Mberaand 1:31 - NQAARIIT NE ROOG

³¹ Maaga, Roog a ga’a yee ke ta fi’na fop paax oo. A yenga, a feed, ta ref ñaal ɓetuu fa lengandeer ne.

Mberaand 1:31 Referans Kwoze

1 Timote 4:4

Ke Roog a sakna fop a faaxa, too dara waraand o diimb, yaa ta jangeena fo o ngidim,

A kim a tedu ke 104:24

O Yaal oxe, jale of jegee hap. Kaa o fi’it a den o and, den fop. Lanq ke kaa may muut fo sake le wo.

A sutax ale 20:11

yaam no ñaal ɓetuu fa leng sakum a asamaan fo lanq fo o maag ole fo fop ke refna teen, mi o Yaal oxe, soo ñootnoox no ñaal ɓetuu ƭikandeer ne. Ten taxu, mi o Yaal oxe, um barke bes fee na ñootnax ale, tedlandin.

A kim a tedu ke 104:31

Yaasam o ndam onqe no Yaal oxe a ref boo kili! Yaasam ta felakinoox no ke ta fi’na!

A ƭomatax ake 3:38

Andum refee yee no bug no xe Took-ee-took pel fo peƭar a inooraa?

Ke bindeena no xe ne’eena YOB 38:7

ye xa qoor-mbeet axe a tapoorna, a mbelakinooxaa, malaaka ke Roog fop a njibnaa xa ƈeel?

Mberaand 2:2

Roog a paanga calel um soo a ñootnoox no ñaal ɓetuu ƭikandeer ne.

Mberaand 1:23

A yenga, a feed, ta ref ñaal ƥetkandeer ne.

Mberaand 1:8

A qul ale, Roog a ne’aan asamaan. A yenga, a feed, ta ref ñaal ƭikandeer ne.

Mberaand 1:5

A qoolaand ale, Roog a ne’aan ñaal, o niɓaan ole, ta ne’in o yeng. Naaga a yenga, a feed, ta ref ñaal eetaand ne.

Mberaand 1:19

A dakooxa o yeng, a feed, ta ref ñaal nahkandeer ne.

Mberaand 1:13

A dakooxa o yeng, a feed, ta ref ñaal ndadkandeer ne.

1 Timote 4:5

yaam fa lay Roog fo a qeƭ na tedlandaa fop.

A sutax ale 31:17

Keene xan a ref o anddiloor olaa na refkaa boo faw a ndeer es fa nuun Ii-isra’el we, yaam mi o Yaal oxe saku asamaan fo lanq no pes ɓetuu fa leng, soo na bes fa ɓetuu ƭikandeer fee um paang calel es, ñootnoox.

A kim a tedu ke 104:28

Kaa o ci’an a den, da njangin, muƥit o ɓay of, da ngiñ tem.

A kim a tedu ke 119:68

O Yaal oxe, kaa o faax too fi’aa paax, aqatinaam ke dalnoona.

Xa peƭit axe 16:4

Kuu o Yaal oxe a fi’na tig taxun, boo no soxodu xe sax jagandaneena ñaal taamaala ne.

O baawaare xe 3:11

Kaa fi’aa tig kuu refna na hap um, ta mos bo. A ɓeka no yiif no kiin sax ta and ee o ñoow ole dayee na fa nqon, ndaa taxee o kiin oxe a waag o and ke Roog a fi’aa, a xotit no mberaand naa boo no muukandoong naa.

Mberaand 2:3

Roog a barke’a ñaal ɓetuu ƭikandeer ne, soo a kesin ta ref bes fa tedu, yaam no ñaal neene a ñootnoox’u no calel ke na sak ale.

A cangatin ale 32:4

Ten refu ɓil le. A pi ake ten njegee sik. A ƭat ake ten fop kaa njof. Kaa ref Roog fa ngore’u faa fi’keerna njofaƭar. Kaa jof soo a woor.