YEGIL MBAAX NE YEESU ne Saŋ a bindtuuna 1:29 - NQAARIIT NE ROOG

²⁹ No feet olaa, Saŋ a ƴooka a Yeesu ta xotiidaa maa ten. Maaga, a laya yee: «Nga’yo o Mbaal onqe Roog na watnaa bakaad adna.

YEGIL MBAAX NE YEESU ne Saŋ a bindtuuna 1:29 Referans Kwoze

Esayi 53:7

A ñagadil’e, a jaɓin too yaƥatee tus. Kaa nand’u nen o mbaal onqaa na ɓiseel no warand, nen mbaal naa muumna mbaambir we na nduusan, too yaƥatee o don um sax.

1Saŋ 2:2

Ten fa xoox um kaa ref sadax faa na ñufaa a qaw ale Roog yaam pakaad in. Refee koy sax ee yaam pakaad in soom, ndaa yaam pakaad ke na adna fee fop.

1Saŋ 3:5

Nu anda kene sax: Yeesu a feeña, ndax ta watin pakaad ke. Bakaad fa leng refee no ten.

1 Piyeer 1:19

ndaa fo’oy fo jegu njiriiñ ole Kiristaa, sadaxteena nen o mbaal o njegee sik fo gak.

2 Korint 5:21

Kiristaa fee moseerna o fi bakaad, Roog a gadnaan pakaad ke in, ndax no ten, Roog a ɗeet a in nen jofu.

1 Piyeer 2:24

Ten roxondooxu pakaad in no cer um took a teex ale, ndax bakaad a xon na in, soo i ñoowaa no cofel. Na pexey a uut akaa ten nu mbodtu.

Hebre 1:3

O ten refu o ɗeendoor ole na feeñlaa o ndam onqe Roog. O ten rek laltu ke Roog a refna deŋ, a saytoorit itam ke sakeena fop fa lay fa njegu doole fee ten. Cinj ye ta xoolandna wiin we no pakaad den, a reta na asamaan, a moof na ñamaak Roog fee refna doole fa mbagkatar.

Esayi 53:11

Xan a ga a qoolaand ale too xan a deyƭoox yaam coono ke ta gomna. O tag es o cofu xe xan a jofand wiin mayu, yaam ne da anduuna, a gadoox njofaƭar den.

Mbeeñil 6:1

Cinj kaaga, ga’aam o Mbaal onqe a ñaƥtaa o leng na xa ñaas ɓetaa ƭaq axe. Nanaam itam leng no pindel nahik ke a fangooraa nen ƭuuɗ. Kaa layoogu yee: «Gari!»

Mbeeñil 12:11

Fog gimu we in a maafaan yaam fo’oy le no Mbaal onqe fo ndigil ne da seede’oogna. Mbex’ee itam o ñoow den boo a tax da saɗar fa nqon.

Galati 3:13

Kiristaa a wata a in na salax ale no kebil ke, ye ta salooxeena, ten fa xoox um yaam in, ne ta bindteena yee: «Oxuu rengeena took a teex, a salooxe.»

YEGIL MBAAX NE YEESU ne Saŋ a bindtuuna 1:36

Yaa ta ga’na Yeesu a joonaa, a laya yee: «Nga’yo o Mbaal onqe Roog!»

Mbeeñil 7:17

yaam o Mbaal onqe refna ndeer gamb no maad le na refkaa o Kaynaak den. Xan a ɗox a den na cur foofi le na ñoownaa, soo Roog a forit xa kooniit den.»

A pi ake 8:32

Keeke refu fa lay fee na Pind a Tedu ke ta jangoogna: «Kaa nand fo mbaal naa na ɓiseel no warand, nen o mbaal onqaa muumna mbaambir no xe na ruusan, too yaƥatee o don um sax.

Mbeeñil 17:14

Xan a song o Mbaal onqe, ndaa xan o Mbaal onqe a maaf a den, yaam ten refu o Yaal oxe no yaal we fo o Maad oxe no maad we. Ten fo we mbogna no ten, ndefna we nqoyeena fo we njileena fo we ngimna, xan a maafandoor a den.»

Mbeeñil 15:3

Kaa nqaanoogu a kim ale Moyiis fee o tag Roog, a nqaanaa itam a kim ale no Mbaal onqe Roog. Kaa nqaanoogu yee: «O Yaal oxe Roog fee jegna katil, a pi of kaa magin, too a mos! Wo daali maad no qeet ke! Mee ndax yuuƥ ke wo kaa njof, too ndigil kak a ndefu.

Mbeeñil 14:1

Cinj kaaga, ɗeetaam, too ga’aam o Mbaal onqe a geenoox took o Joong ole Siyoŋ, soo wiin cuni teemeed we fo wiin cuni qarɓeen nahik we fo wiin cuni nahik we a ndef fo ten, gon le no Mbaal onqe fo gon Faap um a mbindel na tagid den.

Mbeeñil 7:14

Doonaanum ee: «O yaal es, mee ndax wo andun.» Maaga, a layaxam ee: «Den ndefu we inoorna no ñagadil ƭomu naa. Kaa ndap toki den, a ndan-ginit a den fo’oy le no Mbaal onqe.

1 Piyeer 3:18

Jaf leng kut, Kiristaa fee jofna a xona yaam pakaad ke no jofaƭaru we, ndax ta ɓisiid a nuun maa Roog. Cer um kiihiin a nqona, ndaa Yiif Tedu le a nomtiidaan no ñoow ole.

Mbeeñil 19:9

Malaaka fee a layaxam ee: «Bindi yee: We nqureena na put ngulook ale no Mbaal onqe a ƭaaya!» Cinj kaaga, a ɓaata teen ee: «Fa lay feeke ndigil kak oo, Roog layun.»

Mbeeñil 14:10

oxaaga kiin xan a yer na biiñ fee no fuux le Roog. Biiñ feene koy julaand tus, too Roog kaa yipan no feeƭ ole saqna fuux le ten. We na mbesooraa neene koy, xan a toroxandel kam fiɗel laa fo nqeen kaa mbaambir malaaka tedu ke fo mbaambir no Mbaal onqe.

Mbeeñil 13:8

We ngenna na adna fee fop xan a mbaɗooxin. Weene ndefu we a kon den a mbind’aandeena no safe le no ñoow ole, no kaa xotitna no mberaandoong adna. Safe leene koy, o Mbaal onqe war’eena jegun.

YEGIL MBAAX NE YEESU ne Saŋ a bindtuuna 3:16

Yaam Roog a fexa adna fee boo a ci’it o Ƥiy o leng kut onqe ta jegna, ndax oxuu gimna no ten saŋkooxkee muk, ndaa ndax ta jeg o ñoow o fagkeer ole.

Mbeeñil 19:7

Fat i mbelakinoox, too ƭaay! Kaam ee, fat i simatin, yaam ngulook ne no Mbaal onqe a fadiida, too o toog um a jagandooxa boo a ƴut.

Mbeeñil 14:4

Den ndefu we njegeerna soɓe, yaam mosee o yoon fo o tew. Kaa ndeefoogu o Mbaal onqe muu ta jofoogna. Kaa mbat’el ndeer no wiin we, a ndefan a Roog fo o Mbaal onqe nen taawlax.

Mbeeñil 5:8

Ye ta xotna a kayit ale, pindel nahik ke fo maak qarɓeen ƭik fo maak nahuk we a ndalfooxa o ngooknoox mbaambir no Mbaal onqe. Oxuu refna na den kaa saq’u o nqilimb fo o ndog wurus o yipe cuuraay boo muut. Cuuraay feene koy reeƭu a qeƭ ake no gimu we mbogna na Roog.

Mbeeñil 1:5

fo na Yeesu Kiristaa, refna o seede kore’u xe, a ref oxe eetna o xontoox a ndeer no xon we fo o kelwaar oxe no maad we na adna fee! Kiristaa kaa fex a in. A wata a in no pakaad ke in na pexey fo’oy um.

Mbeeñil 21:9

Cinj kaaga, fa leng no malaaka ke saq’ina fo ndog ɓetuu ƭik ne yip’ina taamaala ɓetuu ƭik palakaand ke, a gara a layaam ee: «Gari boo um lalong o toog oxe refna o Kulook no Mbaal onqe.»

Mbeeñil 6:16

Naaga, a layooga xa coong axe fo a ƥil ake yee: «Ngirdooxyo took in, ndax nu laq a in mukit fee no Xe moofna no gamb no maad le, ngoƭatirand a in fo fuux le no Mbaal onqe,

Tiit 2:14

Ten feene o mat wuusu o ñis um, ndax ta wat a in no ndoƭ kuu ndefna, a fi a in xeet um, xeet faa ta kesna, ten fa xoox um, da mbosoox o mbi’aa paax.

Mbeeñil 21:27

Kaa koy, qoolaƭaru leng mbaat o kiin oxaa na fi’aa cednooxu mbaat oxaa na maaɓaa rokkee na teeru feene. We a kon den a mbindeena no safe le no ñoow ole o Mbaal onqe a jegna rek na ndokkaa teen.

1Saŋ 4:10

Mene o mbeq onqeene a refu: Refee yee in mbexu a Roog, ndaa Roog o mat fexu a in boo a luliid o Ƥeem, ndax ta ref sadax faa na ñufaa a qaw ale Roog no pakaad ke in.

1 Timote 2:6

wuusna o ñis um, ndax ta wat a in, in fop. Neene, ye hap fee a fadna, a cooxta seede yee Roog a buga wiin we fop a muc.

1 Korint 15:3

Pitik, kaam jangin a nuun ke daawuuma, ta ref ke moƴna o jeg o njiriiñ. Ten refu yee: Kaa Kiristaa a xon yaam pakaad in, ne a Pind a Tedu ke laytuuna,

Mace 20:28

Neene o Ƥeenqe no kiin oxe a gartu, refee yee ndax ta dagooxel, ndaa ndax ta dagoox, soo a cooxit o ñis um nen a su’nit no wiin mayu.»

Mbeeñil 5:6

Yaa kaaga a faafna, ga’atinaam o Mbaal onqaa geenooxna a ndeer ee ndeer gamb no maad le, pindel nahik ke fo maak we a ndeerin. O Mbaal onqe kaa nandtoogu nen kaa war’eena. Xa can ɓetaa ƭaq fo a kid ɓetaa ƭaq a saq’u, ndefna ndef a yiif ɓetaa ƭaq ake Roog, luliideena took lanq ke fop.

Hebre 9:28

Neene itam, Kiristaa a ɓoxote nen sadax jaf leng kut, ndax ta forit pakaad no wiin mayu. Xan a feeñ jaf ɗikandeer, refee koy ee ndax ta forit pakaad, ndaa ndax ta mucil we ndefna no cungan.

Galati 1:4

O Yaal oxe Yeesu Kiristaa ɓoxotu o ñis um yaam pakaad in, ndax ta mucil a in na jamaane fa mbaaxeer fee ndiiki, ne Roog fee refna Faap in a bugtuuna.

A pi ake 13:39

Neene itam, oxuu gimna no ten, a ɗeete nen o cofu yaam o ten. O cofel o nandu neene koy, nu mbaagiran o njegit na pexey kebil ke Moyiis.

Mace 1:21

Xan a ñoot o ƥiy o ngoor, too fat o ne’in Yeesu, yaam ten na mucilkaa xeet um no pakaad den.»

Mbeeñil 21:14

Saŋe ne na teeru fee koy na ƥil xarɓaxay fo a ƥil a ƭak a diƈooxu. Na ƥil akeene o mat, a kon ake no apootar xarɓaxay fo apootar ɗik we no Mbaal onqe a mbind’e.

Hebre 2:17

Ten taxu a wara o nandat fo xa teɓ um, ndax ta ref o saasadax o maak den o kore’u, a may fo o paaxel no calel um paam Roog. Kaa fi’in, ndax ta ñuf a qaw ale na xeet fee yaam pakaad den.

A paɗax ale 10:17

«Xar taxu nu ñaamtee a tegeƴ ake na sadax feene kam o Mbiñ o tedu nqe? Tig tedu tigi a refu, too o Yaal oxe kaa cooxin a nuun, ndax nu mborit tooñ ke na xeet fee, njofoorand a den fo o Yaal oxe.

Hoose 14:2

Wo Isra’el, nomtooxiidi me no Yaal oxe Roog of, yaam tooñ of a maafaang junjang.

A sutax ale 28:38

Fat Aaroon a rokooxaa a ƈang aleene kili, ta fodan na tagid, yaa ta refna mbaambir es, mi o Yaal oxe. Keene na taxkaa um jaɓaa sadax tedu ke Ii-isra’el we a mbugkaxam o ƥoxotaa, a soƥangaa sax ee kaa tooñ, yaa da ƥisiidaxam a den.

A lim ale 18:23

Leelewi we soom na saqkaa calel ke no Ƭiif ne, too den na ngadooxkaa tooñ ke da mbi’kaa teen. Fat nu ngay kebil neene no suk boo no suk. Leelewi we njegoodkee lanq nen a carind a lakas ake,

A lim ale 18:1

Maaga, o Yaal oxe a laya a Aaroon ee: «Wo fo xa ƥeef fo fog of we mbogna na carind ale Lewi, nuun na ngadooxkaa tooñ ne tooñeena Mbind tedu ne. Kaa koy, wo fo xa ƥeef soom na ngadooxkaa tooñ ne fi’eena kam calel no saasadax ke nu saqna.

Esayi 53:10

Kaa fel o Yaal oxe ta duguñin, a heesandin, ndaa ne ta ɓoxotna o ñis um nen sadax fa nqendandoor, xan a ga xa taan um, a ñoow miñu, too o bug ole no Yaal oxe xan a fadnoor no ten.

Sakari 13:1

«A koom xan a cur foofi laa na ɓogdaa bakaad fo nqoolaƭar a suqtanel mbind Dawid fo we ngenna Yeerusaleem.»

YEGIL MBAAX NE YEESU ne Saŋ a bindtuuna 1:35

No feet olaa ahin Saŋ a maad’a maaga, ten fo daalbe um ɗik.

YEGIL MBAAX NE YEESU ne Saŋ a bindtuuna 1:43

No feet olaa, Yeesu a waaja a tet Galile, soo a xet fa Filip, a layin ee: «Reefaam!»

YEGIL MBAAX NE YEESU ne Saŋ a bindtuuna 2:1

No ñaal ndadkandeer ne, a jeg’a ngulook kam Kana, no jegel olaa Galile, too ya Yeesu a reeƭa maaga.

YEGIL MBAAX NE YEESU ne Saŋ a bindtuuna 4:42

boo a layataa o tew oxe yee: «Refatee yee ke layoona taxu i ngim no ten, yaam i nanana a qoox in, too i anda xil ee ten refu o Muumucil adna.»

YEGIL MBAAX NE YEESU ne Saŋ a bindtuuna 6:51

Mi refu mbuuru ne no ñoow ole hatna na asamaan. Oxuu ñaamna no mbuuru neene koy xan a ñoowaa boo faw. Mbuuru ne um ci’taa koy refu cer es ke um ci’itkaa, ndax adna fee a ñoow.»

A lim ale 21:9

Moyiis a xawa fangool xanjar, a ɗagin took a teex, too oxuu ɗeet’uuna, yaa fangool a ŋatuuna, a wod.