Nimlivolivon 13:45 - Seysyo No Tao

⁴⁵ Am macita da no tao do Yotay o karo da no meylovolovot a tao am ikeynanahet da sira. Am ori o rehrehtan da si Pawlo a kano ciriciring na.

Nimlivolivon 13:45 Referans Kwoze

Yota 1:10

Am sira rana a malas so ipangnanao a tao ori am da to rehrehta o yada jyatenngi a vazay. So da icyakmey omalalam a ji makateneng do apya kano marahet. Ori rana o ipakasapa da so peyoyaoyyan na ni Ama ta do to.

Nimlivolivon 18:6

Am ji da ngamiznga, ta o karaherahet da sya. Am ori o nitoktokan na ni Pawlo do talili na so ibeybek. Maniring pa jira am, “Si amyan so oyaoyyan na ninyo ni Ama ta do to no makwa am beken a yaken o raraten an, ta monganay jinyo an. To ko na papwa sicyaraw eya o kangay ko na a mangnanao so beken a tao do Yotay.”

1 Tesalonicya 2:16

Yada zazaten yamen a yameylimwang no ciriciring na ni Ama ta do to a mapatazadang so beken a tao do Yotay. So da ikanoyong a yameyparo so yapeyraratenan a peydednan no peyoyaoyyan na ni Ama ta do to.

Nimlivolivon 19:9

Am tatasa jira o ji mapownot so nakem da amraherahet so nipangnanao ni Pawlo a omagaz ji Yeso Kizisto. Am ori o nipalolwan na so sinjya ni Pawlo a komaro jira. So nipangday da so araw a meysirisiring do pangananawan na vahay no meyngaran so Tilano a tao.

Nimlivolivon 5:17

O rako a panirsirngen da no mapatanatanang so nakem da si Ama ta do to a kano kararay na macyagom do Satokay am ikeynanahet da sira o nipamnekan ni Yeso a omlivolivon no ciriciring na.

1 Pite 4:4

So yada na savasavakan ninyo no yaji manaralay a tao, do yanyo na kaji macikaopan jira a somagpyan so vazay. Am ori o da kazyakan ninyo.

1 Kedinto 3:3

Ta inyo rana am nyo pa pangozayan o icicirawat no tao. Ta amyan pa jinyo so yamanginanahet a kano yamgalagal a tao. O na ikakman sang am kakownongan na no nyo kapacikaop pa do karawan.

Nimlivolivon 17:5

Am o meyili dang a tao do Yotay a ji nganoyong ji Yeso am ikeynanahet da sira. Am ori o nilovotan da so abwata so vazavazay a tao a kano marahet so nakenakem a kapeyzavozavoz da sira so aro a tao a kasdep da do vahay ni Yeson a komala si Pawlo a kani Sila. Ta naknakmen da o kangay da nira do tangain no aro a tao.

Matay 27:18

Katenngan ni Pilato o nyahapan da si Yeso a itoro jya do keynanahet da nya.

Yake 4:5

Ji nyo akwan o kalas na no ciring do Seysyo a manci no kaji na mamyapyan nyaten no Seyzi amyan do onowned ta a mapatarek so iraralay ta.

Cyalatay 5:21

manginanahet a kano mayoyopen so saki a kano makakaday pa a ikarahet no tao a vazay. Oya rana am nipaziman ko na jinyo no kakwa. Am yako olin pa ipanci jinyo. Ta o mapeyvazay so akman sang a tao am ji macilovot do italamozong na ni Ama ta do to.

Loma 1:29

Yamakakaday o raraten do onowned da akman so mangagom, manginanahet, manwakwak so tao, mapatongtonggal, mangalalas a kano mangamaog no tao so ciring.

Matay 23:13

“Inyo rana yatanwasiwasi a yamangnanao no iwawalam ni Ama ta do to a kano tao a macyagom do Vadisay am to kamo makasi. Ta inyo rana am nyo taywen o oyowyat ni Ama ta do to do tangain no tao. Nyo ji mya o kataotao nyo a macikaop do italamozong ni Ama ta do to. Akman sang o tao a nyo ji mya a yamacikaop do italamozong ni Ama ta do to.

Nimlivolivon 13:50

Am pasozisozin da no tao do Yotay o maizay a mahakay a kano meynakem a mavakes a omraralay ni Ama ta do to a mapakakasi si Pawlo a kani Parnapo. Ori o nipowbotan da sira do ili da.

Nimlivolivon 14:2

Am o jyakey a manganoyong a tao do Yotay am pasozisozin da sira o beken a tao do Yotay a macioya do amraralay ni Yeso.

Nimlivolivon 14:4

So nipeypinpin da no tao do dang. O asa lipenpenan am macikagom do tao do Yotay. O asa lipenpenan am macyagom da Pawlo a kani Parnapo a omanoyong do nanao da.

Nimlivolivon 14:5

Am o tao do Yotay a kano panipanirsirngen da kano kararay da beken a tao do Yotay am naknakmen da o kapaciliman da ji Pawlo a kani Parnapo a agsagsahan.

Nimlivolivon 14:19

Am o tao do Yotay a nimapo do Ikenyan a kado Antia a macinapnap do Pisitiya am paksozen da o aro a tao a kagsegseh da ji Pawlo. Ipanci da nimazakat rana. Am ori o nilolwan da sya yangay do siri no ili da.

2 Kedinto 11:26

No kalivon ko am apokwaro no kapeykaranom na, apokwaro do marahet so nakenakem a tao, pacyangayan no alalaw ko do tao do Yotay a kano beken a tao do Yotay a kano alalaw ko do rako a ili da no aro a tao a kano alalaw ko do kabwan no nihakawan no tao a kano alalaw ko do karakwan no awa, a kapacyangay no alalaw ko do ji meyngongyod a akma koy kakteh do cinai.

2 Timotay 3:11

Mo katenngan o ko kato nazibwan no aro a alalaw ko do Antia kado Ikenyan a kado Disetela. Am kanisomidong na jyaken ni Yeso a komaro do akman sang a nipeyrarehtan da jyaken no tao.