Mark 14:41 - NQAARIIT NE ROOG

⁴¹ Yaa ta nomtooxiidna jaf dadkandeer le, a laya a den ee: «Kaa nu maad o ƭaanaa, ñootnooxaa? Ndiiki koy, a deya! Waxtu fee a fadiida. Nga’yo, o Ƥeenqe no kiin oxe xan a ɓoxotel ndeer xa ƥay axe no baabakaad we.

Mark 14:41 Referans Kwoze

Mark 14:35

Yaa ta retna boo a goƭ o ndik, a gooknooxa a lanq, too a xeɗ a Roog ndax waxtu feeke a riƈatooxin, a waagangaa o jeg.

Mark 9:31

yaam kaa jangnoogu daalbe we ten, too a layaa a den ee: «O Ƥeenqe no kiin oxe xan a ɓoxotel a ndeer xa ƥay axe no wiin we. Xan a mbarin, ndaa ñaal tadik a cinj fa nqon um xan a xontoox.»

YEGIL MBAAX NE YEESU ne Saŋ a bindtuuna 17:1

Yaa Yeesu a layna neene boo a ƴut, a daxaaƴooxa na asamaan, a lay ee: «Faap, waxtu fee a fadiida! Ndiiki koy, ɓoxoti o Ƥeef o ndam, ndax ten itam ta ɓoxotong o ndam.

A pi ake 7:52

An no duleer we daan nuun a ñagadileeru sax? Yaam daan nuun a mbara we yegnitoogna yaaga yee xan o Cofu xe a gar, ndiiki koy nu ngodaan, mbarnoorin.

YEGIL MBAAX NE YEESU ne Saŋ a bindtuuna 12:27

«Ndiiki koy, jaaxɗaam tigi. Kaa koy, xar um laykaa? Ndax kaam laykaa yee: Faap, muclaam na waxtu feeke? Mee ndax keene taxu um gar na waxtu fene!

YEGIL MBAAX NE YEESU ne Saŋ a bindtuuna 12:23

Yeesu a laya a den ee: «Waxtu fee o Ƥeenqe no kiin oxe a wareena o ɓoxot o ndam a fadiida.

YEGIL MBAAX NE YEESU ne Saŋ a bindtuuna 8:20

Yeesu oxe layta a ƭelem akeene maa halal faa a geekoogeena kam Mbind Roog naa, a soƥ ta jangnaa, ndaa o leng doon’iran o ɓay yaam hap um fad’afulee.

YEGIL MBAAX NE YEESU ne Saŋ a bindtuuna 7:30

Kaa mbaaƭoogu maa da ndamtuuna, ndaa o leng duq’iran, yaam hap um fad’afulee.

Mark 14:18

Yaa da ndeerna a ñaamaa, Yeesu a laya yee: «No ndigil, mexe layaa a nuun ee: Nuun we na ñaamaa fa mi, xan o leng na nuun a ɓoxotaam.»

Mark 14:10

Maaga, Yudaa o Iskariyot oxe reeƭna o leng no xarɓaxay fo ɗik waa, a reta a lay fo saasadax maak waa, ndax ta ɓoxot a den a Yeesu.

Mark 7:9

A layahina a den ee: «Nu anda a paax ne nu mbarna o ñufit kebil ne Roog, ndax nu mbaag o ngeek o mbaax onqe nuun.

Mace 26:2

«Nu anda yee Xew fee na colandax ale ñaal ƭik soom yoqu ta fadiid, too teen o Ƥeenqe no kiin oxe a ɓoxotitkeel soo a rengel na kurwaa.»

Heseki’el 20:39

Nuun mbind Isra’el o mat, keeke o Yaal oxe na refkaa boo faw a layu: Ndetyo, fat oxuu refna a faɗook pangool um! Kaa koy, xan nu nga’in too cinj kaaga xan nu nan-gilooxaam. Neene, nu maasanditkatee gon tedu le mi ci’it ke nuun fo pangool ke nuun.

O baawaare xe 11:9

Wo o ndeɓandoong onqe, felakinooxi no ndeƥandoong of. Fat xeeñ of a ɗaay no njaaƈ of. Reefi ke xeeñ of a bugna fo ke a kid of a yuxmaa, ndaa fat o yeg fo and ee no keene fop xan Roog a hate’ong.

2 Maad we 3:13

Eliise a laya o maad oxe Isra’el ee: «Xar ɓisiidong me mi? Reti kañ maa no duleer we faap of mbaat no we ya of!» O maad oxe a doonaan ee: «Ha’aa, yaam o Yaal oxe kaa ɓisiid a in, in maad daduk wene, ndax ta ɓoxot a in na xa ƥay no Moomowaab we.»

1 Maad we 22:15

A gara paam o maad oxe, soo oxeene a laamtin ee: «Mikaya, ndax i mbara o nqire’ik, ndax i njangatin a Ramot kam Galaad, ndi kaa i mbarin o nqaƴ rek?» Mikaya a doonaan ee: «Reti, xan o jeg ne bugoona, too xan o Yaal oxe a ɓoxotin na xa ƥay no maad oxe.»

1 Maad we 18:27

Farna fa waxtu njeeƈ ndeer xoox, Eliya a xaadnooxa a den, a lay ee: «Mbalalooxyo a maak, feek roog a refu, xeƈa kaa xalaataa lakas mbaat ta fiiq mbaat ta ñaaƴik. A waaga o ref itam ee kaa ɗaanaa, too nu mbaraan o yok.»

Haahate we 10:14

Ƈufginookyo boog roog ke nu njilna. Fat a mbat a nuun kam naqad nuun!»

Mark 14:40

A nomtooxiidahina, too a soƥa a den da ƭaanaa. A kid den kaa nqaaɗ’u. And’ee kaa da ndoonuuna.

Mark 14:42

Inooxyo i ndet, oxe na ɓoxotkaxam oxe matiidaa.»