6

Kaa koy, naagaam o yirmaa boo no wiin cuni-cuni we mbexaxama, a ngayaa kebil es.

Hebre 12:5

Ndax kaa nu mbeecit a ƭelem akeeke Roog a saƭakinitna a nuun, ye ta layna yee xa ƥeem nu ndefu? Kaa tee: «O ƥees, ba o damit caaxaan ne Roog a yartang, too ba o ñak yaakaar yaa ta xasanang.

Ke bindeena no xe ne’eena YOB 5:17

O kiin oxe Roog a soqaa a ɗaaya! Ba o fañ fa yar fee no Cegu katil oxe!

A kim a tedu ke 94:12

O Yaal oxe, oxe o yaraa soo aqatintan kebil of a ɗaaya.

Mberaand 22:1

Cinj kaaga, Roog a ɗeetlooxa a Abraham, a layin ee: «Abraham!» Abraham a doonin ee: «Oow!»

Ke bindeena no xe ne’eena YOB 2:10

Kaa koy, Yob a doonaan ee: «Kaa o laytaa nen o tew o cegee yiif! Feek i njaɓa ndaawit na Roog paax kañ, i mbara njaɓ o ndaawit no ten paaxeer itam.» No kaaga fop koy, Yob bakaadee na fa lay um.

A kim a tedu ke 11:5

O Yaal oxe kaa ɗeetlooxaa o cofu xe fo o soxodu xe soo a sib oxe fexna mbariƴ.

YEGIL MBAAX NE YEESU ne Lik a bindtuuna 6:22

Boo andoona yee nu sibe mbaat nu ndaxel mbaat nu mbenel mbaat nu mberanel paaxeer kuu refna yaam o Ƥeenqe no kiin oxe, nu ƭaaya.

O leetar ole Pool a bindna GIMU WE NGENNA ROM 5:4

o saƭkel a rimaa o xox ƭeetlax, o xox ƭeetlax a rimaa yaakaar.

2 Timote 2:15

Ɗofti boo baa a pi of a ndef gaci mbaambir Roog. Fat o ref mbaambir um o caajal oxaa na jootandaa fa lay fa ndiindigil fee kam o cofel.

1 Piyeer 4:14

Boo nu mbeneena yaam gon le Kiristaa, nu ƭaaya. Yiif le saqna o ndam onqe, refna ref Yiif le Roog, oxey took nuun.