Loma 6:23 - Seysyo No Tao

²³ Ta o kapalit no raraten am mangay do makotokotod a lila no apoy a mangay no makwa. Am o yazaw na ni Ama ta do to so yamacibedbed ji Yeso Kizisto a Panirsirngen ta am ipanta na so to meyyonong a ikavyay no pahad da.

Loma 6:23 Referans Kwoze

Yowani 3:36

Omanoyong do Anak na am mahap na o to meyyonong a ikavyay no pahad na. O ji nganoyong do Anak na am abo jya o ikavyay no pahad na, ta meydedna jya o peyoyaoyyan na ni Ama ta do to.

Loma 5:12

Si Adam o yapwan no raraten do karawan. Am ori o nyangay na no inawan na do kapeyraraten na. Ori o nikapwan no kawakwak rana no tao do karawan. Ta yamamimin o tao a yameyraraten.

Yake 1:15

No amlida do onowned na o marahet a ikeykakza na am meytotwaw rana o raraten na. Ori rana am yapwan no kangay na do makotokotod a lila no apoy a mangay do kaidan no karawan.

Yowani 6:40

Ta o nakenakem ni Ama am mahap da o to meyyonong a ikavyay no pahad da no makateneng jyaken a kano omanoyong jyaken a tao, a kapeyvangon ko pa sira no makaranes rana o araraw no kapeykapyapinpin na ni Ama ta do to so tao.”

Matay 25:46

O akman rana sang a tao am todangay no makwa o pasingsingtan jira. Am sira rana o ji meylimoteng so onowned a tao am mahap da o to meyyonong a ikavyay no pahad da.”

Yowani 5:24

To ko na macitangayan jinyo am omamizing so ciring ko a tao a omanoyong do yanitomovoy jyaken am mahap na o to meyyonong a ikavyay no pahad na. So ikanoyong na ji na meydednai no peyoyaoyyan na ni Ama ta do to. Ta nimaliklik na rana o apwa kawakwakan no pahad na.

Loma 5:21

No kakwa pa am niharag no raraten o tao do karawan. Am ori o ikamimin da mawakwak no tao. Am o pangangarilawan na ni Ama ta do to am na nitoro do meyhanhan nya tao. So ikamimin da rana vonasen na so raraten. So ipakahap da rana so to meyyonong a ikavyay no pahad da, do da kanoyong ji Yeso Kizisto a Panirsirngen ta.

Loma 2:7

Yamyan so tao a yajimtad no da kapanidong so tao a yakomala so azwazway na ni Ama ta do to a kano to meyyonong a ikavyay no pahad da. O akman rana sang a tao am itoro na jira ni Ama ta do to o to meyyonong a ikavyay no pahad da do teyngato.

Yowani 10:28

Ipanta ko sira so to meyyonong a ikavyay no pahad da. So ji rana meydednai jira no peyoyaoyyan na ni Ama ta do to. So ikabo no tao a makapehes sira do lima ko.

Ipaziman 21:8

Am sira rana manyahey a tao a kano ji nganoyong jyaken a tao a kano somagpyan a kano manwakwak a kano mangzakza so icyatatao da kano manlita no oyowyat ni Satan a kano manaralay so malas a iraralay a kano mangalalas a tao am amyan so akmey awa so karakorako a lila no apoy a omapanala sira. Ori rana am ipirwa kawakwak ori.”

Tito 1:2

O peypeypangayan na rana no nanao eya am ipakahap ta so to meyyonong a ikavyay no pahad ta. Manoyong o nipanci na a itoro na jyaten no kaji na pa mangamaogan so karawan. Ta si Ama ta do to rana am abo kalalasan na.

Loma 5:17

So ikanoyong na no raraten na ni Adam a yapwan no ikawakwak rana no tao. Am arakorako pa o pangangarilawan na ni Ama ta do to a kani Yeso Kizisto a yamapeyvaliw jyaten a abo so raraten do tangain na ni Ama ta do to a manta nyaten so to meyyonong a ikavyay no pahad ta.

Loma 6:16

No onotan nyo o ciring no tao am manoyong kamo a lamlamsoy da. Akman sang, ta no si onotan nyo o raraten am manoyong kamo a lamlamsoy no raraten a mangay do kararatan. Am no si onotan nyo si Ama ta do to am abneken na inyo a abo so raraten do tangain na.

Yowani 17:2

Nitoro mo na o oyowyat jya a tomalamozong no tao do karawan. O icyakman na sang am itoro na o to meyyonong a ikavyay no pahad da no tao a nipamnekan mo a omanoyong jya.

Yowani 6:68

Maniring si Simong Pite am, “Mo Panirsirngen, imo saon na yanan no nanao no to meyyonong a ikavyay no pahad namen. Sino pa o pacilolwan namen.

Yowani 6:27

Taosya o kaziknan nyo no ji mamayok a kanekanen. Ta apyapya pa o kaziknan nyo no kanen a yapwan no to meyyonong a ikavyay no pahad nyo. O kanen rana ori am yaken o yatomoro nya jinyo. Ta yaken a Nipamnekan na ni Ama ta do to a tao o tomoro no akman sang jinyo. Ta yarana amyan jyaken so oyowyat na ni Ama ta do to. Ori rana am yongkad na no yanitomovoy jyaken.”

1 Yowani 2:25

Ta o ipanci na jyaten a mahap ta ni Kizisto am to meyyonong a ikavyay no pahad ta.

Cyalatay 3:10

O tao a meyhanhan no iwawalam na ni Moyse am meydedna jira o peyoyaoyyan na ni Ama ta do to, do kaji da makataptapan sya a peyvazain. Ta o ciring do Seysyo am, “O tao a ji makataptap sya peyvazain so yadomket a iwawalam ni Moyse am mangay jira o peyoyaoyyan na ni Ama ta do to.”

Yowani 4:14

Am o amyop so itoro ko a ranom am to sira meyyonong a ji rana awaw. O itoro ko jya ranom am akmey atbod do onowned na a komalangboy. So ikanoyong na makahap so to meyyonong a ikavyay no pahad na.”

Yowani 4:36

O mapanop so tao a omanoyong do nanao ko am arako o nakem ko jya. Sira rana omonot do nanao ko am mahap da o to meyyonong a ikavyay no pahad da. Katonodan no nang o amhakakaw a tao. Ta o pamowahen no asa ka tao am macivonong sira o karwan tao. So ikanoyong da tey masaray a tomaham do nihakawan da. Akman so meylimwang no ciriciring na ni Ama ta do to a kano omanop so tao a omanoyong jya an, ta tey masaray sira an.

Loma 1:32

Tana katenngan da si Ama ta do to a amwoya no akman so sang a vazay am da jyamamman, ta da ikeykavevek a yamanara so tao a akman sira so vazay.

Loma 6:21

O yanyo ipacimanig rana sicyaikwaya a vazay am nipeyvazay nyo na. Am ikongo o na kapyapyan no akman sang. Kangay nyo saon do kararatan no akman sang am.

Loma 8:6

O italamozong no adan na onowned a tao am mangay do kararatan. O italamozong no Seyzi am mahap da o ikapiya no onowned da kano to meyyonong a ikavyay no pahad da.

Loma 8:13

Ta no si to nyo mangozai o adan a onowned nyo am jyabo kaji nyo angayan do kararatan a. Am no si onotan nyo o Seyzi a komaro do raraten nyo am jyabo kaji nyo avyayan do teyngato a.

Loma 8:38

Ta yako anoyngan o kabo no makapasyay jyaten do pangangarilawan ni Ama ta do to. Tana mavyay ta, tana mawakwak ta am to meyyonong o karilawan na nyaten ni Ama ta do to. Tana tinsi a tana kalamsoyan ni Satan am abo o makapasyay jyaten ji Ama ta do to a marilaw nyaten. So ikabo no oyowyat do sinokob no hanit a makapasyay jyaten do aryarilaw na jyaten ni Ama ta do to. Tana sicyaikwaya, tana no makwa am abo do karawan o amyan so oyowyat a mapasyay jyaten do pangangarilawan na ni Ama ta do to a yarana macikaop ji Yeso Kizisto a Panirsirngen ta.