Nimlivolivon 10:38 - Seysyo No Tao

³⁸ Nioyatan na no Seyzi si Yeso a tao do Nasale. So nilivolivon na mangiwakwak so meykeyngeyngen a tao a mamozwaw so kalamsoyan ni Satan a komovot do tao, do kapacikaop na jya ni Ama ta do to.

Nimlivolivon 10:38 Referans Kwoze

Locya 4:18

“Yanimeygegcin jyaken o Seyzi na ni Ama ta do to. Ta yana nipamnekan yaken a mangay meylimwang no Mapasaray a Ciriciring na ni Ama ta do to do makasi a tao. Nitovoy na yaken a meylimwang no kasaway da rana no akmey kaneban a tao a kapakacita da rana no mavota tao a kasaliway da rana no peylamlamsoin da tao.

Nimlivolivon 2:22

Maniring pa si Pite am, “Inyo rana Isedi a tao a keylyan ko am amizngen nyo o ciring ko an. Ta si Yeso rana tao do Nasale am nitovoy na ni Ama ta do to. Oyowyat na kano mapeyzokab a vazay na rana ni Yeso am yongkad na ori do mina katovoy na sya ni Ama ta do to. So nyo ipakateneng do akman sang a vazay. Ta mina vazay na ya do tangain nyo an.

Yowani 3:34

O nitovoy ni Ama ta do to o mapatwaw so ciriciring na ni Ama ta do to. Ta oyatan no Seyzi.

Sipolay 1:9

O yapya vazay o mo ikakza. Mo ikaoya o malas a vazay. Am ori an, na ika yaken a Tao do to mo no yanimamnek jimo a yanimanta nimo so azwazway mo a kano sarasaray mo. So da ikabo no kararay mo a makahap jimo.”

Yowani 3:2

Ipisa kahep na am mangay ji Yeso. Maniring jya am, “Mo Mangnanao, namen katenngan imo a mangnanao a nitovoy ni Ama ta do to a yamangnanao so tao. No yabo si Ama ta do to a yasomidong jimo a meyvazay a mapatwaw so kayapo mo jya am abo tao a makapeyvazay sya.”

Matay 12:28

No si manoyong ko a mamozwaw no oyowyat ni Ama ta do to am yamanoyong rana si Ama ta do to a tomalamozong no omanoyong jya tao sicyaikwaya.

Locya 3:22

So niyan na no Seyzi akman so hato a someyked do kataotao na. Am ori o niyan no ciriciring a nimapo do teyngato. Maniring am, “Manoyong ka Anak ko an. So sarayan ko nimo an.”

Yowani 10:32

Maniring si Yeso jira am, “Yaro rana o yanyo nimacita a ko pangarilawan a na nitoro a vazay na ni Ama. Am ikongo yamarahet dang a vazay ko a yanyo kato meyvatwan nyaken.”

Yowani 16:32

Naknakmen nyo an. Ta makeykai rana o kasyasyay nyo rana mangay do peycyavakavahayan nyo a ika yaken rana no yamaveyvow. Am ko jyaveyvow, ta macikaop jyaken si Ama.

1 Yowani 3:8

O meyraraten pa tao am macibedbed pa ori ji Satan. Ta nimeycicinda no kakwa o kapeyraraten na ni Satan. Ori na nyai no Anak ni Ama ta do to a ombalinas so vazay ni Satan.

Yowani 6:27

Taosya o kaziknan nyo no ji mamayok a kanekanen. Ta apyapya pa o kaziknan nyo no kanen a yapwan no to meyyonong a ikavyay no pahad nyo. O kanen rana ori am yaken o yatomoro nya jinyo. Ta yaken a Nipamnekan na ni Ama ta do to a tao o tomoro no akman sang jinyo. Ta yarana amyan jyaken so oyowyat na ni Ama ta do to. Ori rana am yongkad na no yanitomovoy jyaken.”

Matay 9:35

Nilivolivon ni Yeso o peyneynozyan do peycyeylilyan na a kapangnanao na a meylimwang no Mapasaray a Ciriciring do katalamozong na rana nyaten ni Ama ta do to, a keywakwak na do meykeyngeyngen a tao.

1 Pite 5:8

Meypepzat kamo. Taosya o kakma nyoy mitkeh so onowned. Ta si Satan a kavosoyan nyo am yakmey kokoman so tao a yaji yakneng do na yanan a yameykala so tao a na kanen a na pasyain so nakem ji Ama ta do to.

Locya 9:42

Makaranes o anak na am paleklekteken na no kalamsoyan ni Satan a kapamezamezay na. Ori o nioyyan na nya ni Yeso so kalamsoyan ni Satan. Am ori o nikapya na rana no kanakan a katoro na rana nya do ama na.

Matay 12:15

Mamizing ni Yeso o kapacioya da jya am karwan na do dang. Am aro sira o tao a macihza jya. Ori o niwakwakan na do meykeyngeyngen a tao.

Make 6:6

Am ori o nyeyyakan na nira, ta ji sira manganoyong o aro a tao. So ji na nimacimazai do kalivolivon na do peycyeylilyan na mangnanao so tao.

Locya 9:56

So nipeypangay da do matarek a ili.

Nimlivolivon 10:37

Nyo na katenngan an, mateyka si Yowani a omononong do kapanaktak na am papwen na rana do Cyadidi a macinapnap do Yotay o keyyan no mapeyzokab a vazay.

1 Yowani 2:20

Am na rana nitoro jinyo o Seyzi ni Kizisto. Am ori o nyo ikamimin a yarana makateneng do nanao ni Ama ta do to.

Matay 9:19

Makarahan am meytatanek si Yeso a omonot jya mangay. O macinanao jya am nimacilolo sira.