Filip 3:18 - NQAARIIT NE ROOG

¹⁸ A jega mayu waa na ñaaƴaa, a ndef waa mbugeerna o nan paru na kurwaa le Kiristaa. Layaam a nuun a caf a mayu kaa jofna na den, ndiiki itam, um dakooxin o layaa fo xa kooniit.

Filip 3:18 Referans Kwoze

Efees 4:17

Keeke um layaa a nuun boog, soo yegnan a nuun no gon le no Yaal oxe: Ba nu ñaaƴtat nen gimaƭaru we, na ndeefaa a qalaat ake den naangeerna o ƥisaa den sen.

Esayi 8:11

O Yaal oxe a pokaxam, a maƭooxaam, ndax xotkiim a ƭat ale na xeet feene. Keeke refu ke ta layaxama:

Galati 6:12

We andoona yee kaa mbaaƭaa o mbaagir fo wiin we, na seraa a nuun nquc. Keene da mbi’aa fop, kaa mbañaa wiin we a ñaatland a den, yaam ne da ngoolooxna a Kiristaa fee rengeena na kurwaa.

Galati 2:14

Ye ga’uuma yee njagnee no Yegil mbaax ndigil ne, dalfooxaam o lay a Kefaas mbaambir no fop ee: «Wo fee refna o Yaawuur, too naagiro o ñoowtaa nen o Yaawuur, xar taxu o seraa we ndefeerna Yaawuur, da mbi nen Yaawuur we?»

Galati 1:7

Refee koy ee kaa jeg yegil mbaax lakas, ndaa kaa jeg wiin waa na njom’andaa a nuun, a mbug o yaq Yegil mbaax ne Kiristaa.

Yeremi 13:17

Nu nan-gilooxangee kene, xam lool na pet, yaam a magnandax ale nuun. Xam yuurin xa kooniit, a kid es a nqaaraa fo xa kooniit, yaam xan o siir ole no Yaal oxe a ɓisel took o hup doole.

2 Piyeer 2:10

We na ndeefaa paaxeer ke cer den a yaawaa, Roog a moƴkaa o xaw, den we saɗareerna katil um. Jaajangin maamaaɓ weene mbitee dara. Kaa nduqwaƭar, too saɗaree o mben we njegna o ndam na asamaan sax.

1 Tesalonik 4:6

No keene, ba o leng na nuun a tooñ o pog um o kimu mbaat ta jaɓ o teem, yaam i lay’aan, too maƭooxin a nuun boo ƈut, xan o Yaal oxe a dalin hate no keene fop.

Filip 1:4

xeɗanaa a nuun, nuun fop, diisan ne ɗaaytuuma

Galati 5:21

A naanga o siisraa itam, too a yeraa a yer a maamu, a ñaamaa kupu, a mbi’aa lakas kaa nandna fo keene. Mexe layaa a nuun ne layit’anuuma a nuun yaaga yee: We na mbi’aa tig nandu neene lamkee Maat ne Roog.

Galati 2:21

Fañkiim yirmande fee Roog, yaam a reeƭangaa yee o kiin a waaga ɗeetel nen o cofu mbaambir Roog yaam ne ta fi’aa ke kebil ke a layna, Kiristaa dey’ee o xon.

2 Korint 11:29

Boo o kiin a neewna doole rek, yaaga mexe no neew doole itam, too o kiin a yenangaa, yaaga mexe ñoowaa na naqad.

2 Korint 11:13

Wiin weene apootar maamaaɓ a ndefu fo jaajal laalaal waa mbi’ooxna apootar Kiristaa.

2 Korint 2:4

Kam coono magnu fo xeeñ ŋaƭe, may fo xa kooniit bo, bindit’um a nuun, refee koy ee ndax nu naqadiloox, ndaa ndax nu and o mbeq o njegee hap onqe jeguuma na nuun.

1 Korint 6:9

Xeƈa kaa a yiif nuun ngalagee yee oxe naageerna o fi’aa ke Roog a bugna lamkee Maat ne Roog. Koo qoyni, ba o leng a nax a xoox um, yaam a cuut ake, we na njuuraa, we na seeqaa, goor we mbaat rew we na mbesanraa a ndeer den,

1 Korint 1:18

We na ndeefaa a ƭat a saŋkax mbi’u ñaku xoox a kurwaa le na waare’eel, ndaa na in we mucna, katil Roog oo.

O leetar ole Pool a bindna GIMU WE NGENNA ROM 9:2

Kene refu o gooy o maak ole fa naqad fee jeguuma kili kam xeeñ es.

YEGIL MBAAX NE YEESU ne Lik a bindtuuna 19:41

Yaa Yeesu a faambnooxna teeru faa boo a ga’in, a loolooxaan, a lay ee:

Yudaa 1:13

Kaa nand fo a yag-ee-yag ake no maag ole na ndiñaa a puur. Neene wiin weene a suttaa a pi a cednooxu ke den itam. Kaa nand nen xa qoor xa mo’u. Roog a geekana a den ɓaal-ee-ɓaal le no niɓaan ole boo faw.

2 Tesalonik 3:11

Me ta refna koy, in we nanaa yee a jega na nuun waa mbeeñaakna, a ndokaa no kaa a ƭat den a yongeerna, a mbañ o njalik.

A pi ake 20:19

Kaam faɗooxoogu o Yaal oxe kam a neewandax fo kam xa kooniit fo kam naqad yaam yuuƥ ke Yaawuur we a mbexeyooganaxama.

Yeremi 9:1

Ndi an na ci’kaxam na koƥ-a-ƥor alaa o daland no ñaañaaƴ? Yaaga xaƴkoogaam xeet es soo goƭ a den, mi o Yaal oxe, yaam den fop seeseeq a ndefu, a yaj no hoohod.

A kim a tedu ke 119:136

A kid es kaa nqaaraa fo xa kooniit, yaam ne a cangin of a reefaandeena.

Galati 6:14

Mi o mat, a refangeerna a kurwaa le no Yaal in Yeesu Kiristaa, bugiim o fakoor lakas. Ke yaawooguuma na adna fee fop, yaawatinum, yaam kaam nand nen oxaa xonna, too a kurwaa le Kiristaa soom taxun. Ñoowtatiim ne adna fee a ñoowtaa, too adna fee ñoowtee ne um ñoowtataa.

A paɗax ale 11:16

a ba, a sambaaƭ, a caakraan, a maf-o-ngookol fo xa qos den,

A paɗax ale 13:8

Fat o saasadax oxe a ɗeetatinin. Boo o ɓuɗ ole a xayna took ƭool ne, fat o saasadax oxe a yegnit ee o kiin oxeene xoolee. A tik-a-maak a saqu.