Matay 11:5 - Seysyo No Tao

⁵ do yada kapakacita rana no nimavota tao. Da kapakalam rana no nimakasapa a tao. Yada kapya rana no niomlabyab so kolit a tao. Da kapakamizing rana no nimateleh a tao. Da kavyay rana no nimawakwak a tao. Da kapakamizing rana so Mapasaray a Ciriciring no ipangoyongoyod da a tao.

Matay 11:5 Referans Kwoze

Locya 4:18

“Yanimeygegcin jyaken o Seyzi na ni Ama ta do to. Ta yana nipamnekan yaken a mangay meylimwang no Mapasaray a Ciriciring na ni Ama ta do to do makasi a tao. Nitovoy na yaken a meylimwang no kasaway da rana no akmey kaneban a tao a kapakacita da rana no mavota tao a kasaliway da rana no peylamlamsoin da tao.

Yake 2:5

Amizngen nyo manga keypong an. Na nitenngan ni Ama ta do to sira o makasi a tao do karawan a makdeng so nakem a omraralay nya. So da ikanoyong a makahap so nakem na sira ni Ama ta do to a macikaop rana do italamozong na.

Matay 21:14

Amyan so mavota kano makasapa tao a nimangay do tangain ni Yeso. Ori o niwakwakan na jira.

Yowani 10:38

Am tana ji nyo nganoyngi yaken am anoyngan nyo o vazay ko an. Ta ori o ipakateneng nyo ji Ama yamacikaop jyaken. Ta yako macikaop jya.”

Yowani 10:25

Maniring si Yeso am, “Nipanci ko na jinyo am nyo ji nganoyngi. To nyo na novili o vazay a na nitoro jyaken ni Ama, ta ori o yongkad ko a yapo ji Ama ta do to.

Yowani 5:36

Am patwawen ko pala o makdekdeng pa vazay ko a kano mina ciring ni Yowani. O vazay rana ori am nitoro na jyaken ni Ama a pakavosen ko. O vazay rana ori am yongkad ko ori a nitovoy ni Ama.

Yowani 3:2

Ipisa kahep na am mangay ji Yeso. Maniring jya am, “Mo Mangnanao, namen katenngan imo a mangnanao a nitovoy ni Ama ta do to a yamangnanao so tao. No yabo si Ama ta do to a yasomidong jimo a meyvazay a mapatwaw so kayapo mo jya am abo tao a makapeyvazay sya.”

Yowani 2:23

Amyan si Yeso do Yelosaleng a macipamaring so kanen do Iyeci am aro tao a nimakacita so vazay na a yongkad no kapo na ji Ama ta do to. Am ori o nyanoyngan da rana jya.

Make 9:25

Macita ni Yeso o aro a tao a mangay omlimot sya am maniring do kalamsoyan ni Satan am, “Imo rana a na ikateleh a kalamsoyan ni Satan am yako imo sirsirngen a ji ka na meyyahahay a komaro do kataotao no kanakan. So ji mo na peyneynami so kapeysinaoli mo.”

Make 7:37

Abo ji navasavak a makamizing sya. Maniring sira am, “Yateywara o vazay na a yato makapeypapya so yamateleh a kano yaji makabnebnek.”

Matay 10:8

Iwakwakan nyo sira o meykeyngeyngen a tao. Avyain nyo sira o nimawakwak a tao, kapya da no omlabyab so kolit a tao a kapamozwaw nyo so kalamsoyan ni Satan a komovot do tao. Yabo o ngina na no oyowyat ni Ama ta do to a nitoro na jinyo. So icyakman nyo sang a ji macyami do sidongen nyo a tao.

Matay 9:30

Makarahan am to sira na makacita. Maniring rana si Yeso jira am, “Ji nyo meycicicyan o vazay eya do tao an.”

Matay 5:3

“O tao a omanoyong do kataotao da a ji makanet so nakenakem ji Ama ta do to am tey yapya sira. Ta macizanod sira do italamozong ni Ama ta do to.

Nimlivolivon 2:22

Maniring pa si Pite am, “Inyo rana Isedi a tao a keylyan ko am amizngen nyo o ciring ko an. Ta si Yeso rana tao do Nasale am nitovoy na ni Ama ta do to. Oyowyat na kano mapeyzokab a vazay na rana ni Yeso am yongkad na ori do mina katovoy na sya ni Ama ta do to. So nyo ipakateneng do akman sang a vazay. Ta mina vazay na ya do tangain nyo an.

Matay 11:4

Maniring si Yeso do nitovoy ni Yowani am, “Angay kamo pancyan ji Yowani o nyo nimacita kano nyo nimamizing,

Matay 12:13

Maniring rana si Yeso do meykazakazain so lima tao am, “Zanet pala o lima mo.” Zaneten na am todapya rana, kapeyyangay na rana no lima na.

Yowani 9:7

Maniring jya si Yeso am, “Angay oyasi do nibneng da ranom a yameyngaran so Siloya.” O peypeypangayan no Siloya am Nipahanhan. Karahan am mangay na rana oyasan. Meysinaoli am makacita rana.