Ivoso 5:8 - Seysyo No Tao

⁸ Ta no kakwa am nimyan kamo do kasarisaryan a ji makateneng ji Ama ta do to. Am sicyaikwaya am kamo na macikaop ji Yeso Kizisto a Panirsirngen ta. So yanyo iyan rana do kazngangan. Am ori o inaran nyo so icicirawat da no tao a yamakateneng rana do ciriciring na ni Ama ta do to.

Ivoso 5:8 Referans Kwoze

Yowani 8:12

Maniring si Yeso jira am, “Yaken rana am zezak no karawan. O macilolo jyaken a tao am amyan jira o zezak no onowned da. So ji da rana ngyani do kasarisaryan.”

1 Yowani 1:7

Am no si amyan ta do kazngangan a akman si Ama ta do to am macikaop ta do akma tey kakteh do cinai a omraralay ni Ama ta do to. Ta o rala na ni Yeso Kizisto a Anak na ni Ama ta do to o amvonas so makakaday a raraten ta.

Nimlivolivon 26:18

Ko tovoin imo a omiwang do mata da kapakacita da rana so kazngangan a komaro do vazay ni Satan a omanoyong rana ji Ama ta do to. So ikanoyong da rana mavonas so raraten a macikaop do amraralay nyaken a tao,’ kwan na yaken ni Yeso.

Kelosi 1:13

Na nyagag yaten do kasarisaryan a na kaparapong jyaten do italamozong no Anak na ni Ama ta do to.

Yowani 12:46

Akma koy zezak a mai do teyrahem. So ji da na ngyani do kasarisaryan no omanoyong jyaken a tao.

Ivoso 4:18

Onowned da am yakmey kasarisaryan. Yabo da kasngesngenan do vayo a onowned a yapo ji Ama ta do to. So da ikanoyong a yaji macipayok so nakenakem ji Ama ta do to.

Yowani 12:36

No myan pa o zezak am anoyngan nyo ori an. So ikanoyong nyo na mazngang so onowned.” Iptad na ni Yeso o ciring na am karwan na sira kangay na rana matarek do kabwan no tao.

Ivoso 2:2

No kano nang am onotan nyo pa o malas a vazay da no ji manganoyong a tao a kano ciring ni Satan a yatomalamozong no meyraraten a tao.

2 Kedinto 4:6

O nimangamaog no ciring na so zezak a Tao do to am ori o amzezak so masyonowned ta. Ori o ta ipakateneng do azwazway na ni Ama ta do to amyan ji Yeso Kizisto.

Tito 3:3

Yaten rana no kakwa pa am abwata o katatenngan ta a ji mangamizing a akmey mavozaw pa so aktokto a to mangozangozay do onowned ta a makza no meycyamadadayan do karawan. So ikanoyong ta amyan pa do peyraratenan ta kano panginanehtan ta kano pasikaokaoyyan ta.

Locya 16:8

Mamizing na no lawpan na am isaray na o lamlamsoy ori, do katey mapatak na a mangamaog so vazay a ipeypapyan na so kataotao na.” Maniring pa si Yeso am, “Ko pa ciring jinyo am o ji manaralay a tao sicyakwaya am akman sang o ahahapan da so vazay da. So ikateneteneng da kano manaralay a tao.

Ivoso 6:12

Ta yaten rana am beken a ta macililiman do tao. Ta tamo macililiman ji Satan a kano aro a kalamsoyan na yatomalamozong no meyraraten a tao do karawan.

2 Kedinto 3:18

Yatamo todamimin a yajyabengbengi so moing. Ta o tao rana a omonot do Panirsirngen ta Seyzi am amyan rana jira o azwazway na ni Ama ta do to a omyavayo sira. Am ori o icyakman da sya so icicirawat a tey mazway.

Locya 1:79

a kaciray na so ji pa makateneng ji Ama ta do to a manyahey no kawakwak da tao, a kapangonong na nyaten do kapyapyan.”

2 Kedinto 6:14

Ji kamo macizanod so onowned do ji manaralay a tao an. Ta ji meyyangay o pangtoktwan nyo a ka nira. Ta jyabo kapeyzavoz no apya kano marahet a. Akman sang o mazngang a kano kasarisaryan, ta ji meyzavoz.

1 Kedinto 1:30

Am si Ama ta do to o yanimapanop jinyo ji Yeso Kizisto. So na ikanoyong a na yapwan no teneng ta. Iya o na niyapwan no yamvonas so raraten ta. Am ori o na abnekan jyaten ni Ama ta do to a abo so raraten do tangain na. So icyakma tey matnaw a ranom so onowned a macilovot ji Ama ta do to a ji na rana nalamozongan no raraten.

Loma 2:19

Yanyo ipanci o yanyo kapangonong no mavota tao a yamangay do kazngangan.

Yowani 1:9

O zezak rana am manoyong a zezngang apo do teyngato a tomiray so tao do karawan.

Matay 4:16

o amyan do yakasarisaryan a manyahey no kawakwak da am macita da rana o na cirain ni Ama ta do to a mapatazadang sira.”

Cyalatay 5:25

Manoyong o kanimanta na rana nyaten no Seyzi so vayo a onowned ta. Am ori o na ikanoyong a yatomalamozong nyaten.

Loma 1:21

Am tana da katenngan si Ama ta do to am da ji raralayan, da ji narayan o aryarilaw na sira. So da icyakmey yamavota so onowned a yaji makateneng ji Ama ta do to.

Ivoso 5:2

Patwawen nyo do icicirawat nyo o pangangasyan na ni Ama ta do to, akman si Yeso Kizisto a yamarilaw nyaten a yajingbeywan do inawan na nisomidong jyaten. Ta o akman rana sang a vazay na am isaray na ni Ama ta do to.

Nimlivolivon 17:30

No kaji da pa makatenngan ji Ama ta do to no tao am ji na naknakma o raraten da. Am sicyaikwaya am na ikakza o tao a yamamlis a komaro rana do peyraratenan da.

Matay 3:8

Ta si mamlis kamo na so icicirawat am ori o ikanoyong nyo rana yana nikomaro do peyraratenan nyo.

Yowani 12:35

Maniring si Yeso am, “Alikey o iyan na jinyo no zezak. Makabezbez kamo a omalam do iyan na pa no zezak. Ta no masari rana am ji nyo na cita o pangonongan nyo.

Loma 13:12

Yakomavos rana o marahet a vazay da no tao do karawan. Na kapakaranes rana no yapiya na patazadangan jyaten ni Ama ta do to. Am ori o ji ta to peyvazai so jyapsepsek a vazay ta. Ta kahap ta so apiya vazay akmey voovoo a ipakaharag ta so amlita jyaten a Satan.

Kelosi 1:12

Isaray nyo si Ama ta do to. Ta iya o yanimapanop jinyo a yamraralay nya. So nyo ikanoyong rana yamyan do kazngangan.