Tito 3:7 - Seysyo No Tao

⁷ O pangangarilawan na ni Ama ta do to am ori o ikapya ta na so nakenakem jya, ta abwata rana o raraten ta do tangain na. So ikanoyong ta mapananala so kapakahap ta rana so to meyyonong a ikavyay no pahad ta.

Tito 3:7 Referans Kwoze

Loma 8:17

No manoyong o kakma tey anak ni Ama ta do to am manoyong keyyan no itoro na jyaten no makwa. So ikakman ta sang a macikasaray do Anak na si Yeso Kizisto. Ta yaten rana am no macyanod ta do alalaw na ni Kizisto am macikazway ta do azwazway na.

Loma 3:24

So na nitovoyan si Yeso Kizisto a yasomidong jyaten a komaro do raraten ta do na karilaw nyaten. So ikanoyong ta na abo so raraten do tangain na ni Ama ta do to.

Tito 2:11

Peyvazain ta o yamakakaday ang. Ta yarana mapengkad o pangangarilawan na ni Ama ta do to a mapatazadang jyaten a tao do karawan.

1 Kedinto 6:11

Yamyan jinyo so nimakman so sang no kakwa. Am kanivonas na rana so raraten nyo ni Ama ta do to. So nyo rana ipacikownongan ji Ama ta do to a kabnek na rana ninyo a abo so raraten do tangain na, do kapeyhanhan nyo ni Yeso Kizisto a Panirsirngen ta kano katalamozong na jinyo no Seyzi na ni Ama ta do to.

Tito 1:2

O peypeypangayan na rana no nanao eya am ipakahap ta so to meyyonong a ikavyay no pahad ta. Manoyong o nipanci na a itoro na jyaten no kaji na pa mangamaogan so karawan. Ta si Ama ta do to rana am abo kalalasan na.

Yake 2:5

Amizngen nyo manga keypong an. Na nitenngan ni Ama ta do to sira o makasi a tao do karawan a makdeng so nakem a omraralay nya. So da ikanoyong a makahap so nakem na sira ni Ama ta do to a macikaop rana do italamozong na.

Cyalatay 2:16

Am ta katenngan an, o ipacikaop no tao ji Ama ta do to am anoyngan si Yeso Kizisto. Beken a omagaz do kahap so iwawalam ni Moyse. Yaten rana am yata anoyngan si Yeso Kizisto. Am ori o ta ipacikaop ji Ama ta do to. So na ji monganai do ta kapangozay do iwawalam na ni Moyse. Ta abo o asa ka tao a meypapya no iwawalam na ni Moyse do tangain na ni Ama ta do to.

Cyalatay 3:29

No kamo macilovot ji Kizisto am manoyong kamo na a macikownongan ji Apolahan a omamoon so aryarilaw na ni Ama ta do to si Apolahan.

Loma 4:16

O mina ciring na ni Ama ta do to so meyhanhan nya tao am to na palololwa do kapeyhanhan da nya. So ji na monganai do kapya no icicirawat ta. Ta o aryarilaw na ni Ama ta do to jyaten a sivosivovoong na ni Apolahan am ori o nipanci na a itoro na jyaten ni Ama ta do to. So ji ta mangozai do iwawalam na ni Moyse. Ta macyangay ta ji Apolahan a omanoyong ji Ama ta do to. Ta iya rana am akma tey ama a yameyhanhan ni Ama ta do to.

Loma 3:28

O ikabo no raraten no tao do tangain ni Ama ta do to am meykasaha. Ori rana am ipeyhanhan si Yeso Kizisto. So ikabeken a kahap ta so iwawalam na ni Moyse.

1 Pite 3:7

Inyo rana mahakay a katovong da am panadnaden nyo sira o katovong nyo do vahay a mavakes, do kaji da macingayan jinyo so kolit. Ori an, kanigan nyo nira. Ta meyyangay kamo a makahap so to meyyonong a ikavyay no pahad nyo. No si mahap nyo o akman sang am abo ji na ngamizing a inozi nyo ni Ama ta do to.

Sipolay 11:9

Tana meyvahay do matarek a ili si Apolahan am nipeyhanhan na si Ama ta do to. So nipangilili na a meyvahay do akmey sarwap. Akman sang si Isa kani Yakebo. Ta meyyangangay sira a omapanala so mina ciring na sira ni Ama ta do to.

Sipolay 11:7

Si Noya rana am tana ji na pa nimacita o vazay am nyamizing na o nipaziman na sya ni Ama ta do to, do kapeyhanhan na ni Ama ta do to. Ori o nipamaring na so rako a avang. Ori o nikapya da asa ka vahay do henep, do katey rako no raraten no tao do karawan. So nikanoyong ni Noya a nibnek na ni Ama ta do to abo so raraten do tangain na, ta nipeyhanhan na si Ama ta do to.

Sipolay 6:17

Mina to na rana mancyan ni Ama ta do to o kaji na ablisan no nakenakem na sira so tao a omamoon so mina ciring na jira. Am ori o nyaitan na do ciring na ni Ama ta do to akma ney yongkad. O nipasongsong na ciring am ngaran na ni Ama ta do to,

Cyalatay 4:7

Inyo rana sicyaikwaya am beken a lamlamsoy kamo rana a na italamozong no iwawalam ni Moyse, ta akma ney anak rana inyo ni Ama ta do to. O akma ney anak ni Ama ta do to am ori o makahap so aryarilaw na.

Loma 4:4

O meyvazay a tao am manoyong o kapeynizpi sira. Am o nizpi da am beken a karilawan na nira no mapeyvazay sira, ta nizpi da do kapeyvazay da.

Tito 2:13

So ikanoyong ta mapananala so ipeygegcin na no Tao do to ta si Yeso Kizisto a kapacizanod ta somaray do azwazway na. Ta iya o mapatazadang jyaten do teyngato.

Matay 25:34

Karahan am maniring o panirsirngen do amyan do wanan na tao am, ‘Inyo rana yana nipanlanlag ni Ama am sijya kamo do italamozong na ni Ama ta do to, ta amoonen nyo o nakem na jinyo no kapangamaog na pa so karawan.

Make 10:17

To rana jyangay si Yeso am to ngyan so asa ka tao a malayo a mangay a meylilitod do tangain na. Maniring jya am, “Mo Mangnanao a tey yapya so nakenakem. Makongo ko so wanjin a kapakahap ko so to meyyonong a ikavyay no pahad ko.”

2 Tesalonicya 2:16

Na ikarilaw yaten ni Ama ta do to a kani Yeso Kizisto a Panirsirngen ta. O pangangarilawan na ni Ama ta do to am ori o yapwan no to meyyonong a sarasaray no onowned ta amnanala so nakem na jyaten.

Sipolay 1:14

Ikongo o tinsi. Sira rana am na kalamsoyan sira ni Ama ta do to a somidong so yarana makahap so to meyyonong a ikavyay no pahad da tao.