Ivoso 5:10 - Seysyo No Tao

¹⁰ Naknakmen nyo o kahap nyo so apiya vazay a isaray na ni Yeso Kizisto a Panirsirngen ta. Ta ori o ahapen nyo.

Ivoso 5:10 Referans Kwoze

Sipolay 12:28

Am ori o sarayan ta no to meyyonong a ji rana gonagonay a italamozong na ni Ama ta do to a yanan ta do teyngato. To ta mangozai o isaray na ni Ama ta do to a peyvazain, kowyat ta amraralay nya.

1 Pite 2:20

No si kalasan mo o bakbakan da jimo a kato mo liliwan sya am cyaha, ta kalasan mo o akman sang. Am no abo o kalasan mo a kato da oyyan nimo a kato mo peykabobwan sya am cyaha, ta isaray na o akman sang ni Ama ta do to.

1 Pite 2:5

Inyo rana a tao a na yanan no to meyyonong a ikavyay no pahad nyo am itoro nyo o kataotao nyo ji Ama ta do to. So icyakma nyoy vato a ipatnek na so panaralayan. So nyo icyakmey mapatanatanang so nakem ji Ama ta do to. Am o patanangen nyo am sarasaray nyo. So sarayan na nya jinyo ni Ama ta do to so akman sang a nakem nyo sya, ta kamo na macikaop ji Yeso Kizisto a na rana yanan no Seyzi.

1 Tesalonicya 5:21

Am pakanaknakmen nyo o nimamizing nyo a nanao da jinyo a kownot nyo do manoyong a nanao an.

1 Timotay 2:3

O akman rana sang am tey yapya, ta tey kakza na o akman sang ni Ama ta do to. Iya o mapatazadang jyaten do teyngato.

Veydipi 1:10

So ipakateneng nyo rana do ney yapiya na vazay. No si makman kamo sang am manoyong kamo na a ji meylimoteng so onowned a abo so karatan do araraw no ipirwa na mai ni Kizisto.

Loma 14:18

Ori an o ahapan ta so vazay ta ji Kizisto an. Ta ori o sarayan na nyaten ni Ama ta do to a kano icyatatao ta.

1 Timotay 5:4

No myan so anak da no vao a mavakes a kano apwapo da am nanawen mo sira do vahay da mapeylamnay so inyapwan da kano akes da kano akay da. Ta ikakza na o akman sang ni Ama ta do to.

Veydipi 4:18

O nyo nyazaw jyaken a apzapzatan am ko na nimamimin a yanimahap. So ko to meypanpani jya. Si Ipaloti a akma tey kakteh am ori o yanimai no aro a azaw ko. So na sarayan nya ni Ama ta do to so akma nyoy nakem jya.

Kelosi 1:10

No si akman sang am manoyong kamo na macipayok so vazay ji Yeso Kizisto a Panirsirngen ta, do kahap nyo so vazay na a meypahagnat rana so onowned a makateneng rana ji Ama ta do to.