YEGIL MBAAX NE YEESU ne Saŋ a bindtuuna 3:3 - NQAARIIT NE ROOG

³ Yeesu a doonaan ee: «No ndigil, no ndigil, mexe layang ee: O kiin waagee o ga Maat ne Roog a refangee kaa rimel o rimel o xas olaa inoorna na asamaan.»

YEGIL MBAAX NE YEESU ne Saŋ a bindtuuna 3:3 Referans Kwoze

2 Korint 5:17

O kiin a fogangaa na Kiristaa, mbindel nqas a refatu. Ke hiidna a wata, soo fop a refat qas.

1Saŋ 3:9

Oxuu Roog a rimna, naagee o genaa na bakaad, yaam ke Roog a duufna no ten kaa sax no ten, too oxeene kiin waagee o sax na bakaad, yaam Roog rimun.

1Saŋ 5:1

Oxuu gimna yee Yeesu refu Kiristaa fee, o Muumucil oxe regteena, o ƥiy o ndimte na Roog a refataa. Oxuu fexna a Roog fee rimuuna, a fexa itam we ndimteena no ten.

Tiit 3:5

a mucla a in, refee koy ee yaam i mbi a pi a cofu kaa njaruuna, ndaa kaa mucil a in na yirmande um na pexey a ƥogax ale no rimel o xas ole fo Yiif Tedu le, a fi’in ndax i njeg o ñoowooƭ o xas.

YEGIL MBAAX NE YEESU ne Saŋ a bindtuuna 1:13

axaa ndimtaandeena nen o kiin, too itam a yaaw cer gartiran mbaat buge-buge no kiin, ndaa da ngat a ngat na Roog.

1Saŋ 2:29

Yaam ne nu andna yee Roog a jofa, andyo itam ee oxuu na fi’aa ke jofna, o ƥeem a refu.

1 Piyeer 1:3

Yaasam Roog Faap fee no Yaal in Yeesu Kiristaa a simatel! Na yirmande um fa maak, a rimnooratina a in na pexey a qontax ale Yeesu Kiristaa a ndeer no xon we. Yaam o rimel o xas oleene, i njega yaakaar ñoowu

Galati 6:15

Xucoox fo ñak o xucoox mbodu. Ref mbindel nqas jegu o njiriiñ.

1Saŋ 5:18

I anda yee oxuu Roog a rimna genkee na bakaad. Oxe Roog a rimna kaa damooxaa, too o paaxeer oxe duqkiran.

2 Korint 4:4

Wiin weene ngimee, yaam oxe na fi’ooxaa roog na jamaane feeke kaa fuulin a qalaat den, ndax nga’kee meleƈ le na qoolaand ale no Yegil mbaax ne Kiristaa fee refna nitaal ne Roog.

YEGIL MBAAX NE YEESU ne Saŋ a bindtuuna 12:40

«Kaa Roog a fuuland a den, a ŋajnoor a den, yaam ndik da nga’it a kid den, a andit a qeeñ den, soo da saktooxiid me mi, um wodand a den.»

Efees 2:1

Yaaga, kaa nu nqon’u mbaambir Roog yaam tooñ nuun fo pakaad nuun.

Yeremi 5:21

Nan-gilooxyo kene, nuun xeet fa ƥodaxu too a ñak-yiif. Nu njega a kid, ndaa nu mbaagee a ka, njeg nof, ndaa nu mbaagee o nan.

YEGIL MBAAX NE YEESU ne Saŋ a bindtuuna 1:5

A qoolaand ale koy, kaa dalfoox o naagit dañ kam o niɓaan ole, too o niɓaan ole waag’iran o ñuf.

A cangatin ale 29:4

Ɗoxaam a nuun boo xa kiid qarɓeen nahik kam a koƥ-a-ƥor ale, too ñirax ke nu ndokooxna siɗooxee, xa ñaaƭ axe na caf nuun ñaamooxee.

Saak 3:17

Kaa koy, o jeg-yiif ole hatna na Roog, a guutatira fo oleene. O jeg-yiif olaaga kaa xool, a gartaa jam a ndeer no wiin we, a fod o mbid, a gartaa nanoor, a may yirmande fo a pi a paax. Naagee o samtaa itam too jegee yememaar leng.

YEGIL MBAAX NE YEESU ne Saŋ a bindtuuna 1:51

Yeesu a doona taaga yee: «No ndigil, no ndigil, xan nu nga’ataa asamaan a wetoox, soo malaaka ke Roog a ŋaayaa, a mbudooxaa me o Ƥeenqe no kiin oxe a refna.»

Mace 16:17

Yeesu a layaan ee: «Ɗaayaa, Simoŋ, o ƥiy Yoona, yaam refee yee cer ke mbaat fo’oy le mbeeñlong o ten, ndaa Faap es fee refna na asamaan.

Mace 5:18

No ndigil, mexe layaa a nuun ee: Boo asamaan fo lanq a mbaafeerna, bind le moƴna moƴ o neew mbaat o ɗelem o leng sax watkee no kebil ke boo yaa fop a fadnooxna.

Mbeeñil 3:14

«Bindanaam a malaaka fee na yetooxaa mbokatax ne no gimu we kam teeru faa Lawodise yee: ‹Fa lay feeke kaa inoor no xe refna Amiini. Kaa ref itam o seede o kore’u xe fo o tefu ndigil oxe, ke Roog a sakna fop a hat no ten.

Heseki’el 36:26

Xam ci a nuun xeeñ xas soo ɓek na nuun yiif xas. Xam watin no ngiin nuun xeeñ nuun le saƭkitna nen ɓil soo ci a nuun xeeñ hiihiin.

Mace 19:24

Mexe layahinaa a nuun ee: Ngeeleemb a ñoom no yul o fiic moƴu o yooɓ ee o yaal halal a rok no Maat ne Roog.»

Mace 21:31

An no ɗik waaga fi’u ke faap um a bugna?» A ndoonaan ee: «O eetaand oxe.» Maaga, Yeesu a doona a den ee: «No ndigil, mexe layaa a nuun ee: We na ndabdinooxaa juuti fo we na seeqaa, xan a adoox a nuun no Maat naa Roog.

Mark 9:47

Boo a ngid of a ɓekang na bakaad, luqteen deɓin! Rok no Maat ne Roog fo a ngid a leng moƴu o jeg a kid a ƭak, soo deɓel kam fiɗel laa ñufkeerna boo muk.

Mark 10:14

Yaa Yeesu a ga’na kaaga, a ɗom’aan, too a laya daalbe we ten ee: «Nqaƴyo xa teɓandoong axe da ngar me mi. Ba nu mbañit a den, yaam we nandna fa den njegu Maat ne Roog.

YEGIL MBAAX NE YEESU ne Saŋ a bindtuuna 3:4

Nikodeem a layaan ee: «Ca, nam o kiin a waage waag o rimit yaa ta nogoyna? Ndax a waaga o nomtoox no fud ya um, soo a rimatinel?»

1Saŋ 5:4

yaam we ndimeena na Roog fop kaa maafaa adna fee, too mbir ne maafna adna fee refu o ngim in.