Katenngan da no tao apya so vazay, makananao so anak na, mateneng a manaotao so apo do teysa ka ili a tao. Ji mapahama so nakenakem, kasidong na so amyan so alalaw a tao a kowyat na mahap so apya vazay.
Ko ipeyminaminasi o kararay ko si Toveyna kani Tovosa kano kavakes ko a meyngaran si Peysi. Ta sira rana ori am yamakdeng sira a yamahap so vazay na ni Ama ta do to.
Ko ipeyminaminasi sira o yamalwalovot a yameynozi do vahay da. Ko ipeyminaminasi o kagagan ko a si Ipaynayto. Ta iya rana am ney manma na niomanoyong ji Yeso Kizisto do Yasiya a pongso.
Ko ipeyminaminasi o kasina ko no inawan a si Antoniko a kani Yoniya. Sira ori am nimanmanma pa ka nyaken a niomanoyong ji Yeso Kizisto. No kapteng da jyamen am sira ori o mina kararay ko do pamemtengan. Katenngan da sira no nipamnekan na ni Yeso Kizisto a amlivolivon no ciriciring na.
Namen ipacimeseseg jinyo manga kakteh am ikanig nyo pa sira o meyyapwaponged no kyokay a nipamnekan na ni Ama ta do to. Ta sira rana am da vavagan inyo no icicirawat no omraralay ni Yeso Kizisto.
