Mbeeñil 20:4 - NQAARIIT NE ROOG

⁴ Yaa keene a faafna, ga’aam a kamb, soo we moofna teen a ci’el sañ-sañ faa da ngate’itna. Ga’ahinaam itam xa laaw axe no we mbarnoor’eena, yaam ne da seede’anoogna a Yeesu, a nqaynaa fa lay fee Roog. Den fa qoox den koy mos’ee o mbaɗoox a Ɓaanoor fo nitaal um, too ndaaw’ee itam o ñaas ole Ɓaanoor na tagid den fo no ɓay den. Weene a nqontooxa, a maadoox fa Kiristaa boo xa kiid juni.

Mbeeñil 20:4 Referans Kwoze

Dañel 7:27

Maat ne fo ngelfa ne fo o magnel ole no maat ke fop ndefna took lanq ke xan a ƥoxotel xeet fee no tedu we no xe Took-ee-took. Maat um jegkee muukandoong, too yaal toole ke na adna fee fop xan a ndagooxin too a nananin.›

Dañel 7:18

Kaa koy, xan tedu we no xe Took-ee-took a ndaaw maat ne too xan a njegin boo faw, bo na moos boo moos.›

Mace 19:28

Yeesu a laya a den ee: «No ndigil, mexe layaa a nuun ee: Boo adna fee a sakatineena, soo o Ƥeenqe no kiin oxe a moof kam o ndam onqe no maat ne ten, nuun we ndeefanaxama, xan nu njeg a kamb xarɓaxay fo a kamb a ƭak, too xan nu ngate a carind xarɓaxay fo a carind a ƭak ake Isra’el.

Mbeeñil 6:9

Cinj kaaga, o Mbaal onqe a ñaƥta o ñaas o ɓetkandeer ole. Maaga, ga’aam yoora o sadaxand ole xa laaw axe no we mbar’eena yaam ne da yegnitoogna fa lay fee Roog fo ke da seede’anoogna a Yeesu no cofel.

Mbeeñil 3:21

Oxe na maafkaa, xam ci’in ta moof fa mi took gamb no maad le mi, ne maaftuuma mi fa xoox es boo moof fa Faap fee no gamb no maad le ten.

2 Timote 2:12

i nqijangaa fo ten, xan i maadook fo ten. I layangaa yee i mosiran o and, too andin, xan a xañ ee andee a in itam.

Dañel 7:22

boo neen a Koorgi le a garu, a ɓoxot ɓur tedu we no xe Took-ee-took, too waxtu a gara faa tedu we a njangna maat ne.

Mbeeñil 20:6

We na njegkaa a las na qontax a eetaand ale a ƭaaya, too xan a mbarke’el. Fa nqon fa ƭikandeer fee waagkee na den tus, too xan a ndef waa na ƥoxotanaa a Roog fa Kiristaa sadax, a maadoox fa Kiristaa boo xa kiid juni.

Dañel 7:9

«Ɗeetoogaam boo neen ga’um a uum no maad akaa na sipeel, soo a Koorgi a gar, a moof. Kaa rokoox’u toki tan fur, soo wiil um a ranig taw nen fa liit. Uum-maamaad le ten nandtoogna ƈulfaan fiɗel kaa saq’u a saang akaa na telelaa nen fiɗel laa na jir-jirnaa.

YEGIL MBAAX NE YEESU ne Lik a bindtuuna 22:30

ndax nu ñaam yer fa mi kam mbind Faap es, moof na kamb, ngate a carind xarɓaxay fo a carind a ƭak ake Isra’el.»

Mbeeñil 22:5

O yeng jegkatee, too wiin we soxla’katee a qoolaand o jam mbaat ale no njeeƈ ne, yaam o Yaal oxe Roog xan a fudin took den a qoolaand um, da maadooxaa boo faw.

Mbeeñil 12:11

Fog gimu we in a maafaan yaam fo’oy le no Mbaal onqe fo ndigil ne da seede’oogna. Mbex’ee itam o ñoow den boo a tax da saɗar fa nqon.

Mbeeñil 1:9

Mi refu Saŋ fee o pog nuun no ngim onqe. Yaam ne i mbogna na Yeesu Kiristaa kaam fog fa nuun na coono fee fo no maat ne fo no ke i cungtaa o muñ. Reeƭaam no fimb laa ne’eena Patmos yaam ne waare’ooguuma fa lay fee Roog, soo seede’anaa a Yeesu.

O leetar ole Pool a bindna GIMU WE NGENNA ROM 8:17

Kaa i ndef xa ƥeem, ten taxu i njega a las no lam ne Roog a regna xeet um. Xan i lasrin fa Kiristaa, yaam i naangangaa o coono’aa fo ten, xan i mbog fo ten no ndam um itam.

Mbeeñil 15:2

Cinj kaaga, ga’aam kaa na nandtaa o maag o wendu laa fokatoorna fo fiɗel. Ga’ahinaam we maaf’ina a Ɓaanoor fo nitaal um fo limel ne fodirna fo gon le ten. Kaa ngeenoox’u took o maag o wendu le, a saq fo nqilimb ne Roog a coox’ina a den.

Mbeeñil 14:11

Maaga, fo suun ole na fiɗel le na toroxandaa a den xan a naag kiw a yoɗoox boo xoo. We na mbaɗooxaa a Ɓaanoor fo nitaal um koy, fo xuu andoona yee a daawa o ñaas ole no gon um, weene fop njegkee a ñootnax ñaal fo o yeng.

Mbeeñil 11:7

A yegnitangaa nduleer den boo a ƈut, xan Ɓaanoor fee na sutoorkaa na ngas fiɗel ale a song a den, a maaf a den, soo a war a den.

YEGIL MBAAX NE YEESU ne Saŋ a bindtuuna 14:19

Miñkatee dara, adna fee nga’katiraam, ndaa nuun, xan nu nga’aam, yaam mexe ñoowaa, too nuun itam xan nu ñoow.

Dañel 2:44

No camaane ke no maad weene, Roog fee na asamaan xan a dalin maat naa gefkaandeena boo muk, too ɓoxotkaand na xa ƥay no qeet lakas ke. Maat neene xan a duguñ maat keene fop, too xan a ref bo na moos boo moos,

Mbeeñil 17:8

Ɓaanoor fee ga’oona a ñoowooga yaaga ndaa maadatee. Kaa nar o sutoor na ngas fiɗel ale, a ɓisel a saŋkook. We ngenna kam adna fee, a kon den a mbind’aandeena kam safe le no ñoow ole, no kaa xotitna no mberaandoong adna, xan a nga a Ɓaanoor. Ɓaanoor feene a ñoowooga yaaga too maadatee, ndaa xan a nomtooxiid. Keene koy, xan a bet a den.

Mbeeñil 11:15

Cinj kaaga, malaaka ɓetuu fa ƭikandeer faa a luuƥa, too a jega na asamaan xa ñuxur xa maak axaa layoogna yee: «Maat ne na adna fee a ɓoxote o Yaal in fo o Muumucil oxe ta regitna, too xan a maadoox bo na moos boo moos.»

Mbeeñil 11:11

A cinj ye ñaal tadik keene fa genwal fee a mbaafna, yiif laa na ñoowdandaa a inoora na Roog, a rok na den. Den ɗik a inooxa, a ngeenoox, too we nga’na a den a ndiida diid maak.

Mbeeñil 11:3

Xam luliid seede ɗik we mi da njo’tanaxam, a ñaawoor xa saaku boo ñaal juni fo ñaal teemeed ƭik fo ñaal qarɓeen ɓetuu fa leng.»

O leetar ole Pool a bindna GIMU WE NGENNA ROM 11:15

Yaam ye Roog a deɓna Yaawuur we, a weta o gom, ndax qeet lakas ke na adna fee fop a njofoor fo ten. A gisatinangaa a den koy, xar na xewkaa? Ndax refkee a qontax ale no xon we?

YEGIL MBAAX NE YEESU ne Lik a bindtuuna 1:17

Xan a adooxiid o Yaal oxe, a saq yiif no tuleer le fa katil fee Eliya. Neene, xan a xuriid paap ke da njeg jam na xa ƥiy den. Xan a ɗox jofaƭaru we itam da njegat a qalaat a cofu. Neene, xan a fi’an o Yaal oxe xeet fa njagande.»

Mark 9:11

Daalbe we a laamtaan ee: «Xar taxu boog jaajangin we no kebil ke Moyiis a layaa yee Eliya a wara o eet o gar?»

Mark 6:27

Ndak fo ndak, a lula a alkaati, a heblin ta ɓisiid xoox le Saŋ o Paabatiise xe. Alkaati fee a reta kam kaso faa, a ɗeg xoox le Saŋ, a ɓisiidin no roon,

Mark 6:16

Kaa koy, yaa Herood a nanna kaaga, a laya yee: «Saŋ feene ɗegnooruuma xoox um, o ten o mat xontooxu.»

Mace 24:10

Xan mayu a mbes o ngim onqe a cinj, too xan a ngodir. Wiin we kaa mbugko sibraa a ndeer den.

YEGIL MBAAX NE YEESU ne Lik a bindtuuna 14:14

O naagangaa o fi’taa neene, ɗaayaa. Yaam ne weene a mbaagkeeroonga o ndabid, xan Roog a rabdong, yaa jofu we a nqontooxkaa.»

Mbeeñil 1:2

Keeke refu ke Saŋ a woorinna: Fop ke ga’uuma fa lay Roog oo fa seede Yeesu Kiristaa.

Mbeeñil 2:26

Neene, oxe na maafkaa koy, a gen no fi’aa ke buguuma boo no muukandoong naa, xam lasin qeet ke da ndef na sañ-sañ um,

Mbeeñil 4:4

Me wid’ina gamb no maad le koy, a jeg’a a kamb qarɓeen ƭik fo a kamb a nahak a lakas. Maak qarɓeen ƭik fo maak nahuk moof’u na kamb akeene. Kaa ndokoox’u tikoorik tan fur, oxuu refna a saq o ndip wurus no xoox um.

Mbeeñil 7:3

«Ba nu ndaaɓ lanq ke mbaat o maag ole mbaat taxar ke boo yaa i ñaaskaa a tagid ake no we na ndagooxaa a Roog in!»