Loma 9:23 - Seysyo No Tao

²³ Am na kapacita nya jyaten so rako a pangangasyan na. Ta yaten rana ya am nipamnekan na yaten a macikazway jya no makwa.

Loma 9:23 Referans Kwoze

Loma 2:4

Manngwa, mo jyatenngi o pangangarilawan na ni Ama ta do to a yameypalanginan nimo a yamamlis? Am yamo kato nazibwan no rako a pangangasyan na yamvonas so raraten mo, do yana kakzeb jimo a yamamlis so onowned.

Ivoso 3:16

Ko ipeynozi ji Ama ta do to o kowyat na jinyo no Seyzi a meypakdeng so nakem ji Ama ta do to. Ta iya rana am yatey mowyat a yatey mazway a Tao do to.

Ivoso 2:10

Si Ama ta do to o yata nikablis no onowned a yarana macikaop ji Yeso Kizisto. So na ikapya rana no vazay ta a mangonong do na peypalanginan nyaten ni Ama ta do to.

2 Timotay 2:21

O ko pancyan no nang am tanyo akman so makakaday a apzapzatan ang. No ji ta pasngena o raraten do kataotao ta am manoyong kapahanhan na jyaten ni Ama ta do to do makdeng a vazay.

Kelosi 1:27

O nakenakem na ni Ama ta do to am ikakza na o kapakateneng da no tao do karawan so mapeyzokab a nanao na. Ori rana am si Yeso Kizisto a yarana macikaop jyaten. So yata ikanoyong a macizanod do azwazway na ni Ama ta do to no makwa.

Ivoso 2:7

O ikakman na sang ni Ama ta do to am ipacita na do kaidan no karawan o mapeyzokab a pangangarilawan na kano pangangasyan na jyaten a yamacikaop ji Yeso Kizisto.

Ivoso 1:18

Ko mapasyasi ji Ama ta do to a omiwang do onowned nyo a kapakateneng nyo na do peypeypangayan no na panopan jinyo a kapanta na ninyo so to meyyonong a ikavyay no pahad nyo do teyngato. So ikatey rako na no aryarilaw na so omanoyong jya tao.

Loma 8:29

Ta o nipamnekan na ni Ama ta do to a amraralay nya tao am to na ji ngamoga sira akman so Anak na si Yeso Kizisto apiya so ahahapan sya. So ikanoyong na ni Yeso a akmey rakeh na jyaten akmey meyketeketeh do cinai.

Locya 1:17

Ta iya rana am manmanma a mai a kano Panirsirngen nyo. Ta oyatan na no Seyzi akman si Idiya. So peypeypapyan na so nakenakem no nimeyrahet so nakem a malama. Ipeysinaoli da mamlis so nakem no meyraraten a tao. So icyakma dey mina tazak a tao so onowned. So ikanoyong na somidong so tao a omnanala sya.”

1 Tesalonicya 5:9

Ta o na nipamnekan jyaten ni Ama ta do to am beken a mangay na ioya nyaten. Ta ahapen na yaten do kapyapyan. Ori o mina vazay na no Anak na si Yeso Kizisto a Panirsirngen ta.

Kelosi 1:12

Isaray nyo si Ama ta do to. Ta iya o yanimapanop jinyo a yamraralay nya. So nyo ikanoyong rana yamyan do kazngangan.

Ivoso 3:8

Tana mina saod na so kabo no kapsepsekan ko am na manket yaken a pahanhanen a meylimwang nya jinyo a beken a tao do Yotay so aglaglaw na jyaten ni Kizisto.

Nimlivolivon 9:15

Maniring jya si Yeso am, “Mangay ka, ta ko nipamnekan si Sawlo a mahap so vazay ko a meylimwang no ngaran ko do beken a tao do Yotay a kano aro a panipanirsirngen, pacyangayan nyo a Isedi a tao.

Loma 8:30

Ta o tao a nipamnekan na ni Ama ta do to a amraralay nya am nipanop na sira a omanoyong jya, kabnek na sira abo so raraten do tangain na. So ikanoyong da macikazway jya do teyngato no makwa.