Nimlivolivon 1:2 - Seysyo No Tao

^2-3 a mangay no kapeycyakavat na rana mangay do teyngato. Ikapat na ngarnan (40) no araraw no nipeyvangon na am ipiro na o kataotao na ipacita do nipamnekan na omlivolivon no ciriciring na. So ipakateneng da do kanoyong na rana nimavyay a kapanci na nya jira so italamozong na ni Ama ta do to. No kaji na pa meycyakavatan a mangay do teyngato am nioyatan no Seyzi si Yeso a omyokod no nipamnekan na omlivolivon no ciriciring na a vazay na jira.

Nimlivolivon 1:2 Referans Kwoze

Nimlivolivon 1:9

Teyka na rana ori a ciring am meycyakavat rana si Yeso do teyngato. Tangarahen da am amyan so asa ka cinalab ambengbeng so citahen da.

Sipolay 9:24

Jya nisomdep si Yeso do nyamaog no tao a akmey sarwap a panaralayan. Ta o nyamaog no tao am ji meyngongyod ori. Si Kizisto rana am yarana myan do teyngato a mapasyasi nyaten do tangain ni Ama ta do to.

Nimlivolivon 10:38

Nioyatan na no Seyzi si Yeso a tao do Nasale. So nilivolivon na mangiwakwak so meykeyngeyngen a tao a mamozwaw so kalamsoyan ni Satan a komovot do tao, do kapacikaop na jya ni Ama ta do to.

Yowani 20:21

Maniring si Yeso jira am, “Makapiya kamo so onowned an. To ko mangozai si Ama a nitomovoy jyaken. So ikakman ko sang a tomovoy jinyo.”

Yowani 13:18

“Beken a ko to zagoma inyo a yapeyciringan sya, ta ko katenngan sira o yako nitenngan a tao. Am manoyong o ciring do Seysyo an. Ta maniring am, ‘O yamacihanghang jyaken a asa ka tao am yamanazang nyaken.’ So ipangononong no ciring ang.

Yowani 13:3

Katenngan na ni Yeso o kanitomoro na nya jya ni Ama ta do to so oyowyat na. Katenngan na o kanimapo na ji Ama ta do to. So ipakateneng na do kapeysinaoli na ji Ama ta do to.

Ipaziman 21:14

O abneken na soil no atoy am adwa o icyarwa no lalitan a kakakadayan no ngaran da no nipamnekan no Kagling a amlivolivon no ciriciring na.

Ipaziman 3:22

O ciring na no Seyzi do peycyakyokyokayan na am amizngen nyo a yameycicilwan a tao an.’ ”

Ipaziman 3:16

Ta inyo rana am akman kamo so nikwat a ranom a yaji ngazidangdang a yajyarekmeh. So awwan ko ninyo.

Ipaziman 3:13

O ciring no Seyzi do peycyakyokyokayan na am amizngen nyo a yameycicilwan a tao an.’

Ipaziman 2:29

O ciring no Seyzi so peycyakyokyokayan na am amizngen nyo a yameycicilwan a tao an.’

Ipaziman 2:11

“ ‘O ciring no Seyzi so peycyakyokyokayan na am amizngen nyo a yameycicilwan an. O jya nimablis so onowned a tao am ji rana meydedna jya o keypirwa na mawakwak.’

Ipaziman 2:7

O ciring no Seyzi so peycyakyokyokayan na am amizngen nyo a yameycicilwan a tao an. Sira rana yamakata tao am ipanta ko sira so oyowyat da a koman so asyasi no kayo a yapwan no to meyyonong a ikavyay no pahad da ji Ama ta do to do teyngato.’

Ipaziman 1:1

O vakong rana ya am na adketan no nipatwaw ni Yeso Kizisto a vazay. O na nitorwan nya jya ni Ama ta do to so akman sang a vazay am mangay na ipanci do aro a lamlamsoy na o yarana makeykai a makaranes a vazay. Si Kizisto rana am nimapahanhan so tinsi a mangay mapacita no aro a vazay eya do lamlamsoy na si Yowani.

2 Pite 3:2

Inaoy si mamimin nyo peyyanen do onowned nyo o mina ciring da no panoyonoywan na so ciring ni Ama ta do to a kano mina ciring na ni Yeso a Panirsirngen ta a mapatazadang jyaten do teyngato a ninanao da jinyo no nipamnekan na a omlivolivon no ciriciring na.

1 Pite 3:22

Yana myan si Yeso Kizisto do teyngato a yamlisna do wanan ni Ama ta do to a yatomalamozong no tinsi. So ji da makapeysopoi do oyowyat ni Kizisto no makakaday do teyngato.

1 Timotay 3:16

Yata katenngan an, o makdeng a nanao a nipatwaw ni Ama ta do to a yata anoyngan. Nimatazak a tao si Kizisto. O Seyzi am yongkad na a abo so raraten. Nimacita da no tinsi, a yarana meylimwang do peycyamahamahatawan na, a yada rana anoyngan no aro a tao do karawan. So nikatkatan na sya ni Ama ta do to a yangay do teyngato.

Ivoso 2:20

Ta nyo nimahap rana o nanao da no nipamnekan ni Yeso a omlivolivon no ciriciring na kano mangononong so ciriciring na ni Ama ta do to. So na ikamimin no nang a yapo ji Yeso Kizisto.

Cyalatay 1:1

Yaken rana am si Pawlo ko. O yako ipeyngongyod a lamlamsoy na ni Ama ta do to am beken a tao o yaniomrara jyaken a omlivolivon no ciriciring na ni Ama ta do to, ta si Yeso Kizisto a kani Ama ta do to a nimapeyvangon si Yeso Kizisto o yanitomovoy jyaken.

Nimlivolivon 1:13

Makaranes sira do Yelosaleng am somdep rana sira do kavava no vahay a peyvahayan da. Sira rana am si Pite a kani Yowani a kani Yake a kani Antele a kani Veydipo a kani Tomase a kani Patolomaw a kani Matay a kano anak na ni Alevey a si Yake a kano ipanci da macikagom do macioya do Loma a meyngaran so Simong a kano anak na ni Yake a si Yota.

Nimlivolivon 1:11

“Inyo rana a tao do Cyadidi am ikongo nyo ipeytatanek do jya a yatomangara so hanit. Ta si Yeso eya yakomaro rana jinyo a yamangay rana do teyngato am akman sang, ta mirwa pa meysinaoli do teyrahem a maciralay do cinalab.”

Yowani 20:17

Maniring si Yeso am, “Ji mo minani yaken, ta yako pa jya nimangay ji Ama. Angay da kakteh ko do cinai a kapanci mo nya jira so ko kapeysinaoli a mangay ji Ama a Tao do to ta. Ta iya rana am ta kalovotan a Tao do to.”

Yowani 17:13

“Sicyaikwaya am ko na mangay jimo. Ko na nipanci o aro a vazay eya do yako iyan pa do karawan. So ikanoyong da masaray so onowned do kapasaray ko sira.

Yowani 16:28

Ko apo ji Ama ta do to a yanimai do teyrahem. Sicyaikwa rana ya am ko na karwan o karawan a yamangay rana ji Ama ta do to.”

Yowani 13:1

Kasaraw pa kapamaring da na so kanen do ngaranan da Iyeci am katenngan na rana ni Yeso o kakeykai na rana meysinaoli ji Ama na do to. Na tey karilaw o omanoyong jya tao do karawan. Tana marateng rana o ikawakwak na am ji namtadan o karilaw na nira.

Yowani 6:70

Maniring si Yeso am, “Ko inyo nipamnekan a yararwa so ikakarwan am yamyan jinyo so yasa ka tao a yana italamozong ni Satan.”

Yowani 6:62

Mangay kapeyzokab nyo nyaken si macita nyo yaken a Nipamnekan na ni Ama ta do to a tao a meysinaoli do teyngato.

Yowani 3:34

O nitovoy ni Ama ta do to o mapatwaw so ciriciring na ni Ama ta do to. Ta oyatan no Seyzi.

Yowani 1:16

Yateywara o pangangarilawan na a na itoro jyaten. O aryarilaw na jyaten am yabo yakasaraw a na ipeywalam.

Locya 24:51

Ipanlanlag na sira am karwan na rana sira a meycyakavat a mangay do teyngato.

Locya 9:51

Makeykai rana o kapeysinaoli na ni Yeso do teyngato am ji na ngaolii o kangay na do Yelosaleng.

Make 6:30

Meysinaoli sira ji Yeso o nipamnekan na a omlivolivon no ciriciring na am ipanci da rana ji Yeso o mina vazay da no kapeylimwang da no ciriciring na.

Matay 12:28

No si manoyong ko a mamozwaw no oyowyat ni Ama ta do to am yamanoyong rana si Ama ta do to a tomalamozong no omanoyong jya tao sicyaikwaya.

Matay 3:16

Meypapowpow si Yeso apo do ranom am todacyangi o hanit. So nipakacita na so Seyzi na ni Ama ta do to a akmey hato a meyhekas a someyked do kataotao na.

Ipaziman 2:17

“ ‘O ciring no Seyzi so peycyakyokyokayan na am amizngen nyo a yameycicilwan a tao an. Sira rana a jya nimablis so onowned a tao am itoro ko jira o kanen apo do teyngato a meyngaran so mana a yajyasingkad no mata sicyaikwaya a kapanta ko nya so malavang a veysen a adketan no vayo a ngaran. O mahap so veysen a tao o makateneng do ngaran a domket do veysen ang.’