Loma 8:17 - Seysyo No Tao

¹⁷ No manoyong o kakma tey anak ni Ama ta do to am manoyong keyyan no itoro na jyaten no makwa. So ikakman ta sang a macikasaray do Anak na si Yeso Kizisto. Ta yaten rana am no macyanod ta do alalaw na ni Kizisto am macikazway ta do azwazway na.

Loma 8:17 Referans Kwoze

Cyalatay 4:7

Inyo rana sicyaikwaya am beken a lamlamsoy kamo rana a na italamozong no iwawalam ni Moyse, ta akma ney anak rana inyo ni Ama ta do to. O akma ney anak ni Ama ta do to am ori o makahap so aryarilaw na.

Cyalatay 3:29

No kamo macilovot ji Kizisto am manoyong kamo na a macikownongan ji Apolahan a omamoon so aryarilaw na ni Ama ta do to si Apolahan.

Ivoso 3:6

O ji da nipatwaw a nanao na am na rana pazanoden o beken a tao do Yotay do meyngongyod a tao do Yotay a makahap so aryarilaw na jyaten ni Ama ta do to, do kanimakamizing nyo rana so Mapasaray a Ciriciring na ni Kizisto. So nyo rana icyakmey yasa so nakem a kano tao do Yotay a meyhanhan ni Yeso Kizisto a makahap so to meyyonong a ikavyay no pahad nyo.

Ipaziman 21:7

O ji nimablis so onowned a tao am ori o apya amyop sya. O icyakman na sang am abneken da yaken a Tao do to da a kabnek ko sira anak ko.

1 Pite 4:13

Kasaray nyo a macizanod so alalaw ji Kizisto. Ta ori o ikasaray nyo no mai rana si Kizisto.

1 Pite 1:4

So tamo ikanoyong a yaomamoon so peymeymasaodan na ni Ama ta do to a omanoyong jya tao. To meyyonong o itoro na jinyo do teyngato ni Ama ta do to.

Tito 3:7

O pangangarilawan na ni Ama ta do to am ori o ikapya ta na so nakenakem jya, ta abwata rana o raraten ta do tangain na. So ikanoyong ta mapananala so kapakahap ta rana so to meyyonong a ikavyay no pahad ta.

Sipolay 6:17

Mina to na rana mancyan ni Ama ta do to o kaji na ablisan no nakenakem na sira so tao a omamoon so mina ciring na jira. Am ori o nyaitan na do ciring na ni Ama ta do to akma ney yongkad. O nipasongsong na ciring am ngaran na ni Ama ta do to,

Yowani 17:24

“Mo Ama, o mo nitoro jyaken a tao am inaoy si amyan sira do angayan ko. So ikanoyong da makacita so azwazway ko a nitoro mo jyaken. Ta nimanoma rana o aglaglaw mo jyaken no kaji na pa amaogan no karawan.

Yake 2:5

Amizngen nyo manga keypong an. Na nitenngan ni Ama ta do to sira o makasi a tao do karawan a makdeng so nakem a omraralay nya. So da ikanoyong a makahap so nakem na sira ni Ama ta do to a macikaop rana do italamozong na.

Veydipi 1:29

O na nipamnekan jinyo am beken a nyo kanoyong ji Kizisto an, ta ahapen nyo o alalaw na a mahap so vazay na,

2 Kedinto 1:7

Am ori o namen peyhanhanan ninyo a jyagogad so onowned. Ta namen katenngan inyo a yamacizanod jyamen so alalaw. So icyakman nyo sang a macizanod do sarasaray a itoro na jyaten ni Ama ta do to.

Loma 5:17

So ikanoyong na no raraten na ni Adam a yapwan no ikawakwak rana no tao. Am arakorako pa o pangangarilawan na ni Ama ta do to a kani Yeso Kizisto a yamapeyvaliw jyaten a abo so raraten do tangain na ni Ama ta do to a manta nyaten so to meyyonong a ikavyay no pahad ta.

Sipolay 1:14

Ikongo o tinsi. Sira rana am na kalamsoyan sira ni Ama ta do to a somidong so yarana makahap so to meyyonong a ikavyay no pahad da tao.

Ipaziman 3:21

O jya nimablis so onowned a tao am ipanta ko so oyowyat na a kapacitangked na jyaken do lilisnan ko. So icyakman na jyaken sicyaikwaya a nimakata yamacitangked ji Ama do lilisnan na.

Locya 12:32

“Inyo rana a macilolo jyaken am ji kanyo anyahey an. Ta isaray na ni Ama ta do to o katalamozong na ninyo.

Matay 16:24

Karahan am maniring si Yeso do macinanao jya am, “No amyan so tao a omonot jyaken am to na pangawawan o kataotao na a somabway no jyojika na macihza jyaken.

1 Kedinto 2:9

Akman so ciring do Seysyo. Ta maniring am, “O nakem na ni Ama ta do to a itoro na do amraralay nya tao am ji da pa nimacita no mata da. Ji da pa nimamizing no cicilwan da. Ji da pa nimanakem no tao.”

Loma 8:3

O iwawalam na ni Moyse am ji na sidong yaten a komaro do peyraratenan ta. Ta cinatao ta o kapeyraraten ta. Am si Ama ta do to am ori o yanisomidong jyaten. Na nitovoy o Anak na a yamacingay so keyteytawan do tao do karawan a yanimawakwak no raraten ta. So ji na rana nalamozongi nyaten no raraten.

Nimlivolivon 20:32

“Sicyaikwaya am ko na to norwan inyo ji Ama ta do to. Ta ko ipeyhanhan o pangangarilawan na ni Ama ta do to a somidong jinyo a to ngotokot so nakem a meyhanhan nya. No si makman kamo sang am mahap nyo na o igeygeglaw na so omraralay nya tao.

Nimlivolivon 14:22

So nikakadayan da so amraralay ni Yeso a tao a paiten so nakem a to ngotokot a amraralay ni Ama ta do to. Maniring sira jira am, “Yaten rana a yamraralay ni Yeso am aro masapa ta alalaw no macikaop ta do italamozong na ni Ama ta do to.”

Matay 25:21

Maniring o lawpan am, ‘Imo rana am ka tey yapya ipeyhanhan a lamlamsoy. Tana yapereh o yako nitoro jimo am yamo ji ngolala. So to ko rana mapahanhani jimo a tomalamozong no arwaro pa kano nang. So ipacizanod mo jyaken a somaray.’

Locya 24:26

Manngwa, nyo jyatenngi o kangay no akman sang a alalaw no Misayya a kai na rana no azwazway na?”

Nimlivolivon 26:18

Ko tovoin imo a omiwang do mata da kapakacita da rana so kazngangan a komaro do vazay ni Satan a omanoyong rana ji Ama ta do to. So ikanoyong da rana mavonas so raraten a macikaop do amraralay nyaken a tao,’ kwan na yaken ni Yeso.

2 Kedinto 1:5

Tana arako alalaw a mai jyamen do kahap namen so vazay ni Kizisto am cyaha, ta ikarakorako no sidongan na jyamen ni Kizisto.

Veydipi 3:10

Am ori o ko naknakman so ko kapakateneng ji Kizisto a kano arako a oyowyat na jyaken. Ta iya rana am tey mowyat, ta nimirwa a mavyay. Yako ikakza o ko kapacizanod jya so alalaw, akman sya ji rahet so kawakwak na.

Kelosi 1:24

Tana tey rako o alalaw ko sicyaikwaya am cyaha, ta o akman rana sang am ipakasidong ko jinyo a meypahagnat so nakenakem a omraralay ni Yeso. Am ori o ko isaray, ta ipakasidong ko so omraralay ni Yeso Kizisto a tao. Ta nimakman sang si Yeso Kizisto a nimawakwak no omraralay nya tao.

Sipolay 1:2

Am sicyaikwaya am o Anak na ni Ama ta do to o nimapatwaw so ciriciring na jyaten. Si Yeso o nimangamamaog so karawan no ciring na ni Ama ta do to. So nitorwan na ni Ama ta do to no makakaday do karawan eya a italamozong ni Yeso.