Mise 7:9 - NQAARIIT NE ROOG

⁹ Feek kaa i mbakaad no Yaal oxe, xan i ngadoox fuux le ten, boo yaa ta layoorankaa a in soo a ɓoxot a in ɓur. Xan a ɓek a in na qoolaand ale, too xan i nga ee xan a mucil a in.

Mise 7:9 Referans Kwoze

1 Korint 4:5

Hate fee a refangaa no ɓay Roog koy, nqaƴyo boo hap fee a fad, too a koom o Yaal oxe a gar, a huyit ke dasna, a feeñil ke a yiif ake a mbofna, a kañ wiin we fop, oxuu refna ne ta waritna.

A kim a tedu ke 37:6

Xan a feeñil o cofel of nen mbeet, wargal of nen njoloor o mbuc.

1 Sami’el 24:15

Daali maad Isra’el, ndi an o xire’tikaa? Kaam ee ndi an o daabaa? Mee ndax mi yoo, mi fee refna o ɓox o xonu, ref mbiindiin soom.

2 Timote 4:8

Andaam ee o ndip onqe jofu we a cooxeel, oxe cungaxam. O Yaal oxe refna o Kaahate cofu xe xan a cooxaam o ten na bes faa ta nomtooxiidkaa. Refee koy ee mi soom a cooxkan, ndaa fop we na tayaa a nomtooxiid ale ten.

Malaki 3:18

Maaga, xan nu nga’ahin njektir ne refna ndeer o cofu xe fo o soxodu xe, nga itam an dagooxu a Roog fo an dagooxeerun.

Mbeeñil 18:20

Ten taxu wo asamaan, felakinooxi! Nuun we mbogna na Roog fo apootar we fo duleer we, kaam ee mbelakinooxyo, no ne Roog a hate’na teeru feene yaam ɗom le ta fi’na a nuun.»

Esayi 46:13

Mexey matandiidaa o cofel es, goƭatee sax. A muc es ñaalkaand a kar. Mexe ɓisiidaa kam Siyoŋ a muc es. Kaam ee mexe ɓisiidaa a Isra’el tig mosu.»

A kim a tedu ke 43:1

Wo Roog, ɓoxotaam ɓur, fartaam no gimaƭaru we, muclaam no maamaaɓ we fo no fiifi paaxeer we!

A kim a tedu ke 7:6

fat o pañ a daabaam, a damaam, a duutaam a lanq um ñoowaa, soo a uup o ndam es no fo ut ole. A maaf

Ke bindeena no xe ne’eena YOB 23:10

Yaag oo toox de, Roog a anda o jaf oluu um dakaa. A ɗeetlooxangaam boo a ƴut, xam sutoox teen qac nen wurus faa sutteena no jawir um.

2 Sami’el 24:17

Ye Dawid a ga’na malaaka fee saŋkoogna xeet fee, a laya o Yaal oxe yee: «Mi bakaadu, mi o mat tooñu! Wiin weeke mbi’ee dara kaa faaxaƭarna. Yaaga boog, mi fo ƥasil es mbare o nqaw.»

1 Sami’el 26:10

A dakooxaan o lay ee: «Ne ta wooritna yee o Yaal oxe xe ñoowaa, neene a woortu yee o Yaal oxe fa xoox um na warkan, ta ref ee kaa hap um a fadkaa rek ta xon mbaat ta ret na xire, a xonit maaga.

1 Sami’el 25:39

Yaa Dawid a yegna yee Nabal a ñaka, a laya yee: «O Yaal oxe a hela o simatel, ten fee rabdinooxanaxama took Nabal no wen le ta wenaxama. A xañtaxam, mi fee o paɗ um, um fi paaxeer, soo a nomit a Nabal coxod um.» Cinj kaaga, Dawid a lula wiin da laamtik a Abigayil, ndax ta gilgin.

1 Sami’el 3:18

Naaga, Sami’el a wetandooxaan fop too ɗasnee teen dara. Eeli a laya yee: «Ten refu o Yaal oxe, fat a fi ke jofooxuuna.»

A paɗax ale 26:41

Pakaad keene o mat tax’u mi itam, um siiknoor fa den soo ɗox a den no saax le no fañ den. Yaa da neewandooxkaa, a njaɓ a qaw ale no tooñ ke den,

A ƭomatax ake 1:18

«O Yaal oxe ɓuru a xawaam, yaam kaam nanaƭaran’u kebil um. Nuun qeet ke fop, nan-gilooxyo too nga ɗom es. Mboƥ ndoog ne mi fo mbes ke mi a ƥise no mbaƭ.

A kim a tedu ke 94:15

O cofel xan a hate’tateel, too fop we a qeeñ den a njofna xan a yoon teen.

A kim a tedu ke 119:154

Fartaam, wataam too fi um ñoowaa ne regtitanoona.

Esayi 42:7

Xan o wet a kid no we mbuulna, wat we ndameena, soo we ngenna no niɓaan ole, o sut a den no ngupuus onqe da ndefna.

Esayi 42:16

Xam ñaaƴnoor fuul we na ƭat alaa da and’eerna, ɗox a den na qal akaa da mos’eerna o ndeef. Xam suptan a den o niɓaan ole a qoolaand, soo a qalnqaluuƈ ake, um fodrand a den. Keene refu ke um fadinkaa, too dakooxkiim teen a cinj.

Esayi 56:1

O Yaal oxe kaa tee: «Mbi’yo ke refna a ƭat, ngay o cofel, yaam a muc es ndiik a fadiid, too o cofel es xan a feeñ.

Yeremi 10:19

Yeerusaleem a falalooxa yee: «Sabab took es, yaam yaqooxaam pic! Uut le mi waagee o wod, mi fee layoogna yee: Keene soom a reeƭangaa coono es, hatilkoogaanum.

Yeremi 51:10

O Yaal oxe a ɓoxota a in ɓur. Ngaryo i mbetandoox kam Siyoŋ ke o Yaal oxe Roog in a fi’na.

Ke bindeena no xe ne’eena YOB 35:14

Nam a doonitkang, wo fee layna yee ga’ino too doon mbir of mbaambir um ref no cungan?

Esayi 51:22

O Yaal oxe Roog of refna o caajangin of kaa sedan xeet um, soo a yegnang kene: «Xam xot no ɓay of o mbeeƭ onqe na firɓandaa, o mbeeƭ onqe yipna fuux le mi, yerkatiro teen muk.

Yeremi 14:7

Ke tooñ ke in a njambaa a in fop oo, fi’i tig yaam gon of, wo o Yaal oxe yaam ngore’aƭar ne in a maya lool, i mbakaada na wo.