Ivoso 4:21 - Seysyo No Tao

²¹ No kamo manoyong a yarana nimakamizing sya, yarana mangononong do manoyong a nanao na ni Yeso a ninanao namen jinyo am,

Ivoso 4:21 Referans Kwoze

1 Yowani 5:20

Tamo katenngan o Anak ni Ama ta do to a yanimai rana a yamanta nyaten so teneteneng ta a ta ipakateneng do manoyong a Tao do to. So ta ikanoyong a macikaop do ney manoyong na a Tao do to a kani Yeso Kizisto a Anak na. Iya rana am manoyong a Tao do to a yapwan no to meyyonong a ikavyay no pahad ta.

Ivoso 1:13

Inyo rana beken a tao do Yotay am kamo akman sang, ta no kapakamizing nyo so manoyong a mapasaray a nanao am mina to nyo nganoyngi si Kizisto. Ori o na nitorwan rana no Seyzi jinyo ni Ama ta do to akma ney yongkad no kapacikownongan nyo rana jya.

Kelosi 2:7

Payamoten nyo o nanao na ni Yeso Kizisto do onowned nyo a kapeypahagnat nyo na so nakenakem jya. So sarayan nyo nya ji Ama ta do to.

Yowani 14:17

Iya rana am yamapatwaw so manoyong a nanao ni Ama ta do to. Am da to nazibwan no yaji nganoyong jyaken a tao. Ta da jyacita. Am ori o da ji makatenngi jya. Am inyo am nyo katenngan o Seyzi a macikaop jinyo a Rarey nyo a yaji macisyay jinyo.

2 Kedinto 11:10

Abo malas a ciring ni Yeso. So icyakman ko sang a jyalas so ciring jinyo. Am ori o ko jyamoi a manci nya do pongso no Sila so kakman ko sang a ji ngakday so patodahen da jyaken.

2 Kedinto 1:20

Ta na rana nipangononongan o aryarilaw na jyaten ni Ama ta do to ni Yeso Kizisto. Am ori o icyakma tey asa so onowned a manci no Amin a zomwazway si Ama ta do to.

Yowani 14:6

Maniring si Yeso am, “Yaken am rarahan nyo. Yaken am yanan no manoyong a nanao. Yaken am yapwan no to meyyonong a ikavyay no pahad nyo. No ko abo am abo tao a makatanggeh ji Ama ta do to. So ika yaken no ipakatokod nyo ji Ama ta do to.

Yowani 10:27

O kagling ko am katenngan da o izezyak ko. So ipakateneng ko jiraha. So da ipacilolo jyaken.

Yowani 1:17

O iwawalam na ni Ama ta do to o nipangnanao na ni Moyse a onotan ta. Am o pangangarilawan na kano manoyong a nanao na ni Ama ta do to am ori o nyai na ni Yeso Kizisto do tao do karawan.

Locya 10:16

Maniring si Yeso do macinanao jya am, “O omamizing jinyo am omamizing jyaken. O mapasobna jinyo am mapasobna jyaken. O mapasobna jyaken am pasobnan da o nitomovoy jyaken an.”

Matay 17:5

Ji na pa teyka ni Pite o ciring na am to ngyan so cinalab a ombengbeng sira a keyyan no ciring a maciralay do cinalab ang. Maniring am, “Iya rana am ney kaglaw ko Anak ko. So sarayan ko nya. Amizngan nyo sya.”

Loma 10:14

Am no ji da nganoyngi am makongo sira tomawag jya. No ji da pa nimamizing o ciriciring na am makongo sira omanoyong jya. No jya nimeylimwang o ciriciring na am makongo so wanjin o tao a makamizing sya.

Ivoso 2:17

O na nyai ni Kizisto am na ipeylimwang do aro a tao o Mapasaray a Ciriciring na ni Ama ta do to, pacyangayan nyo a beken a tao do Yotay a ji makateneng ji Ama ta do to no kakwa ka nira tao do Yotay.

Kelosi 1:5

Ta no kavavayo nyo pa nimakamizing so Mapasaray a Ciriciring na ni Ama ta do to am to nyo na nganoyngi o itoro na jinyo ni Ama ta do to do teyngato.

Kelosi 1:6

Beken a inyoo o na peylimwangan no Mapasaray a Ciriciring na ni Ama ta do to, ta yarana nimeylimwang do peycyamahamahatawan na. So da rana ipamlis no tao. So da icyakman jinyo a yarana makateneng do pangangarilawan na ni Ama ta do to.